O BAU KILA?

Ena gauna vakaivolatabu, cava na ibalebale ni nona dresulaka na nona isulu e dua?

E VAKAMACALATAKA na iVolatabu eso na ituvaki era dau dresulaka kina na nodra isulu eso. Ena rairai malewa vei keda ena gauna qo, ia vei ira na Jiu, qori e vakaraitaka na ivakarau ni lomadra, vakabibi ena gauna era yalolailai kina, lolosi, madua, cudru se nira vakaloloku.

Kena ivakaraitaki, a “dresulaka na nonai sulu” o Rupeni ena nona sega ni vakabulai Josefa na tacina ni sa volitaki oti me bobula. O tamadratou, o Jekope a “dresulaka nonai sulu” ni nanuma ni vakamatei Josefa e dua na manumanu kila. (Vkte. 37:​18-35) Ni tukuni vei Jope ni ratou mate kece na luvena, a “dresulaka na nonai sulu.” (Jope 1:​18-20) A gole vei Ilai na Bete Levu e dua na italai e “sa kadresu na nonai sulu” me vakasavuya nira sa druka na Isireli ena ivalu, rau mate tale ga na luvei Ilai, qai butakoci na kato ni veiyalayalati. (1 Sam. 4:​12-17) Ni wiliki vei Josaia na Lawa, a “dresulaka sara na nona isulu” ni liaca na nodra cala na nona tamata.​—2 Tui 22:​8-13.

Ena veilewai i Jisu, a “dresuka nona isulu e sau” na Bete Levu o Kaiava ena nona nanuma cala ni tauca o Jisu na vosa ni veibeci vua na Kalou. (Maciu 26:​59-66) E nodra ivakarau na rapai mera dresulaka na nodra isulu ke ra rogoca ni vosavakacacataki na yaca ni Kalou. Ia e dua tale nodra rai na rapai a basika ena veiyabaki ni oti na kena vakarusai na valenisoro e Jerusalemi, e tukuni kina ni “o koya e rogoca ni vosavakacacataki na yaca ni Kalou, e sega ni vinakati me dresulaka na nona isulu, de qai lai yaco na isulu qori me tikitiki ni isulu.”

Ia ena sega ni vakaibalebale vua na Kalou na nona dresulaka na nona isulu e dua, vakavo ke vu dina mai lomana na nona rarawa. E tukuna gona o Jiova vei ira nona tamata mera ‘dresulaka na lomadra, kua ni dresulaka na nodrai sulu, mera lesu vei Jiova.’​—Joeli 2:13.