Taro na Dauwiliwili

Na cava era kauaitaka kina vakalevu na meca i Jisu na vuluvulu?

Qo e dua ga na ka mera vakacalai Jisu kina kei ratou na tisaipeli na kedratou meca. E okati ena Lawa e soli vei Mosese na veitikina matailalai ena nodra itovo vakavanua me vaka na kena drodro mai eso na ka ena yago, na vukavuka, na veitaratara kei na yago mate se mani manumanu se tamata. E vakamacalataki tale ga na sala mera vakasavasavataki ira kina. Rawa ni caka qori ena vakacaboisoro, sili, se vakamiraki ni wai.—Vunau, wase 11-15; Tiko wase 19.

Era dau vakamacalataka vakamatailalai na rapai na lawa qo. E tukuna e dua na ivola, ni gauna e laurai kina na duka, ena vaqaqai vakamatailalai na vuna a yaco kina, na sala e rawa ni veitakavi kina, era na duka tale ga na iyaya e vakayagataki kina se sega, kei na veiqaraqaravi vakavanua me caka me savasava tale kina.

Era tarogi Jisu na kena meca: “Na cava era sega ni muria kina nomu tisaipeli na nodra ivakavuvuli na qase nira kana ni duka tu ga na ligadra?” (Mari. 7:5) Era sega ni tukuna tiko na meca na tiko bulabula. Me vaka ga na nodra ivakarau era vinakata na rapai me sova e ligadra na wai ni bera na kana. E kuria tale na ivakamacala ena ivola sa vakamacalataki oti mai cake: “Dau ka ni veitalanoa se mataqali saqa vakacava me vakayagataki me tawa kina na wai, me kau mai vei na wai, o cei me sova, me vakacava na levu ni vanua e kovuta ena liga na sova ni wai.”

E rawarawa sara na ka e cakava o Jisu ena lawa vakatamata qo. E tukuna vei ira na iliuliu ni lotu Jiu ena imatai ni senitiuri: “Ni dau veivakaisini! E tukuni kemuni vinaka o Aisea ni vola, ‘O ira qo era vakarokorokotaki au ga ena tebenigusudra, ia na lomadra e yawa sara vei au [o Jiova]. E tawayaga nodra sokaloutaki au, nira vakavulica na ivakaro vakatamata me ivakavuvuli.’ Oni biuta tani na ivunau ni Kalou, oni qai taura matua na ivakavuvuli vakatamata.”—Mari. 7:6-8.