Na Cava Era Tawaveitovaki Kina ena Politiki na iVakadinadina i Jiova?
Keimami sega ni vakaitavi na iVakadinadina i Jiova ena veika vakapolitiki ena vuku ni neimami vakabauta e yavutaki vakaivolatabu. Keimami sega ni vakamuai ira na daunipolitiki, sega ni veidigidigi, sega ni via vakaitutu ena matanitu se vakaitavi ena so na sasaga me via vuaviritaki kina na matanitu. Keimami vakabauta ni tiko na vuna vinaka e veivakasalataki kina na iVolatabu me keimami kua kina ni cakava qori.
Keimami muria na ivakaraitaki i Jisu, a sega ni via vakaitutu ena veika vakapolitiki. (Joni 6:15) A vakavulici ira nona tisaipeli mera ‘kua ni vakavuravura,’ qai vakamatatataka mera tawaveitovaki ena veika vakapolitiki.—Joni 17:14, 16; 18:36; Marika 12:13-17.
Keimami yalodina ina Matanitu ni Kalou, na matanitu a vakaibalebaletaka o Jisu ni kaya: “Ena vunautaki mada na itukutuku vinaka qo ni Matanitu ni Kalou ena veiyasa i vuravura.” (Maciu 24:14) Ni keimami mata ni Matanitu ni Kalou e neimami ilesilesi me keimami vunautaka ni sa vakarau veiliutaki e vuravura na Matanitu ni Kalou. Qori na vuna keimami tawaveitovaki kina ena veika vakapolitiki e veiyasa i vuravura, wili kina na vanua keimami vakaitikotiko kina.—2 Korinica 5:20; Efeso 6:20.
Ni keimami tawaveitovaki, keimami doudou ni kacivaka na itukutuku vinaka ni Matanitu ni Kalou vei ira na lewenivanua era tokona na veika vakapolitiki. Keimami saga me laurai ena ka keimami tukuna se cakava ni keimami nuitaka ga na Matanitu ni Kalou me walia na leqa e vuravura.—Same 56:11.
E dau vakavu veisei na veika vakapolitiki. Keimami duavata gona me vaka e dua na vuvale levu e veiyasa i vuravura ni keimami tawaveitovaki. (Kolosa 3:14; 1 Pita 2:17) Ia e laurai na veisei ena veimatalotu era siova na veika vakapolitiki.—1 Korinica 1:10.
Doka na veiliutaki ni matanitu. Keimami sega ni vakaitavi ena veika vakapolitiki, ia keimami doka na veiliutaki ni matanitu ena neimami dui vanua. Qori e duavata kei na ivakaro vakaivolatabu: “Mera talairawarawa na tamata kece vei ira na iliuliu cecere.” (Roma 13:1) Keimami muria na lawa, saumi ivakacavacava, qai tokona na sasaga ni matanitu me baleta na bula raraba ni lewenivanua. Keimami sega ni vakaitavi ena vakaduduile e saqati kina na matanitu. Keimami muria ga na ivakaro vakaivolatabu me keimami masulaki ira na “tui kei ira kece na vakaitutu,” me rawa ni kua ni vakalatilati ena neimami galala ni sokalou na nodra vakatulewa.—1 Timoci 2:1, 2.
Keimami doka na nodra vakatulewa eso tale me baleta na veika vakapolitiki ni oya na nodra dodonu. Kena ivakaraitaki, keimami sega ni dau vakatubuca ena gauna ni veidigidigi se tarovi ira na via veidigidigi.
Sa qai tekivu ga ena gauna qo na tawaveitovaki? Sega. Era tawaveitovaki tale ga na yapositolo kei na so tale na lotu vaKarisito ena imatai ni senitiuri. E kaya na ivola Beyond Good Intentions: “Era vakabauta na lotu vaKarisito taumada ni dodonu mera doka na matanitu e veiliutaki, ia era sega ni vakabauta ni dodonu mera vakaitavi ena veika vakapolitiki.” E kaya tale ga na ivola On the Road to Civilization, nira “sega ni via vakaitutu ena veika vakapolitiki” na lotu vaKarisito taumada.”
Ena vakaleqa na cakacaka ni matanitu na neimami tawaveitovaki? Sega. Keimami saga me keimami dua na lewenivanua vinaka, keimami vinakata tale ga na bula veiyaloni. Ena sega gona ni vakavu leqa ina matanitu na neimami tawaveitovaki. A vakamacalataki na neimami tawaveitovaki ena dua na ripote e vakarautaka ena 2001 na isoqosoqo na National Academy of Sciences mai Ukraine. E tukuni ena ripote qori: “Era na rairai sega ni taleitaka eso nikua na nodra vakatulewa qo na iVakadinadina i Jiova. Era beitaki mada ga ena vuku ni vakatulewa qori donuya na gauna i Itala kei na veiliutaki vaKominisi.” Era vakararawataki na iVakadinadina ena veiliutaki ni Matanitu Cokovata kei Rusia, ia era “muria tu ga na lawa ni matanitu. Era daudina qai gugumatua ena iteitei se vanua ni buli iyaya era cakacaka kina. E sega ni bau vakavuleqa ina matanitu vaKominisi e veiliutaki na ka era cakava.” E qai tinia na ripote sa cavuti oti mai ni veika era vakabauta na iVakadinadina i Jiova kei na nodra ivakavuvuli ena sega ni “vakavu leqa ina dua na matanitu.”