E Dodonu Meda Masu Vei Ira na Sanito?
EDA gadreva kece me dua e vakacegui keda nida yalolailai. Se mani leqa cava eda sotava eda na gole vua e dua na itokani e dauveikauaitaki se sotava tale ga na leqa qori. Na mataqali itokani va qori e taleitaki vakalevu.
Eso e va qori tale ga na nodra rai me baleta na masu. Era sega ni masu vua na Kalou nira nanuma ni sa rui cecere qai lagilagi, e rawarawa ga mera masu vei ira na sanito. Era kaya ni o ira na sanito era na kauaitaka nodra leqa nira sa sotava tale ga na veivakatovolei kei na ituvaki dredre. Kena ivakaraitaki, o ira era vakayalia e dua na nodra iyaya vakamareqeti era na masu vei “Sanito” Anthony mai Padua—na sanito vakatawa ni iyaya e butakoci se yali. Era na masu vei “Sanito” Francis mai Assisi ni tauvimate nodra manumanu se “Sanito” Jude Thaddeus ke ra rarawataka e dua na ka.
Eda na kila gona vakacava ni vakadonuya na iVolatabu na nodra masuti na sanito? Nida masu vua na Kalou, eda na via kila: Ena rogoca o koya na noda masu? Eda rawa tale ga ni taroga: Na cava nona rai nida masu vei ira na sanito?
KA E KAYA NA IVOLATABU
Era vakavuvulitaka na Lotu Katolika ni o ira na sanito era mata vua na Kalou, qori na vuna era dau masuti kina. E kaya na New Catholic Encyclopedia, qori na “nona vakamamasu e dua e vakadonuya na Kalou me lomani kina o koya e kere veivuke.” O koya e masuti ira na sanito e nuitaka ni na vakalougatataki, ena vuku ni nodra itutu lagilagi ena mata ni Kalou.
Vakacava e vakavuvulitaka qori na iVolatabu? Eso era kaya ni tauyavutaka na yapositolo o Paula na nodra dau masuti na sanito. Kena ivakaraitaki, a vola vei ira na lotu vaKarisito mai Roma: “Au vakamasuti kemuni na taciqu, ena yaca i Jisu Karisito na noda Turaga kei na loloma e vu mai na yalo tabu, moni duavata kei au ena nomuni masulaki au vagumatua vua na Kalou.” (Roma 15:30) Vakacava e kerei ira tiko na nona itokani lotu vaKarisito o Paula mera matataki koya vua na Kalou? Sega. E tukuna tiko ga ni rawa nida kerea e dua na noda itokani lotu vaKarisito me masu vua na Kalou ena vukuda. Ia qori e duidui mai na noda masu vua e dua e nanumi ni tiko mai lomalagi me kerekere vua na Kalou ena vukuda. Na cava na vuna?
E tukuna o Jisu ena Kosipeli i Joni: “O yau na sala, na dina, kei na bula. Ena vukuqu ga ena qai torovi Tamaqu rawa kina e dua.” (Joni 14:6) E kaya tale ga: “Ena solia vei kemuni o Tamaqu na ka kece dou kerea ena yacaqu.” (Joni 15:16, The New Jerusalem Bible) A sega ni tukuna tiko o Jisu meda masu vua me qai vakadewataka vua na Kalou. Ia me rogoci na noda masu, e dodonu meda masu vua na Kalou ena vukui Jisu, sega ni dua tale.
Ni ratou tarogi Jisu na nona tisaipeli me vakavulici ratou ena ivakarau ni masu, e kaya o Jisu: “Ni dou masu, dou kaya, ‘Tamai keimami, me dokai na yacamuni.’ ” (Luke 11:2) Io, ‘nida’ masu se gauna kece eda masu kina, e dodonu meda masu ga vua na Kalou, sega ni o Jisu se dua tale. Koya gona, nida kila na ivakavuvuli matata qori i Jisu, eda rawa ni vakadeitaka ni dodonu meda masu ga vua na Kalou ena vukui Jisu Karisito, sega ni dua na mata se “sanito.”
E bibi dina ena noda sokalou na masu, e sega tale ga ni vakadonuya na iVolatabu meda sokalou vua e dua tale, na Kalou duadua ga. (Joni 4:23, 24; Vakatakila 19:9, 10) Qori na vuna meda masu ga kina vua na Kalou.
MO RERE NI O KEREKERE VUA NA KALOU?
Ena nona iVunau ena Ulunivanua, a tukuna kina o Jisu na vosa vakatautauvata ni dua na gone a kere kakana vei tamana. Vakacava ena solia o tamana na vatu me isosomi ni madrai? Se gata me isosomi ni ika? (Maciu 7:9, 10) Ena sega ni cakava qori e dua na tama dauloloma!
Vakasamataka mada ke o dua na itubutubu qai via kerei iko o luvemu ena dua na ka. Ena veigauna sa oti o dau saga mo drau veivolekati, o dau vakaraitaka tale ga ni o torovi rawarawa. Ia a kerea e dua me tukuna vei iko na ka e vinakata, ni leqataka na ka o na tukuna. Ena vakacava nomu rai? Vakacava ke sa nona ivakarau qori? O na taleitaka? Sega! Era vinakata na itubutubu dauloloma mera rogoca sara ga vei luvedra na ka era gadreva, mera doudou tale ga ni talaucaka na lomadra.
Sa qai tukuna o Jisu vei ira na lewenivanua na ibalebale ni vosa vakatautauvata me baleta na gone a kere kakana, e kaya: “O koya gona, ke sa rawa vei kemuni na tamata ivalavala ca moni solia na ka vinaka vei ira na luvemuni, sa na qai wacava sara na Tamamuni mai lomalagi ni na solia na ka vinaka vei ira era kerea vua!” (Maciu 7:11) E macala nira na vinakata sara ga na itubutubu mera solia vei luvedra na ka vinaka. Sa qai wacava na nona vinakata na Tamada vakalomalagi me rogoca qai sauma na noda masu.
Ke vakayalolailaitaki keda mada ga na noda malumalumu, e vinakata sara ga na Kalou meda masu vakadodonu vua. E sega ni lesia e dua tale me rogoca na noda masu. E uqeti keda na iVolatabu: “Mo biuta vei Jiova na nomui colacola bibi, ena tokoni iko ko koya.” (Same 55:22) Meda kua ni vakararavi vei ira na sanito se dua tale me matataki keda, ia meda saga meda kilai Jiova vinaka da qai veiwekani voleka kei koya.
E kauaitaki keda yadua na Tamada vakalomalagi. E vinakata me vukei keda ena noda leqa qai sureti keda sara ga meda toro voleka vua. (Jemesa 4:8) Eda kalougata dina nida rawa ni toro vua na Kalou e “Daurogo masu”!—Same 65:2.