‘Ena Vakaicovitaki Ira Era Vakasaqarai Koya ena Yalogu’

E kauaitaka beka o Jiova na ka era cakava na nona dauveiqaravi mera vakamarautaki koya? Era na rairai sega ni duavata kina eso, nira nanuma ni sega ni kauaitaki keda na Kalou. Na rai cala qori e beci kina na Kalou. Ia na nona Vosa na iVolatabu e vakadodonutaka na rai cala qori. E vakadeitaka vei keda ni marautaka o Jiova na ka era cakava o ira era qaravi koya ena yalodina. Raica mada na nona vosa na yapositolo o Paula ena Iperiu 11:6.

Na cava meda cakava meda vakamarautaki Jiova kina? E kaya o Paula, “ke sega na vakabauta ena sega ni vakamarautaki koya [Kalou] rawa e dua.” E sega ni tukuna tiko o Paula ni na dredre meda vakamarautaka na Kalou ke sega na vakabauta. Ia e tukuna vakamatata ni na sega sara ga ni rawa nida vakamarautaka na Kalou. Se da rawa ni kaya ni bibi dina na vakabauta meda rawa ni vakamarautaki koya.

Na vakabauta vakacava e vakamarautaki Jiova? E rua na ka e okati ena noda vakabauta. Kena imatai, meda “vakabauta ni bula dina tiko o koya.” Eda na vakamarautaki koya vakacava ke da sega ni vakabauta ni bula dina? O ira mada ga na timoni era vakabauta ni bula tiko o Jiova, ia e levu tale na ka e okati ena noda vakabauta. (Jemesa 2:19) Nida vakabauta ni bula tiko na Kalou, ena laurai sara ga ena ka eda cakava kei na noda itovo nida via vakamarautaki koya.​—Jemesa 2:​20, 26.

Kena ikarua, meda “vakabauta” ni na ‘vakaicovitaki’ keda na Kalou. O koya e dei na nona vakabauta e kila ni sega ni ka wale na nona saga me muria na ivakarau ni bula e vakamarautaka na Kalou. (1 Korinica 15:58) E tu vei Jiova na kaukaua qai vinakata sara ga me vakaicovitaki keda. Ke da sega ni vakabauta ya, ena rawa vakacava meda vakamarautaki koya? (Jemesa 1:17; 1 Pita 5:7) O koya e sega ni kila na Kalou e tukuni ena iVolatabu ena tukuna ni sega ni dau veikauaitaki, e sega ni marautaka na ka eda cakava, qai sega ni yalololoma.

O cei ena vakaicovitaka o Jiova? E kaya o Paula ni na vakaicovitaki ira “era vakasaqarai koya ena yalogu.” E dua na ivoladusidusi ni vakadewa iVolatabu e tukuna, ni vosa ‘vakasaqara ena yalogu’ ena vosa vaKirisi e sega ni kena ibalebale “me gole me lai vaqara,” e kena ibalebale ga me gole vua na Kalou me “qaravi” koya. E tukuna e dua tale na ivola ni matavu ni vosa vaKirisi qori, e tiko kina na vakasama ni sasaga vagumatua. Io, ke uqeti keda na noda vakabauta meda qaravi Jiova ena lomada taucoko qai gumatuataka ena vakaicovitaki keda o koya.​—Maciu 22:37.

Na cava na nodra icovi o ira era qaravi Jiova ena yalodina? E yalataka o Jiova na isolisoli talei ni bula tawamudu ena vuravura Parataisi, qori e vakaraitaka na nona loloma uasivi kei na nona daulomasoli. (Vakatakila 21:​3, 4) O ira mada ga era vakasaqarai Jiova tiko ena yalogu nikua era vakalougatataki vakalevu. Ena veivuke ni yalona tabu kei na vuku e tu ena nona vosa, era vakila na vakacegu kei na bula e vakainaki.​—Same 144:15; Maciu 5:3.

Io, e kauaitaka na Kalou o Jiova na nodra gumatua o ira era qaravi koya ena yalodina. Vakacava e uqeti iko qori mo toro voleka vua? Ke vaka kina vakacava mo bucina na vakabauta me rawa ni vakaicovitaki iko kina o Jiova?