“Me Yaco Mai na Nomuni Matanitu” Ninaica?

1, 2. (a) Na cava e rawa ni vakaleqa na noda rai? (b) Na cava eda rawa ni vakadeitaka me baleta na Matanitu ni Kalou?

DE DUA o na raica ni levu e dau duidui nodra nanuma na itukutuku matailalai me baleta e dua na ituvaki e yaco. Eso era na rairai guilecava na ka e tukuna o vuniwai ni oti nona vakamacalataka na mate e tauvi ira tiko. Eso tale era na rairai oca ni vaqara na nodra ki se nodra matailoilo ni wilivola, ia era sega ni kila ni tu voleka ga. Era vakatoka na ituvaki kece qori na daunivakadidike me dua na mataqali mataboko, oya noda sega ni raica na ka e yaco tiko, se da guilecava e dua na ka baleta nida vakaogai keda tiko ena so tale na ka. E dau va sara ga qori na noda mona, ena sega ni rawa ni cakava e levu na ka ena dua ga na gauna.

² Levu nikua era mataboko tale tu ga va qori, vakabibi ena veika e yaco tiko e vuravura. Era na rairai kaya ni sa veisau vakalevu o vuravura me tekivu mai na 1914, ia era lecava na ibalebale dina ni veiveisau qori. Nida gonevuli ni iVolatabu, eda kila ni a yaco mai na Matanitu ni Kalou ena 1914 ena gauna a vakatikori kina o Jisu me Tui e lomalagi. Ia eda kila ni levu tale na ka e okati ena qaqanimasu: “Me yaco mai na nomuni Matanitu. Me caka na lomamuni e vuravura me vaka e caka tiko mai lomalagi.” (Maciu 6:10) E okati tale ga kina na kena kau laivi na ituvaki ca kei vuravura. Ni yaco qori, sa na qai rawa ni vakayacori e vuravura na loma ni Kalou me vaka ga e yaco tiko mai lomalagi.

3. E yaga vakacava na noda vulica na Vosa ni Kalou?

³ Nida vulica wasoma na Vosa ni Kalou, eda sa vakadinadinataka ni sa vakayacori tiko nikua na parofisai qori. Ia e levu nikua e sega ni va qori nodra rai! Era osooso vakalevu, e levu na ka era qara, sega kina nira raica na ivakadinadina matata ni sa tekivu veiliutaki tiko mai o Karisito ena 1914, sa voleka tale ga me tauca na veilewai ni Kalou. Ia e vinaka meda dui taroga: Ke sa vicasagavulu na yabaki noqu qaravi Jiova voli mai, vakacava au sa qai kauaitaka vakalevu na bibi ni gauna au bula tu kina qo ni laurai kei na veigauna sa oti? Keu se vou mada ga ena dina, na cava au dau kauaitaka vakalevu? Meda dikeva mada e tolu na vuna eda rawa ni nuidei kina ni sa voleka me vakayacora taucoko na loma ni Kalou e vuravura na Tui lumuti ni Kalou.

BASIKA O RATOU NA DAUVODO OSE

4, 5. (a) Na cava sa cakava tiko o Jisu me tekivu mai na 1914? (Raica na imatai ni iyaloyalo.) (b) Na cava e vakatayaloyalotaka nodratou vodo tiko na tolu na dauvodo ose, e vakayacori tiko vakacava na parofisai qori?

⁴ Ena 1914 a soli vei Jisu Karisito na veiliutaki e lomalagi. E volatukutukutaki ni vodo tiko ena dua na ose vulavula. E sega tale ni wawa ni sa tekivu vodo me vakarusa na ituvaki ca i Setani. (Wilika Vakatakila 6:​1, 2.) E vukei keda na parofisai ena Vakatakila wase 6 meda kila ni gauna ga ena tauyavu kina na Matanitu ni Kalou, ena totolo ga ni tarai vuravura na leqa​—na ivalu, leqa ni kakana, matedewa, kei na so tale na ituvaki e dau vakavu mate. Na tolu na dauvodo ose eratou muri Jisu Karisito tiko, eratou vakatayaloyalotaka sara ga na ituvaki qori.​—Vkta. 6:​3-8.

