ULUTAGA LEVU | O KILAI IRA NA IVAKADINADINA I JIOVA?
Cava e Kilai me Baleti Keimami?
Na neimami isoqosoqo e roboti vuravura raraba, e sega ga ni dau vakaitavi kei na matalotu tale eso. E tiko mai Merika na neimami itikotiko liu, ia e levu na iVakadinadina i Jiova era tu e veivanua. Keimami voleka ni le 8 na milioni na dau veivakavulici ena iVolatabu ena sivia na 230 na vanua. Keimami muria na veidusimaki i Jisu: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece.”—Maciu 24:14.
Se mani vanua cava keimami tiko kina, keimami na muria ga na lawa. Ia keimami na dau saga me keimami tawaveitovaki ena veika vakapolitiki. Qori ena neimami muria na veidusimaki i Jisu vei ira na lotu vaKarisito mera ‘kua ni vakavuravura.’ Keimami na sega gona ni vakaitavi ena veika vakapolitiki se tokona na ivalu. (Joni 15:19; 17:16) Levu vei keimami era vesu qai vakatotogani ena iKarua ni iValu Levu ena vuku ni tawaveitovaki. E vola e dua na kai Jamani a bete tu: “E donu vinaka na nodra tukuna ni o ira duadua ga era sega ni duavata kei na nona veiliutaki o Itala.”
“Era kilai tani na [iVakadinadina i Jiova] nira dau dei ena nodra vakabauta. Era dau veinanumi ra qai rawa sara ga ni vakayagataki ena buturara ni veika vakapolitiki—ia era sega ni via vakaitavi kina. . . . Era doka na matanitu e veiliutaki tiko, ia era vakabauta ni Matanitu ga ni Kalou e rawa ni walia na noda leqa kece.”—niusiveva na Nová Svoboda, ena Czech Republic.
Ia sega ni kena ibalebale ni keimami na lai tu tani ena dua na vanua. A masu o Jisu qai kerea vua na Kalou me baleti ira na nona imuri: “Au sega ni kerea moni kauti ratou tani e vuravura.” (Joni 17:15) Eda na sota gona ena so na vanua me vaka na valenicakacaka, sitoa, se koronivuli e toka voleka vei kemuni.