Na Cava e Tarogi Kina Qo?

“O sega ni vakabauta na Kalou? E milioni era nanuma qori.” A volai qori ena dua na papa ni itukutuku e toka ena batinisala era sauma o ira era sega ni vakabauta na Kalou. Era nanuma ni sega ni gadrevi me dusimaki keda na Kalou.

Ena yasana adua, e levu era kaya nira vakabauta na Kalou. Ia era cakitaka qori ena nodra vakatulewa ni veisiga. A tukuna me baleti ira na lewe ni nona lotu o Salvatore Fisichella, e bisovi ni lotu Katolika: “Nira raici keimami eso era na sega ni vakabauta ni keimami lotu vaKarisito ni tautauvata ga na ivakarau ni neimami bula kei ira era sega ni vakabauta.”

Eso era sega sara ga ni kauaitaka na Kalou. Era nanuma ni dredre me torovi qai sega tu ga ni rawa ni vukei ira. O ira qori era qai kila ga na Kalou ni yaco na leqa se nira vinakata e dua na ka, e vaka tale tu me nodra bobula na Kalou.

Eso era sega ni kauaitaka sara vakabibi na ivakavuvuli vakalotu, se mera bulataka mada ga na ka era vakavulica na nodra italatala. Kena ivakaraitaki, era vakabauta e 76 na pasede na lotu Katolika mai Jamani ni dodonu me rau tiko vata na tagane kei na yalewa ni bera ni rau vakamau​—ia na rai qori e veisaqasaqa kei na ka e vakavulica na nodra lotu kei na iVolatabu. (1 Korinica 6:18; Iperiu 13:4) E macala ni sega ni o ira ga na lotu Katolika era kila ni veibasai na ka era vulica e valenilotu kei na ivakarau ni nodra bula, era nanuma tale ga qori eso tale na vakabauta. Era vakatusa na iliuliu ni veimatalotu ni o ira na lewe ni nodra lotu era “vakataki ira era sega ni vakabauta na Kalou.”

E votu ena ivakaraitaki eda se qai dikeva mai e dua na taro bibi: Eda gadreva dina na Kalou? E sega ni ka vou na rai qori. E volai mada ga ena imatai ni ivola ena iVolatabu. Meda kila na kena isau ena vinaka meda dikeva e vica na ile e volai ena Vakatekivu.