Era “Vakanadakuya na iValavala Tawadodonu” na Dauveiqaravi i Jiova

1. Na cava e bibi ena noda sokalou?

VAKACAVA ke o raica na yaca i Jiova me ceuti tu ena dua na vale se dua na iyaya ena vale ni iyau maroroi? De dua o na kauaitaka vakalevu. Na yaca tale ga ni Kalou e bibi ena noda sokalou—nida iVakadinadina i Jiova! E sega ni dua tale na isoqosoqo e vuravura nikua me vakatokayacataki ena yaca ni Kalou ni vakatauvatani kei keda. Ia eda kila ni tiko na itavi meda qarava nida vakatokayacataki ena yaca ni Kalou.

2. E ka dokai meda vakatokai ena yaca ni Kalou, ia na cava ena okati kina?

² Nida vakayagataka na yaca ni Kalou, e sega ni kena ibalebale ni vakadonui keda o Jiova. Ena vinakati meda muria nona ivakatagedegede savasava. Oya na vuna e uqeti keda kina na iVolatabu meda ‘gole tani mai na ka ca.’ (Same 34:14) E vakamatatataka na ivakavuvuli qori na yapositolo o Paula ena nona vola: “Mera vakanadakuya na ivalavala tawadodonu o ira kece era kaciva na yaca i Jiova.” (Wilika 2 Timoci 2:19.) Nida nona iVakadinadina, eda kilai levu nida dau kaciva na yaca i Jiova. Ia eda na vakanadakuya vakacava na ivalavala tawadodonu?

“LAKO TANI” MAI NA CA

3, 4. Na tikinivolatabu cava era vaqaqa voli na vuku ni iVolatabu, cava na vuna?

³ Vakasamataka mada na vosa i Paula ena 2 Timoci 2:19. E tukuni kina na ‘yavu dei ni Kalou,’ oti sa qai cavuti e rua na yatuvosa. Na kena imatai, “O Jiova e kilai ira na nona tamata,” e lavetaki qori mai na Tiko Voli Mai na Lekutu 16:5. (Raica na ulutaga sa oti.) Na ikarua ni yatuvosa, “Mera vakanadakuya na ivalavala tawadodonu o ira kece era kaciva na yaca i Jiova.” Sa dede nodra vaqaqa voli mai na vuku ni iVolatabu na ikarua ni yatuvosa qori. Na cava na vuna?

⁴ E laurai ena vosa e vakayagataka o Paula ni lavetaka qori mai na dua tale na vanua. Ia e sega ni bau laurai ena iVolatabu vakaIperiu na yatuvosa qori. Na cava gona e vakaibalebaletaka tiko o Paula ena nona kaya: “Mera vakanadakuya na ivalavala tawadodonu o ira kece era kaciva na yaca i Jiova”? Ia ni bera ni vola o Paula na yatuvosa qori, a lavetaka tiko na nona volavola ena Tiko Voli Mai na Lekutu wase 16, e dusia tiko na veivorati i Kora. Vakacava e dusia tale ga na veivorati i Kora na ikarua ni yatuvosa e cavuta o Paula?

5-7. Na cava e yaco ena gauna i Mosese e vakaibalebaletaki tiko ena vosa i Paula ena 2 Timoci 2:19? (Raica na imatai ni iyaloyalo.)

⁵ E tukuna na iVolatabu ni o rau na luvei Iliapi o Tecani kei Epairami, erau tokoni Kora na nodra iliuliu na dauveivorati ena nodrau saqati o Mosese kei Eroni. (Tiko 16:1-5) Era beci Mosese e matanalevu, era bese ni vakamalumalumu ena nona veiliutaki lesi vakalou. Ia era bula maliwai ira voli ga na tamata ni Kalou, e ririkotaki kina nodra bula vakayalo na dausokalou yalodina. Sa qai vakaduiduitaki ira nona dausokalou yalodina o Jiova kei ira na dauveivorati, e cavuta tale ga kina e dua na ivakaro matata.

⁶ E tukuni ena iVolatabu: “A sa kaya vei Mosese ko Jiova, Mo vosa vei ira nai soqosoqo, ka kaya, Dou lako tani sara mai na veiyasana ni vale i Kora, kei Tecani, kei Epairami. Sa qai cavutu ko Mosese, ka lako vei Tecani kei Epairami; a ra sa muri koya ko ira na qase ni Isireli. A sa vosa ko koya vei ira nai soqosoqo, ka kaya, Dou lako tani mada mai na nodra veivale laca na tamata ca oqo, ka kakua ni tara e dua na nodra ka, de dou vakarusai e na vuku ni nodrai valavala ca. A ra sa lako tani kina mai na veiyasana ni vale i Kora, kei Tecani, kei Epairami.” (Tiko 16:23-27) O Jiova sa qai vakamatei ira kece era talaidredre. Ia era vakabulai na dausokalou yalodina nira lako tani mai na ivalavala tawadodonu.

