O Vakavinavinakataka Nona Dau Vakaraici Keda o Jiova?

1, 2. E duidui vakacava na nona vakaraici keda o Jiova ni laurai vata kei na itaba e dau vakaraica vakamatailalai na ka?

E DAU vakayagataki ena levu na vanua na itaba me vakaraica na veitosoyaki ni motoka, me tabaka tale ga na coqa. Ke tabaka na itaba na nona laucoqa e dua qai dro o draiva, ena rawa ni vukei ira na ovisa na itaba ya me vesu kina o draiva. Io, nira tu ena veivanua na itaba, sa na dredre sara meda drotaka na itotogi ni ka eda cakava.

² Ia e dodonu beka meda lai nanuma ni Tamada dauloloma o Jiova e vaka na itaba e vakayagataki vakalevu me dau vakaraica na ka kece e caka? Na iVolatabu mada ga e tukuna ni tu na matana ena “veiyasana kecega.” (Vkai. 15:3) Ia vakacava e vakaraitaka qori ni dikeva tiko ga vakamatailalai o koya na veika eda cakava? E vakaraici keda tu ga meda muria na nona lawa qai totogitaki keda nida sega ni muria? (Jere. 16:17; Iper. 4:13) Sega! E vakaraici keda ni lomani keda dina qai kauaitaka vakalevu na noda bula.​—1 Pita 3:12.

3. Na cava na lima na sala e vakaraici keda kina na Kalou ena vuku ni nona loloma?

³ E dau vakaraici keda o Jiova ni lomani keda, ia eda na kila vakacava qori? E cakava qori ni (1) vakasalataki keda ni bera nida caka ca, (2) vakadodonutaki keda nida butu cala, (3) dusimaki keda ena ivakavuvuli ena nona Vosa, (4) vukei keda nida sotava na veivakatovolei, (5) vakalougatataki keda ni raica na ka vinaka eda cakava.

VEIVAKASALATAKI O JIOVA

4. Na cava na inaki ni nona vakasalataki Keni o Jiova ena nona tukuna ni ‘toka mai katuba’ na ivalavala ca?

⁴ Kena imatai, meda dikeva mada nona vakasalataki keda na Kalou ni sa tekivu buroro e lomada na ka ca. (1 Vei. 28:9) Me rawa nida kila ni dau vakaraici keda o Jiova ena vuku ni nona loloma, dikeva mada na ka e cakava vei Keni ena nona “cudru vakalevu” ni sega ni vakadonui koya na Kalou. (Wilika Vakatekivu 4:​3-7.) E uqeti Keni o Jiova me “caka vinaka,” ke sega, e vakasalataki koya ni sa na ‘toka mai katuba na ivalavala ca.’ E tukuna vua o Jiova: “Ko na lewai koya talega.” A vinakata o Jiova me muria o Keni na nona veivakasalataki me rawa ni ‘ciqomi’ kina. Ke muria o Keni na ivakasala qori, ena vinaka tiko ga na nona veiwekani kei na Kalou.

5. E dau vakasalataki keda vakacava o Jiova meda qarauna na gagadre ca e rawa ni buroro e lomada?

⁵ Vakacava o keda nikua? O Jiova e rai basikata na lomada; e sega ni vunitaki rawa vua na inaki dina ni lomada kei na ka e uqeti keda. E vinakata na Tamada dauloloma meda muria na sala ni yalododonu; ia e sega ni vakasaurarataki keda meda veisau. E vakayagataka nona Vosa, na iVolatabu, me vakasalataki keda nida mua tiko ina vanua cala. E cakava vakacava qori? Ena noda wili iVolatabu e veisiga, eda dau wilika kina e dua na tikinivolatabu ena vukei keda meda valuta na noda gagadre se ivakarau ca. E vakamatatataki tale ga ena noda ivola vakaivolatabu eso na noda malumalumu qai vakaraitaka na sala meda valuta kina. Eda rogoca tale ga ena soqoni vakaivavakoso na ivakasala e tau ena kena gauna donu!

6, 7. (a) Na cava e rawa ni tukuni kina ni ivakaraitaki ni yalololoma i Jiova na isolisoli vakayalo e vakarautaki vei ira na vica vata na milioni? (b) Ena yaga vakacava na nona kauaitaki keda vakayalololoma o Jiova?

⁶ Na ivakasala va qori e ivakaraitaki dina ni nona vakaraici keda vakayalololoma o Jiova. Sa vica vata na senitiuri na noda vakayagataka voli mai na iVolatabu, e vakarautaka na isoqosoqo na ivola vakaivolatabu me baleti ira na vica vata na milioni, na ivakasala tale ga e vakarautaki ena soqoni e yaga ina ivavakoso kece. Ia ena ituvaki kece qori, e vakayagataka o Jiova na nona vosa me dusimaki iko me rawa ni o veisautaka na inaki ni lomamu. Eda rawa gona ni tukuna ni qori e ivakaraitaki ni nona taqomaki iko vakayalololoma o Jiova.