⁵ Me vaka ga sa parofisaitaki mai, e ‘kau laivi na sautu e vuravura,’ dina nira yalataka na tamata nira na cakacaka vata na veimatanitu ra qai tiko veisaututaki. E rawa gona ni tukuni ni iMatai ni iValu Levu e itekitekivu sara ga ni ivalu vakadomobula me kauta laivi na sautu e vuravura. Me tekivu mai na 1914, sa toso cake na bula vakailavo kei na vakadidike vakasaenisi, ia se vakaleqa tiko ga na bula veisaututaki na leqa ni kakana. Kena ikuri, sa qai tiko na veimataqali matedewa, leqa tubukoso, kei na so tale na ‘mate vakarerevaki’ era mate kina e vica vata na milioni e veiyabaki. Sa qai vakadomobula ga na ituvaki qori, e veitaravi tale ga na kena yaco, e kau laivi kina nodra bula e levu ni vakatauvatani kei na veigauna sa oti. Vakacava o kila na ibalebale ni veika era yaco tu qori?

6. O cei era kauaitaka na vakayacori ni parofisai vakaivolatabu, na cava era sa qai cakava?

⁶ Levu era kauaitaka sara ga na veika e yaco ni sa tekivu na iMatai ni iValu Levu kei na veitauvi ni mate na Spanish influenza. Ia dua na ka nodra namaka voli na lotu vaKarisito lumuti na yabaki 1914, ni mai cava kina na Nodra Gauna na Veimatanitu, se “nodra gauna lokuci na veimatanitu.” (Luke 21:24) E sega ni matata vei ira se na yaco vakacava qori. Era kila ga ni 1914 e yabaki vakairogorogo, ni na yaco kina e dua na ka vakatubuqoroqoro me baleta na veiliutaki vakalou. Gauna ga sa matata kina vei ira na vakayacori ni parofisai qori, era kacivaka sara ena doudou ni sa tekivu na veiliutaki vakalou, ra qai tusaqati sara ga kina vakaca. Na kena yaco qori ena levu na vanua, e vakayacori kina na parofisai vakaivolatabu. Ena vicasagavulu na yabaki tarava, era “vakayacora na ka ca e na lawa” o ira na meca ni Matanitu ni Kalou. Era vakararawataki ira tale ga na tacida, era biu e valeniveivesu, era vakaliligi, era vanalaki se musu na uludra.​—Same 94:20; Vkta. 12:15.

7. Na cava era lecava kina e levu na ibalebale ni veika era yaco tu nikua?

⁷ Levu na ivakadinadina e dusia ni sa tauyavu oti mai lomalagi na Matanitu ni Kalou, ia na cava era se sega ni vakabauta kina qori e levu? Na cava era sega ni sema rawa kina na ka e yaco tiko e vuravura kei na parofisai vakaivolatabu era kacivaka voli mai vakadede na dauveiqaravi ni Kalou? De dua e levu era sa kauaitaka tiko ga na ka e laurai. (2 Kor. 5:7) Nira nuiqawaqawataka vakalevu na ka e yaco tu nikua, vakacava era sa sega ni raica kina na ka e cakava tiko na Kalou? (Maciu 24:​37-39) De dua era vakasesei ena ivakavuvuli kei na ka e cakava tiko o Setani, se vakaevei? (2 Kor. 4:4) Ena vinakati dina na vakabauta kei na vuku vakalou me rawa nida kila kina na ka e cakava tiko na Matanitu ni Kalou. Eda kalougata nida rawa ni raica na ka dina era yaco tiko!

TOROSOBU TIKO GA NA ITUVAKI CA

8-10. (a) Sa vakayacori tiko vakacava na 2 Timoci 3:​1-5? (b) Na cava eda kaya kina ni sa torosobu tiko ga na ituvaki ca?

⁸ Qo na ikarua ni vuna eda vakadeitaka kina ni sa voleka me lewai vuravura na Matanitu ni Kalou: Sa qai torosobu tiko ga na nodra ivalavala na tamata. Sa voleka ni dua na senitiuri na kena vakayacori voli mai na 2 Timoci 3:​1-5. Sa takalevu e vuravura na itovo e vakamacalataki ena tikinivolatabu qori. Vakacava o vakadinata qori? Meda raica mada eso na kena ivakaraitaki.​—Wilika 2 Timoci 3:​1, 13.

⁹ Vakasamataka mada na ka e dau vakatabui tu ena veiyabaki ni 1940 se 1950 vakacaca qai raica vata kei na ka e yaco tu nikua ena noda vanua ni cakacaka, ena tabana ni veivakamarautaki, qito, isulusulu vovou kei na so tale. E takalevu nikua na ivalavala kaukaua kei na itovo vakasisila. Levu era veisisivitaka se o cei e kaukaua duadua, o cei e vakasisila duadua nona ivakarau ni bula se vakadomobula. Na porokaramu era dau okati mera ca ena tivi ena veiyabaki ni 1950 vakacaca, era sa okati tu nikua me veiganiti ina vuvale. Levu era raica ni sa qai takalevu ga na nodra ivakarau ni rai o ira na veimoceri vakamataqali vata ena tabana ni veivakamarautaki, isulusulu kei na so tale ra qai uqeta nodra ivakarau ni bula vei ira na lewenivanua. Eda kalougata dina nida kila na rai ni Kalou!​—Wilika Juta 14, 15.