⁷ E dau dikeva na lomada o Jiova! E raica na nodra yalodina na nona dauveiqaravi. Ia e bibi tale ga mera lako tani vei ira na tamata ca. Koya gona, na nona vola o Paula: “Mera vakanadakuya na ivalavala tawadodonu o ira kece era kaciva na yaca i Jiova,” a rawa ni dusia na italanoa ena Tiko Voli Mai na Lekutu 16:5, 23-27. Qori e salavata vinaka sara ga kei na ka e cavuta e liu o Paula: “O Jiova e kilai ira na nona tamata.”—2 Tim. 2:19.

‘MO CATA NA VEILETI VAKALIALIA E SEGA NI VAKAIBALEBALE’

8. Na cava e sega ni vinakati wale ga kina meda vakayagataka na yaca ni Kalou se lewena na ivavakoso vaKarisito?

⁸ Nona cavuta o Paula na ka e yaco ena gauna i Mosese, e uqeti Timoci tiko me gumatua ni taqomaka nona veiwekani talei kei Jiova. Kena ibalebale, e sega ni vinakati meda lewena wale ga na ivavakoso vaKarisito, me vaka ga nodra sega ni cavuta wale na yaca i Jiova na dausokalou ena gauna ni Mosese. Ena vinakati mera gumatua na dausokalou yalodina mera “vakanadakuya na ivalavala tawadodonu.” Na cava gona ena vinakati vei Timoci? Na cava eda vulica nikua na dauveiqaravi ni Kalou ena ivakasala i Paula?

9. E vakaleqa vakacava na ivavakoso taumada na ‘veileti vakalialia e sega ni vakaibalebale’?

⁹ E vakamatatataka na Vosa ni Kalou na ivalavala tawadodonu mera vakanadakuya se cata na lotu vaKarisito. Kena ivakaraitaki, ena veitikina yavolita ni 2 Timoci 2:19, e tukuna o Paula vei Timoci me “kua ni veiletitaka na vosa,” me ‘biuta tani tale ga na veivosaki tawayaga.’ (Wilika 2 Timoci 2:14, 16, 23.) Eso na lewe ni ivavakoso era uqeta tiko na nodra ivakavuvuli na vukitani. Eso tale era vakatavulica na ivakavuvuli e vakavu lomatarotaro. Ke sega mada ga ni veisaqasaqa sara kei na ivakavuvuli vakaivolatabu, ena vakavu veisei ga qori ena ivavakoso. E yaco kina na veiba kei na veileti, vakavuna me sega ni vinaka na ituvaki vakayalo. A vakabibitaka kina o Paula ni bibi mera ‘cata na veileti vakalialia e sega ni vakaibalebale.’

10. Na cava meda cakava ena nodra veivakamuai na vukitani?

¹⁰ Nikua, ena sega soti nira vakila na dauveiqaravi ni Kalou nodra veivakamuai na vukitani ena ivavakoso. Ia nida raica na ivakavuvuli e sega ni vakaivolatabu, e dodonu meda cata matua se mani vanua cava e kau mai kina. E sega ni ka vakayalomatua meda veileti kei ira na vukitani nida sotavi ira, biuta noda ivakamacala ena ka era vola ena Internet se so tale na sala ni veitaratara. Ke da nanuma meda cakava qori ena inaki vinaka, na veivosaki qori ena veisaqasaqa ga kei na ivakasala vakaivolatabu eda sa dikeva mai. Nida dauveiqaravi ni Kalou eda na cata sara ga na vukitani.

11. Na cava e rawa ni vakavuna na ‘veileti vakalialia’? Mera ivakaraitaki vinaka vakacava na qase ni ivavakoso?

¹¹ So tale na ka e rawa ni vakaleqa na duavata ni ivavakoso. Kena ivakaraitaki, na duidui rai me baleta na ka ni veivakamarautaki e rawa ni lai tini ena ‘veileti vakalialia e sega ni vakaibalebale.’ Ia ke dua e uqeta na ka ni veivakamarautaki e beci kina na ivakatagedegede savasava i Jiova, mera kua ni raica vakamamada qori na qase ena nodra nanuma ni na sega ni yaco kina na veileti. (Same 11:5; Efeso 5:3-5) Ia mera qarauna na qase mera kua ni vakatavuvulitaka ga nodra rai. Era na yalodina ni muria na ivakasala vakaivolatabu e tataunaki vei ira na ivakatawa: “Moni vakatawa na qelenisipi ni Kalou oni lesi moni qarava, . . . ni kua ni vakacolasau vei ira e taukeni ira na Kalou, moni nodra ivakaraitaki ga na qelenisipi.”—1 Pita 5:2, 3; wilika 2 Korinica 1:24.