⁷ Me rawa ni yaga vei keda na veivakasalataki ni Kalou, e dodonu meda kila taumada ni kauaitaki keda dina o koya. Meda muria tale ga na nona Vosa, saga meda cavuraka laivi na vakanananu e sega ni taleitaka na Kalou. (Wilika Aisea 55:​6, 7.) Ke da muria na ivakasala, eda na sega ni sotava na rarawa. Ia vakacava ke da sikalutu ena gagadre ca. Na veivuke cava e vakarautaka na Tamada dauloloma?

VEIVAKADODONUTAKI NA TAMADA YALOLOLOMA

8, 9. E laurai vakacava na levu ni nona kauai o Jiova ni vakayagataki ira eso mera veivakasalataki? Tukuna e dua na ivakaraitaki.

⁸ Nida vakadodonutaki, qori e ivakaraitaki ni nona kauai o Jiova. (Wilika Iperiu 12:​5, 6.) Eda sega ni dau taleitaka meda vakasalataki se vakadodonutaki. (Iper. 12:11) Ia e vinaka mo kila na ka ena vakasamataka e dua e via veivakasalataki. Ena vinakati vua me kila ni ka eda cakava tiko ena vakaleqa noda veiwekani kei Jiova, ena kauaitaka na ivakarau ni lomada, ena tu vakarau tale ga me vakayagataka nona gauna kei na nona vinaka kece me vakamacalataka mai na iVolatabu na sala meda veisautaka kina na noda bula me marau kina na Kalou. Ia e kauai sara vakalevu o Jiova, ni o koya ga e vakarautaka na ivakasala va qori.

⁹ Dikeva mada na sala era vakatotomuria kina nona kauai na Kalou o ira na dauniveivakasalataki nikua. Ni bera ni gole mai ina dina e dua na tacida, e sarava wasoma na iyaloyalo vakasisila, ia a qai tagutuva na itovo ya. Ia e se tiko voli ga vua na gagadre ya, vaka ga na qilaiso katakata. Ena gauna sa dua kina nona mobail vou, e vakabulabulataki tale na gagadre ca ya. (Jeme. 1:​14, 15) E vakayagataka nona talevoni me gole ena Internet qai sara iyaloyalo vakasisila. Ena dua na siga, ni vunau tiko ena talevoni, e solia na nona talevoni vua e dua na qase ni vavakoso me raica kina eso na naba ni talevoni. Ni vakayagataka na qase na nona talevoni, e raica kina eso na site ni iyaloyalo vakasisila. E kalougata dina na tacida ya ni a raica qori na qase mani vakasalataki koya ena kena gauna donu. E yaga sara vua na ivakasala, mani tagutuva na nona ivakarau ca. Eda vakavinavinakataka na Tamada dauloloma ni raica na ivalavala ca e caka lo qai vakadodonutaki keda ni bera ni vakaleqai vakadua na noda veiwekani kei koya!

DUSIMAKI KEDA NA IVAKAVUVULI VAKAIVOLATABU

10, 11. (a) Eda na vakaraitaka vakacava nida vinakata na veidusimaki ni Kalou? (b) E yaga vakacava ena dua na vuvale nodratou muria na veidusimaki i Jiova?

¹⁰ E seretaka vei Jiova na daunisame: “O ni na tuberi au e na nomuni lewa [se ivakasala].” (Same 73:24) Ena gauna kece eda vinakata kina na veidusimaki, eda rawa ni “vakarogotaka” vei Jiova nida dikeva na nona Vosa meda kila na nona rai me baleta na ituvaki eda sotava. Ena yaga ena noda bula vakayalo noda muria na ivakavuvuli vakaivolatabu, ena vukei keda tale ga ena so na gauna ena kena vakarautaki na veika eda gadreva vakayago.​—Vkai. 3:6.