¹⁰ Se ena rairai vakasamataka e dua na lotu vaKarisito na nodra itovo na itabagone e dau raici tu ena veiyabaki ni 1950 vakacaca me itovo ca kei na kena sa yaco tu nikua. Ena veiyabaki qori, era dau lomaleqataka na itubutubu ke ra vakatavako tiko na luvedra, gunu se danisi ena sala e veivagarogaroi. Nikua, sa matau na noda rogoca eso na ka vakadomobula: Dua na gone yabaki 15 e vanai ira nona lewenikalasi, e mate kina e le rua, era mavoa e le 13. Era mateni eso na itabagone, qai vakadomobula nodra labata e dua na goneyalewa yabaki ciwa, era mokulaki tamai yalewa kei na dua na wekana. Ena dua na vanua vakaEsia, e tukuni ni veimama ni basulawa e caka ena vanua ya ena loma ni tini na yabaki, era vakaitavi kina na itabagone. Vakacava o vakadeitaka ni sa qai torosobu tiko ga na bula?

11. Na cava era lecava kina e levu ni sa qai torosobu tiko ga na noda bula?

¹¹ E dina na ka e cavuta na yapositolo o Pita: “Nira na lako mai ena iotioti ni veisiga na dauveivakasewasewani ena nodra veivakasewasewani, era cakava ga na ka era vinakata ra qai kaya: ‘I vei na ka a yalataka? E sa tiko dina o koya? Mai na gauna era mate kina na tukada, e duadua tu ga na ka kece me vaka mai na gauna e buli kina na vuravura.’ ” (2 Pita 3:​3, 4) Na cava e va kina qori nodra rai eso? Eda na rairai sega ni kauaitaka vakalevu e dua na ituvaki ke sa matau vei keda. Kaya mada ke veisau vakasauri nona itovo e dua noda itokani, eda na rairai kurabuitaka sara ga. Ia ke veisau tiko vakamalua nodra itovo na kawatamata, eda na rairai sega ni kauaitaka sara. Koya gona, e vakadomobula na kena veisau vakamalua na itovo me lai ca sara.

12, 13. (a) Na cava me kua ni vakayalolailaitaki keda kina na veika era yaco tiko e vuravura? (b) Na cava meda vakadeitaka me rawa nida valuta na ituvaki “dredre”?

¹² E vakasalataki keda na yapositolo o Paula ni na “vakilai . . . e levu na ka dredre” ena “iotioti ni veisiga.” (2 Tim. 3:1) E sega ni kena ibalebale meda drotaka na ituvaki qori, ni tiko na ka eda rawa ni cakava kina. Ena veivuke i Jiova, na yalona tabu kei na ivavakoso vaKarisito, eda rawa ni valuta na yalolailai se na lomaleqa. Eda rawa ni yalodina tiko ga. Ena solia vei keda na Kalou na “kaukaua e uasivia na kaukaua ni tamata.”​—2 Kor. 4:​7-10.

¹³ Meda nanuma tiko ni a tekivutaka o Paula na parofisai me baleta na iotioti ni veisiga ena nona cavuta na vosa ‘mo kila qo.’ Na vosa qori e vakadeitaka ni na yaco dina na parofisai era cavuti tarava. Ena torosobu tiko ga nodra ivalavala na kawatamata era sega ni qarava na Kalou, me yacova ni yavala o Jiova me tinia. Era volatukutukutaka na daunitukutuku makawa ni gauna e torosobu kina na itovo savasava ena so na matanitu, ena kasura ga na matanitu qori. Dua na ka na torosobu ni itovo e vuravura nikua ni vakatauvatani ena gauna makawa. Levu era na rairai lecava na tikina qori, ia na veika vakatubuqoroqoro era yaco me tekivu mai na 1914, e dodonu me vakadeitaka vei keda ni sa voleka ni yavala na Matanitu ni Kalou.

ENA SEGA NI TAKALI NA ITABATAMATA QO

14-16. Na cava na ikatolu ni vuna eda vakadeitaka kina ni sa voleka ni “yaco mai” na Matanitu ni Kalou?

