5 Eda na Vakadonui ke da Guta Noda Sokalou​— E Dina Oya?

Ka o rairai rogoca: “E levu tu na gaunisala, ia ena basika kece ga ina dua na vanua. E duidui tale ga na ivalavala ni sokalou, ia eda qarava kece ga e dua na Kalou. Me lewa ga na tamata yadua na ivalavala e qarava kina na Kalou.”

Ka e kaya na iVolatabu: E dodonu me vu mai lomada na noda sokalou, me kua ni vakarairai se veivakaisini. A tukuna o Jisu vei ira na iliuliu ni lotu ena nona gauna na vuna e sega ni vakadonui ira kina na Kalou: “E tukuni kemuni vinaka o Aisea ni a vola, ‘O ira qo era vakarokorokotaki au ga ena tebenigusudra, na lomadra e yawa sara vei au.’” (Marika 7:6) Ke da guta mada ga noda sokalou, e sega ni kena ibalebale oya ni na vakadonuya na Kalou.

A vakamatatataka qori o Jisu ni vakaraitaka na leqa e tiko ena nodra sokalou na iliuliu ni lotu kei ira na lewenilotu. A vakaibalebaletaka vei ira na ka e tukuna na Kalou: “E tawayaga nodra qaravi au nira vakavuvulitaka ga na ivakavuvuli vakatamata.” (Marika 7:7) Na nodra sokalou e “tawayaga” se ka wale nira vakaliuca na ivakavuvuli vakalotu, sega ni veika e vinakata na Kalou.

Na iVolatabu e sega ni tokona na vakasama ni vakadonuya na Kalou na duidui sala e qaravi kina, ia e tukuna ni dua ga na ivalavala ni sokalou e vakadonui. E tukuna na Maciu 7:13, 14: “Curu ina matamata qiqo; ni le levu era muria tiko na sala rabalevu qai galala e basika ina rusa; ia na sala e basika ina bula e rabalailai, e qiqo na kena matamata, qai vica wale sara era kunea.”

Yaga ni nomu kila na ka dina: Kaya mada e vakavula na nomu tereni tiko ina dua na veitaucici balavu o qai winitaka, ia e sega ni soli vei iko na icocovi ni o beca e dua na lawa o sega sara tu ga ni kila. O na nanuma ni sa maumau na nomu sasaga. E rawa beka ni yaco e dua na ka va qori ena noda qarava na Kalou?

Ni vakatauvatani na noda sokalou ina veitaucici, a vola na yapositolo o Paula: “Ena sega ni vakaisalataki e dua e vakaitavi ena qito ke sega ni muria na lawa ni qito.” (2 Timoci 2:5) Ena vakadonui keda na Kalou nida “muria na lawa” e vauca na sokalou, oya meda qaravi koya ena sala e vakadonuya. Ena sega ni wini na dauveitaucici ke beca na kena lawa, ena sega tale ga ni vakadonui keda na Kalou ke da lewa ga na sala meda qaravi koya kina.

Me kua ni yavutaki na noda sokalou ena ivakavuvuli lasu me baleta na Kalou ke da via vakamarautaki koya. A kaya o Jisu: “Mera sokalou . . . vakayalo vei Tamada o ira era sokalou dina, ena yavutaki tale ga ena dina nodra sokalou.” (Joni 4:23) Na iVolatabu ena dusimaki keda ena ivalavala ni sokalou e vakadonuya na Kalou.—Joni 17:17.a

[iVakamacala e ra]

[Tikina bibi ena tabana e 8]

Era vakavulica beka na lotu kece na ivalavala ni sokalou e vakadonuya na Kalou?