¹¹ E laurai nona dau veidusimaki o Jiova ena ka e sotava e dua na dauteitei e saumi qele ena veidelana na Masbate ena Yatu Filipaini. E painia tudei o koya kei watina rau qai vakavuvale levu. Erau kidacala ena dua na siga, ni sa solia vei rau na itaukeiniqele e dua na notisi me ratou sa vagalala. Eratou beitaki vakailasu ni ratou cakacaka vakailawaki. E lomaleqataka na tacida na vanua me ratou na lai tiko kina, ia e tukuna ga: “O Jiova ena qai vakarautaka. Se mani cava e yaco, e dau vakarautaka o koya na veika keitou gadreva.” E sega ni vakanuinuikara na tacida ya. Ena vica tale na siga tarava, ratou marautaka ni tukuni vei ratou ni na sega ni vinakati me ratou biubiu. Na vuna? E raica na itaukeiniqele ni gauna mada ga ratou beitaki kina vakailasu, ratou veidokai qai veiyaloni tiko ga ni dusimaki ratou na ivakavuvuli vakaivolatabu. Qori e tarai koya sara ga na itaukeiniqele, mani vakadonuya me ratou tiko ga qai solia vei ratou eso tale na qele me ratou teitei kina. (Wilika 1 Pita 2:12.) Io, e dusimaki keda o Jiova ni vakayagataka na nona Vosa me vukei keda meda valuta kina na dredre ni bula ni veisiga.

ITOKANI E VEIVUKE NIDA VAKATOVOLEI

12, 13. Na ituvaki cava e rawa nira nanuma kina eso ni sega ni raica na Kalou na nodra rarawa?

¹² Ia ena so na gauna, e sega ni dau oti rawa eso na ituvaki dredre eda sotava. Eda rairai vosota voli e dua na mate bibi, era veitusaqati na wekada voleka se da sotava na veitusaqati ena dua na gauna balavu. E dau vakararawataki keda tale ga ena so na gauna na ka era cakava na tacida ena loma ni ivavakoso.

¹³ Kena ivakaraitaki, o rairai rarawataka na ka e tukuna vei iko e dua na tacimu vakayalo. De dua o na kaya: ‘Qo e sega ni dodonu me yaco ena loma ni isoqosoqo!’ Ia na tacimu a tukuna na vosa ya e vakacolati ena itavi bibi ena ivavakoso, de dua e dokai vakalevu. O na vakasamataka: ‘Au sega sara ga ni vakabauta. E raica o Jiova na ka e yaco tiko? Ena cakava kina e dua na ka?’​—Same 13:​1, 2; Apak. 1:​2, 3.

14. Na cava e dua na vuna e sega ni dau curu takoso kina o Jiova ni basika na leqa?

¹⁴ E rairai tiko na vuna vinaka e sega kina ni cakava e dua na ka o Jiova. Kena ivakaraitaki, de dua o nanuma ni cala na tacimu ya, ia na Kalou ena rairai duatani na nona raica na ituvaki. Mai na nona rai na Kalou, de dua o beitaki tale ga ena vuku ni ituvaki ya. De dua o na rarawataka na vosa e tukuni vei iko, ia qori e ivakasala taudonu e dodonu mo vakasamataka tale. A tukuna o Brother Karl Klein, a lewena tu na iLawalawa Dauvakatulewa, ni a vakadodonutaki koya ena dua na gauna o Brother J. F. Rutherford. Ena dua na gauna e muri, a kidavaki Brother Klein o Brother Rutherford, qai kaya: “Bula, Karl!” Ia e sega ni sauma ena yalovinaka o Brother Klein ni se mositi koya tu ga na vosa kaukaua a tau vua. Ni kila o Brother Rutherford ni se ca tiko ga na loma i Brother Klein, e vakasalataki koya me qarauna me kua ni sikalutu ena dai ni Tevoro. A qai vola e muri o Brother Klein: “Ke da levataka e dua na tacida e tu vua na dodonu me veivakasalataki, e rawa nida sikalutu kina vakarawarawa ena dai ni Tevoro.”a

15. Na cava meda nanuma tiko nida sotava na ituvaki dredre?

¹⁵ Ia e rawa nida vuturi ena so na gauna ni sa balavu tale noda vosota voli na ituvaki dredre. E rawa vakacava nida vosota? Kaya mada ni o draiva tiko ena gaunisala levu qai berabera nomu veitosoyaki ni osooso na gaunisala. O sega ni kila se na vakacava na kena dede. Ke o vuturi qai saga mo muria e dua tale na gaunisala, o rawa ni lai sese. Ena rawa ni balavu tale na gauna e taura mo qai yacova na vanua o gole kina me vakatauvatani kei na nomu a muria tiko ga na gaunisala osooso ya. E tautauvata sara ga qori kei na noda kabita tiko ga na ivakavuvuli ena Vosa ni Kalou, ni toso na gauna eda na yacova na vanua eda sasaga tiko kina.

