Taro e Vakavu Veilecayaki

E DUIDUI na nodra rai e levu me baleta na bula kei na mate. Era vakabauta eso nira na bula tale ena gauna era mate kina, de dua era na veisau ina dua tale na kabula se ra lai bula ena dua tale na vanua. Eso era vakabauta nira na sucu tale ena dua na ivakarau ni bula vou. Eso tale era nanuma ni sa itinitini ga ni ka kece na mate.

Na nomu rai me baleta na bula kei na mate ena rairai vakatau ena nomu isususu, se na rai e takalevu ena nomu vanua. Ni duidui vakalevu na rai me baleta na mate, eda na kunea e vei na isau dodonu ni noda vakatataro?

Era vakavulica voli me vica vata na senitiuri na italatala ni tiko vua na tamata e dua na ka e tawamate rawa. Era vakabauta e levu na lotu me vakataki ira na lotu vaKarisito, Idu, lotu vakaJiu, Musolomani, kei na so tale, ni tawamate na yalo. Na yalo qori ena veikalikali kei na yago ni tamata ena gauna e mate kina e dua me lai bula ena dua tale na vuravura ni yalo. Ia era vakabauta na lotu Buda ni nona sucu tale vakavica vata e dua e idewadewa ina ituvaki totoka era vakatoka me Nirvana.

Na ivakavuvuli va qori e vakavuna mera vakabauta e levu nida na lai bula ena dua tale na vuravura ena gauna eda mate kina. Era nanuma ni dodonu me tiki ni noda bula na mate, e inaki tale ga ni Kalou. Ia na cava e kaya na iVolatabu? O na rairai kurabuitaka na ka e kaya na iVolatabu ena ulutaga e tarava.