¹⁴ Qo na ikatolu ni vuna meda nuidei kina. Na veika e yacovi ira na dauveiqaravi ni Kalou e vakaraitaka ni sa voleka na icavacava. Kena ivakaraitaki, ni bera ni tauyavu e lomalagi na Matanitu ni Kalou, era gumatua ni qaravi Jiova ena yalodina e dua na ilawalawa lailai lumuti. A sega ni yaco ena 1914 na ka era namaka voli, ia na cava era qai cakava? Levu era yalodina tiko ga vei Jiova dina nira vakatovolei ra qai vakacacani. E veiyabaki, e levu​—se o ira kece​—na lumuti qori era rairai vakacavara na nodra bula e vuravura ena yalodina.

¹⁵ E kaya o Jisu ena nona parofisai matailalai me baleta na ivakataotioti ni veisiga: “Ena sega ni takali na itabatamata qo ena yaco mada e liu na ka kece qo.” (Wilika Maciu 24:​33-35.) Nona cavuta o Jisu na “itabatamata qo,” eda kila ni vakaibalebaletaka e rua na iwasewase ni lotu vaKarisito lumuti. Na imatai ni iwasewase era bula donuya na 1914, era kila tale ga na ivakatakilakila ni nona sa tiko o Karisito ena yabaki ya. Era sega wale ga ni bula donuya na 1914, era lumuti tale ga ena yalo tabu ni bera se donuya na yabaki qori.​—Roma 8:​14-17.

¹⁶ O ira era ikarua ni iwasewase ni “itabatamata qo” era bulavata mai ena dua na gauna kei ira na lumuti era okati ena imatai ni iwasewase. Era sega wale ga ni bulavata mai kei ira na lumuti ena imatai ni iwasewase, ia era lumuti ena yalo tabu ena gauna era se bula tiko kina e vuravura na imatai ni iwasewase. Kena ibalebale, e vica ga na lumuti nikua era wili tiko ena “itabatamata qo” e cavuta o Jisu. Nikua, era sa qase sara o ira era lewe ni ikarua ni iwasewase. Ia e vakanuideitaki keda na vosa i Jisu ena Maciu 24:​34, ni na “sega ni takali [eso] na itabatamata qo” ni bera ni tekivu na veivakararawataki levu. Qo e dodonu me vakadeitaka vei keda ni sa voleka sara ni yavala na Tui ni Matanitu ni Kalou me vakarusa na veika ca me qai kauta mai na vuravura vou ni yalododonu.​—2 Pita 3:13.

VOLEKA ME VAKACAVARA O KARISITO NONA RAVURAVU

17. Na cava eda vulica mai na tolu na ivakadinadina eda sa veivosakitaka mai?

¹⁷ Na cava eda sa vulica ena tolu na ivakadinadina eda veivosakitaka mai? E vakasalataki keda o Jisu nida sega ni kila na siga se na aua ena yaco kina na icavacava. (Maciu 24:36; 25:13) Ia e tukuna o Paula ni sa “voleka . . . na gauna meda vakabulai kina.” (Wilika Roma 13:11.) Eda bula donuya tu qo na iotioti ni veisiga. Ke da kauaitaka vakabibi na parofisai vakaivolatabu kei na ka erau cakava tiko na Kalou o Jiova kei Jisu Karisito, eda na raica na ivakadinadina nida sa volekata na icavacava ni ituvaki qo.

18. Na cava ena yaco vei ira era sega ni via vakabauta ni sa Tui o Jisu Karisito?

¹⁸ O ira na sega ni via vakabauta ni sa soli na lewa vei Jisu Karisito, na Dauvodo ose qaqa ena ose vulavula, sa voleka na gauna mera liaca kina ni cala nodra rai. Era na sega ni dro rawa. Ena gauna qori, e levu era na tagi ena domobula ena nodra kaya: “O cei ena tudei rawa?” (Vkta. 6:​15-17) Ena saumi qori ena wase 7 ni Vakatakila. Ena gauna qori, na Kalou ena vakadonui ira na lumuti kei ira era nuitaka na bula e vuravura. Ni oti ga qori era na bula sivita yani na veivakararawataki levu na “isoqosoqo levu.”​—Vkta. 7:​9, 13-15.

19. Eda vakabauta ni sa voleka na icavacava, ia cava o nuitaka tu ni na yaco?

¹⁹ Nida vakasamataka tiko ga na parofisai vakaivolatabu sa vakayacori ena gauna vakatubuqoroqoro qo, ena sega ni vakawelei keda na vuravura i Setani, se meda lecava na ibalebale dina ni veika e yaco tiko e vuravura. Sa voleka me vakacavara o Karisito nona ravuravu ena ituvaki ca qo ena iotioti ni valu ni yalododonu. (Vkta. 19:​11, 19-21) Vakasamataka mada na marau eda na vakila ena gauna sa oti kina qori!​—Vkta. 20:​1-3, 6; 21:​3, 4.