16. Na cava e dua tale na vuna ena rairai sega ni curu takoso kina o Jiova nida sotava na veivakatovolei?

¹⁶ De dua ena sega ni curu takoso o Jiova me vukei keda baleta ni vinakata meda vakavulici ena ituvaki ya. (Wilika 1 Pita 5:​6-10.) E sega ni dau vakavuna na Kalou na veivakatovolei. (Jeme. 1:13) ‘Na keda meca, na Tevoro’ e vakavuna tiko e levu na leqa. Ia na Kalou e rawa ni vakayagataka na ituvaki dredre meda tubu kina vakayalo. E kila na noda rarawa, ia ena raica me ‘lekaleka’ ga qori “ni kauaitaki” keda. O dau vakavinavinakataka na nona raici keda vakayalololoma o Jiova nida sotava na ituvaki dredre, o qai vakadeitaka ni na vakarautaka na sala meda vakabulai kina?​—2 Kor. 4:​7-9.

VEIVAKALOUGATATAKI I JIOVA

17. Na cava e dikeva kina o Jiova na lomada?

¹⁷ Kena ilutua, na Kalou e dikeva na lomada me raica se o cei e lomani koya dina. E tukuna na parofita o Anani vei Tui Asa: “Sa veiraiyaki na mata i Jiova e vuravura taucoko, me totaki ira vakaidina sa dodonu na lomadra vua.” (2 Vei. 16:9) A raica na Kalou ni sega ni dodonu se taucoko na loma i Asa, ia ena “totaki” iko ke o cakava tiko ga na ka e dodonu.

18. Na cava mo nanuma tiko me baleti Jiova ke o raica ni sega ni kauaitaki na ka vinaka o cakava? (Raica na imatai ni iyaloyalo.)

¹⁸ E taleitaka na Kalou meda “vakasaqara na ka vinaka,” meda “vinakata na ka vinaka,” da qai “caka vinaka” me rawa ni ‘lomani’ keda. (Emosi 5:​14, 15; 1 Pita 3:​11, 12) O Jiova e vakaraici ira na yalododonu qai vakalougatataki ira. (Same 34:15) Vakasamataka mada na nodrau ivakaraitaki na yalewa Iperiu o Sifira kei Pua, erau dauveivakasucumi. Nira tu vakabobula e Ijipita na Isireli, a vakarota o Fero mera vakamatei na gonetagane Iperiu ena gauna era sucu kina. Ia o rau na marama qo rau a rerevaka vakalevu na Kalou, sega ni o koya a solia na ivakaro ya. Na nodrau lewaeloma e dusimaki vakalou e uqeti rau me rau vakabulai ira na gonetagane era se qai sucu ga. Ena dua na gauna e muri, a qai ‘vakalougatataki rau o Jiova me rau vakavuvale.’ (Lako 1:​15-17, 20, 21) E raica o Jiova na ka vinaka rau cakava. Eda na rairai vakila ena so na gauna ni sega ni kauaitaki na ka vinaka eda cakava. Ia e kauaitaka o Jiova. E raica na ka vinaka kece eda cakava qai vakalougatataki keda.​—Maciu 6:​4, 6; 1 Tim. 5:25; Iper. 6:10.

19. A qai kila vakacava e dua na tacida yalewa ni raica tu o Jiova na ka vinaka eda cakava?

¹⁹ E vakadinadinataka e dua na tacida yalewa mai Austria ni raica tu o Jiova na ka vinaka eda cakava. Me vaka ni marama ni Hungary, a kerei o koya me lai raica e dua e vosataka na vosa vakaHungary ena cakacaka vakaitalatala. A gole sara ena itikotiko qori, ia a sega ni dua e tiko e vale. E lesuva tiko e veigauna na itikotiko ya. So na gauna e kidava ni vaka e dua e tiko e vale, ia e sega ni dolava mai na katuba. Sa qai dau biuta tu eso na ivola vakaivolatabu, eso na ivola e vola sara ga o koya, nona naba ni talevoni kei na so tale. Ni oti e dua veimama na yabaki nona dau gole tiko ena itikotiko ya sa qai dola na katuba! E kidavaki koya mai e dua na marama dauveikauaitaki, qai kaya: “Ni curu mai. Au wilika na ivola kece o biuta tu, au qai waraka na gauna tarava o na gole mai kina.” Na marama qo a qaravi tiko vakavuniwai, a sega kina ni via veitalanoa kei na so tale. Tekivutaki sara na vuli iVolatabu. Io, e vakalougatataka dina na Kalou na nona gugumatua na tacida yalewa qo!

20. Na cava o nanuma me baleta na nona dau vakaraici keda vakayalololoma o Jiova?

²⁰ E raica o Jiova na ka kece o cakava, ena sauma tale ga. Me kua vakadua nida nanuma ni nona dau vakaraici keda na Kalou e vaka e dua na itaba e dau raica vakamatailalai na ka e dau caka. Ia e dodonu me vakavolekati iko ga vua na Kalou dauloloma, ni kauaitaki iko dina!