Sauma na iVolatabu Noqu Lomatarotaro

NONA BULA E LIU:

Au sucu e Baku, mai Azerbaijan, dua ga na tuakaqu. E Musolomani o tamaqu, e Jiu o tinaqu. Rau dau veilomani na noqu itubutubu, rau sega ni kauaitaka vakalevu na duidui ni nodrau vakabauta. Dau tokoni Ta o Na ena vula me lolo kina, e kilai me Ramadan. O Ta tale ga e dau tokoni Na ni vakananuma na Lakosivia. E tiko e vale na ivola e yavutaki kina nodra vakabauta na Musolomani na Koran, vaka kina na imatai ni lima na ivola ena iVolatabu na Torah, kei na iVolatabu.

Au dau tukuna niu Musolomani. Au sega ni dau vaqaqa ke bula tiko na Kalou, ia eso na ka au lomatarotarotaka. So vei ira qo, ‘Cava e buli keda kina na Kalou, cava tale ga na inaki ni nona vakalolomataki tiko e dua ena nona bula taucoko, oti qai lai vakararawataki tale me tawamudu i eli?’ Era kaya eso ni ka kece e yaco e inaki ni Kalou, au mani vakasamataka, ‘E vakavuna na Kalou na noda rarawa qai marautaka?’

Niu yabaki 12 au dau vakaitavi ena masu e vakatokai na namaz, qo nodra masu na Musolomani e dau caka vakalima e veisiga. Gauna tale ga qori e vakacurumi keirau vakaveitacini o Ta ina dua na koronivuli vakaJiu. Keirau vulica tale ga kina na veika e okati ena Torah kei na vosa vakaIperiu. Ni bera ni tekivu e dua na kalasi e veisiga, dau kena ivalavala me cabori e dua na masu me salavata kei na vakabauta vakaJiu. Ena mataka au na cavuta mai vale na namaz, ia niu sa yaco e koronivuli au na cavuta nodra masu na Jiu.

Dua na ka noqu vinakata mera saumi noqu vakatataro. Au dau taroga na rapai e koronivuli: “Cava e buli keda kina na Kalou? Cava nona nanuma me baleti Tamaqu ni Musolomani? E turaga vinaka, cava ga e tukuni kina ni tawasavasava? Cava e buli koya kina na Kalou?” Sega sara ga ni saumi vinaka noqu taro qai sega ni veivakacegui.

VEISAUTAKI AU NA IVOLATABU:

Oti sara ga noqu vakabauta na Kalou ena 2002. Keitou se qai toki ga i Jamani, oti e dua na macawa, e mate e dua na yasa ni yago i tamaqu, qai sega ni vakilai koya tu. Vica vata na yabaki noqu dau masulaka tiko na nodratou bula noqu vuvale. Au vakadeitaka ni o koya ga e Cecere Duadua e tu vua na kaukaua me lewa na mate kei na bula, au mani masulaka kina e veisiga na bula i tamaqu. Au dau vakasamataka, ‘E lailai wale sara na ka au kerea tiko vua na Kalou.’ Au nuidei gona ni na vakayacora noqu kerekere. Ia a qai takali o tamaqu.

Dua na ka noqu rarawa ni sega ni kauaitaki au na Kalou. Au nanuma ‘ni cala tiko noqu masu se sega ga ni bula dina tiko na Kalou.’ Sega sara ga niu tukuna rawa e dua na ka, se meu cavuta rawa tale na namaz. Sega tale ni dua na lotu e vakacegui au rawa, au tinimaka kina ni sega ni bula dina tiko na Kalou.

Oti tale e ono na vula era veisiko yani i vale na iVakadinadina i Jiova. Keirau dau beci ira tu na lotu vaKarisito, ia keirau nanuma vakaveitacini me keirau vakaraitaka vakavinaka vei rau ni rau cala. Keirau taroga: “Rawa vakacava nira sokaloutaki Jisu na lotu vaKarisito, ra sokaloutaka na kauveilatai, Meri kei na so tale na matakau, ni vakatabuya tu mada ga qori na Vunau e Tini?” Rau vakadinadinataka vakaivolatabu ni sega ni dodonu mera sokaloutaka na matakau na lotu vaKarisito, me vakatabakidua ga vua na Kalou. Dua na ka noqu kurabui.

Keirau taroga tale: “Vakacava na Letoluvakalou? Ke Kalou o Jisu, rawa vakacava ni bula e vuravura qai vakamatei?” Rau sauma tale vakaivolatabu ni sega ni Kalou o Jisu se rau tautauvata. Qori na vuna era sega ni vakabauta kina na Letoluvakalou na iVakadinadina. Au kurabui ga au qai vakasamataka, ‘Duatani na lotu vaKarisito qo.’

Au se via kila tiko ga na vuna eda mate kina, cava tale ga e vakatara kina na Kalou na veika rarawa. Rau vakaraitaka sara vei au na iVakadinadina na ivola Na Ka Mo Kila Mo Bula Tawamudu Kina,a era saumi vinaka kina na noqu taro. Tekivu tale ga kina noqu vuli iVolatabu.

Ena veigauna kece ni vuli, dau matata na isau vakaivolatabu ni noqu taro. Au sa qai kila ni yaca ni Kalou o Jiova. (Same 83:18) E nona itovo talei duadua na loloma. (1 Joni 4:8) E buli keda ni via vakalougatataki keda ena isolisoli ni bula. Au sa qai kila ni vakatara na Kalou na veika tawadodonu, ia e sega ni taleitaka, sa na vakarau vakaotia vakadua. Au vulica tale ga ni nodrau talaidredre o Atama kei Ivi eda mai kalouca kina. (Roma 5:12) Dua vei ira qori na nodra mate na wekada lomani, me vakataki Tamaqu. Sa na vakarau vakaotia na Kalou na veika rarawa qori ena vuravura vou sa tu qo e matada, nira na vakaturi kina na mate.—Cakacaka 24:15.

Sauma na iVolatabu noqu lomatarotaro. Au vakabauta tale kina na Kalou. Niu sa mai kilai ira vinaka na iVakadinadina i Jiova, au raica nira lewe ni dua na mataveitacini e vuravura raraba. Veiuqeti dina nodra duavata kei na nodra veilomani. (Joni 13:34, 35) E uqeti au tale ga noqu vulici Jiova, au qai via qaravi koya, vakatulewataka kina meu iVakadinadina i Jiova. Au papitaiso gona ena ika8 ni Janueri, 2005.

KENA YAGA:

Na dina ni vosa ena iVolatabu e vakavinakataka noqu rai me baleta na bula. E vakacegui au na ivakamacala nuitaki ena Vosa ni Kalou. Au marau qai lomavakacegu niu nuitaka tiko noqu na raici tamaqu tale ni sa na vakaturi me vaka e yalataka tu na Vosa ni Kalou.—Joni 5:28, 29.

Sa ono na yabaki noqu bula vakawati kei Jonathan, e dau lomana tale ga na Kalou. Keirau vulica ni sega ni dredre, e matata tale ga na ka dina me baleta na Kalou, e iyau talei. Qori na vuna keirau taleitaka kina na wasea na neirau vakabauta kei na inuinui talei. Au sa mai kila tu nikua nira sega ni “duatani” na iVakadinadina i Jiova, era lotu vaKarisito dina.