SAUMI NA TARO VAKAIVOLATABU

E vosa dina ni Kalou na iVolatabu, na cava nomu rai?

Eda namaka me duatani duadua na Vosa ni Kalou. Sa sivia e bilioni vakacaca na kena itabataba sa tabaki oti ena drau vakacaca na vosa. Na ivakasala vuku e tu kina e rawa ni veisautaki keda.​—Wilika 1 Cesalonaika 2:13; 2 Timoci 3:16.

Eda kila ni vakavuna na Kalou na iVolatabu, ni tukuna vakamatata na veika e se bera ni yaco. Eda sega ni cakava rawa ya na tamata. Kena ivakaraitaki, a kune ena dua na qaravatu volekata na Waitui Mate na ivola i Aisea, e volai ena dua na senitiuri ni bera ni sucu o Jisu. E tukuni kina ni na sega ni tawani tale na siti o Papiloni. A qai yaco na parofisai qo ni sa oti e vica na yabaki nona cakacaka vakaitalatala e vuravura o Jisu.​—Wilika Aisea 13:​19, 20; 2 Pita 1:​20, 21.

E volai vakacava na iVolatabu?

E sivia na 1,600 na yabaki na kena volai na iVolatabu. Era rairai vola e 40 na tagane, ia e duavata na ka era vola qai sega ni veisaqasaqa. E rawa vakacava ya? E dusimaka na Kalou na nodra volavola.​—Wilika 2 Samuela 23:2.

E dau vakayagataka na raivotu, na tadra kei ira na agilosi, me vosa kina vei ira na vola na iVolatabu. E biuta na Kalou ena nodra vakasama na nona nanuma sa qai vakatau vei ira na volavola mera vakasavuya vakacava na itukutuku ni Kalou.​—Wilika Vakatakila 1:1; 21:​3-5.