12, 13. (a) Na cava era na cakava na iVakadinadina i Jiova ena ka e vauca na ka ni veivakamarautaki? Na ivakavuvuli vakaivolatabu cava meda muria? (b) E yaga vakacava ena so tale na basoga ni noda bula na ivakavuvuli ena parakaravu 12?

¹² Na isoqosoqo e sega ni dikeva vakamatailalai na iyaloyalo, qito ena vidio, ivola se sere e dodonu meda qaqarauni kina. Na vuna? E uqeti keda yadua na iVolatabu meda vakavulica na noda “vakasama me vakaduiduitaka na ka e donu mai na ka e cala.” (Iper. 5:14) Na iVolatabu e vakarautaka na ivakavuvuli rawarawa me vakalewa kina e dua na lotu vaKarisito na ka ni veivakamarautaki me digia. Ena basoga ni noda bula kece, me noda isausau meda “vakadeitaka tiko ga na ka e vakadonuya na Turaga.” (Efeso 5:10) E vakatavulica na iVolatabu ni tu vei ira na ulunivuvale na lewa, e rawa gona nira digia na ka ni veivakamarautaki e ganita na vuvale.a—1 Kor. 11:3; Efeso 6:1-4.

¹³ Na ivakavuvuli vakaivolatabu eda veivosakitaka mai, e sega ni vakaibalebaletaki ga ena ka ni veivakamarautaki. E rawa ni vakavu veileti tale ga se ka ni veitalanoa na veika e vauca na isulusulu, sasauni, tiko bulabula, kakana kei na so tale. Ke sega mada ga ni veisaqasaqa kei na ivakavuvuli vakaivolatabu, era na qarauna ga na dauveiqaravi i Jiova mera kua ni veiletitaka qori, ni “sega ni dodonu me veivala na bobula ni Turaga, me yalomalua ga vei ira kece.”—2 Tim. 2:24.

KUA NI VAKAILALA CA!

14. Na vosa vakatautauvata cava a vakayagataka o Paula me uqeti keda meda kua ni vakailala ca?

¹⁴ Na cava e dua tale na sala e rawa nida “vakanadakuya [kina] na ivalavala tawadodonu o keda kece eda kaciva na yaca i Jiova”? Meda kua ni kabiti ira e tawadodonu na nodra ivalavala. Me nanumi tiko ni a cavuta tale o Paula e dua na vosa vakatautauvata ni oti ga nona tukuna na vosa vakatautauvata me baleta na ‘yavu dei ni Kalou.’ A cavuta e dua na ‘vale levu’ e tiko na kena “veimataqali iyaya, so e koula, so e siliva, so tale ga e kau, so e qele, so era vakayagataki ena inaki dokai, eso tale era vakayagataki ena inaki e sega ni dokai.” (2 Tim. 2:20, 21) Sa qai vakasalataki ira na lotu vaKarisito mera ‘yawaki ira,’ se kua ni kabita na iyaya e vakayagataki ena inaki e “sega ni dokai.”

15, 16. Na cava eda vulica ena vosa vakatautauvata me baleta na ‘vale levu’?

¹⁵ Na cava na ibalebale ni vosa vakatautauvata qori? A vakatauvatana o Paula na ivavakoso ina ‘vale levu,’ o ira na lewe ni ivavakoso ina “veimataqali iyaya,” se iyaya ni vale. So na iyaya ni vale ena rairai tauva tu eso na wainimate veivakaleqai se ra sega tu ni savasava. Era na qarauna gona na itaukeinivale me kua ni biu vata na iyaya qori kei na nodra iyaya savasava, me vaka na iyaya e dau vakayagataki ena vakasaqa.

