SAUMI NA TARO VAKAIVOLATABU

Na cava meda masu kina?

E vinakata na Kalou o Jiova meda dau talaucaka vua na lomada. (Luke 18:1-7) Ena rogoca na ka eda tukuna ni kauaitaki keda. Ni sureti keda gona na Tamada vakalomalagi meda masuti koya, cava meda kua kina ni ciqoma nona veisureti?—Wilika Same 62:8; Filipai 4:6.

Na masu e sega wale ga ni sala meda kere veivuke kina, ia ena vakavolekati keda vua na Kalou. (Same 8:3, 4) Ni wasoma gona noda talaucaka vua na lomada, ena vaqaqacotaka noda veiwekani kei koya.—Wilika Same 145:18; Jemesa 4:8.

Meda masu vakacava?

E sega ni bibi vua na Kalou meda vakaiukuukutaka noda masu se cavuqaqataka e dua na ivakarau ni masu. E sega tale ga ni tukuni meda muria e dua na kena ivukivuki, idabedabe se duriduri. E bibi ga vua meda masuti koya mai vu ni lomada. (Maciu 6:7) Kena ivakaraitaki ena nodra gauna na Isireli, a masulaka o Ana na leqa e vakila nona vuvale. A qai vakavinavinakataki Jiova mai vu ni lomana ni saumi nona masu.—Wilika 1 Samuela 1:10, 12, 13, 26, 27; 2:1.

Na masu e dua dina na isolisoli yaga! Eda rawa kina ni talaucaka na lomada vua na Dauveibuli. Rawa tale ga meda lagiti koya qai vakavinavinakataki koya ena veika sa vakayacora ena vukuda. Meda kua mada ga ni vakawaletaka na isolisoli vinaka qori.—Wilika Same 145:14-16.