¹⁶ Nikua, o ira tale ga na dauveiqaravi ni Kalou era saga me savasava nodra bula, era na sega ni veimaliwai voleka kei ira ena ivavakoso e nodra ivakarau mera beca na ivakavuvuli i Jiova. (Wilika 1 Korinica 15:33.) Ke tukuni meda cakava qori ena loma ni ivavakoso, sa qai bibi sara meda ‘yawaki ira’ se kua ni veimaliwai kei ira ena taudaku ni ivavakoso, ni levu vei ira qori era ‘lomana na ilavo, era talaidredre vei ira na nodra itubutubu, era sega ni yalodina, dau vakaucaca, voravora, sega ni vinakata na ka dodonu, veinakicataki, era lomana tale ga na marau ra qai sega ni lomana na Kalou’!—2 Tim. 3:1-5.

VAKALOUGATATAKA O JIOVA NA NODA YALODINA

17. Era muria vinaka vakacava na Isireli yalodina na ivakaro mera cata na veika tawadodonu?

¹⁷ E tukuni ena iVolatabu na totolo ni nodra muria na Isireli na ivakaro mera ‘lako tani mai na veiyasa ni vale i Kora, Tecani kei Epairami.’ E tukuni ena iVolatabu ‘nira lako tani sara vakatotolo.’ (Tiko 16:24, 27) Era sega tale ga ni vakatitiqa se mera lokuyara. E tukuni tale ga ena iVolatabu na nodra muria vinaka na ivakaro qori. Era “lako tani mai na veiyasana.” Era sega ni qai lomalomarua na dauveiqaravi i Jiova. A sega ni vakatikina nodra talairawarawa, e vu dina mai lomadra. Era vakadeitaka sara ga nira na tokoni Jiova ra qai cata na veika tawadodonu. Na cava eda vulica e ke?

18. Na cava a vakaibalebaletaka tiko o Paula ni vakamasuti Timoci me ‘dro tani mai na gagadre vakaitabagone’?

¹⁸ Dodonu meda totolo da qai guta ni taqomaka noda veitokani kei Jiova. Qori sara ga na ka e vakaibalebaletaka o Paula ena nona vakamasuti Timoci me “dro tani . . . mai na gagadre vakaitabagone.” (2 Tim. 2:22) Donuya na gauna qori, sa uabula tu o Timoci, de dua sa yabaki 30 vakacaca. Ia na “gagadre vakaitabagone” e tara na yabaki ni bula kece. Ni yacovi Timoci na gagadre qori, ena vinakati me “dro tani” mai kina se me “vakanadakuya na ivalavala tawadodonu.” E tautauvata tale ga qori kei na vosa i Jisu: “Ke vakaleqai iko tale ga na matamu, leuta qai kolotaka tani.” (Maciu 18:9) O ira na lotu vaKarisito era muria tiko na ivakaro qori nikua, era guta sara tiko ga mera valuta na veika ena rawa ni vakaleqai ira vakayalo, era sega ni lomalomarua se lokuyara.

19. Na cava era cakava eso na tacida nikua me kua ni yacovi ira kina na leqa?

¹⁹ Eso na tacida e nodra malumalumu tu e liu na gunu, ia nira sa mai qaravi Jiova era sa vakatulewataka sara ga mera kua tale ni gunu. Eso era sa sega mada ga ni galeleta na ka ni veivakamarautaki e kilikili, nira kila ni rawa ni bukana tale na ivalavala tawadodonu era sa vakanadakuya mai. (Same 101:3) Kena ivakaraitaki, ni bera ni qaravi Jiova e dua na tacida, e dau taleitaka tu na soqo ni marau e caka kina na danisi vakasisila. Ia ni sa vulica na ka dina, sa sega mada ga ni vinakata me danisi ena nodra soqo ni marau na iVakadinadina i Jiova ena nona leqataka ni rawa ni uqeta na gagadre se vakanananu ca sa vakanadakuya mai. E sega ni tukuni meda vakatabui keda na lotu vaKarisito ena gunu, danisi se so tale na ka e sega ni cala. Ia e vinakati meda dau totolo ni yavala da qai guta ni taqomaki keda ena veika e rawa ni vakaleqai keda vakayalo.

20. Ena rairai dredre meda “vakanadakuya na ivalavala tawadodonu,” ia na cava e vakacegui keda?

²⁰ Na noda vakatokayacataki ena yaca ni Kalou e salavata mai kei na itavi. E bibi meda “vakanadakuya na ivalavala tawadodonu” da qai ‘gole tani mai na ca.’ (Same 34:14) E macala ga ni na sega ni rawarawa qori. Ia e veivakacegui nida kila ni o Jiova ena lomani ira tu ga na “nona tamata” kei ira era muria na nona sala dodonu.—2 Tim. 2:19; wilika 2 Veigauna 16:9a.