Epereli​—Meda Lomakatakata Mada ga Kina Ena Cakacaka Vinaka!

¹ Ni voleka mai na cava ena dua na vanua era tu kina na tamata, ena gadrevi mera vakaroti vakatotolo na lewena ena leqa sa rorovi ira. Na kena roro voleka ga mai na cava, na levu tale ga ni nodra vakaroti. Na cava e vuna? E leqataki na nodra bula! De so a sega ni rogoca na ivakaro era soli taumada. E so tale, e rairai ra rogoca, ia era weletaka ga. E tauvata sara ga oqo kei na ivakaro vakalou e lesi vei keda meda vakarogoya ni bera ni qai cagina na vuravura ca oqo ena “covulaca” ni cudru tau vakadodonu ni Kalou. (Vkai. 10:25) E leqataki na nodra bula e lewe vica vata na bilioni ni rawa nira sega ni yacova na bula tawamudu! Sa dodonu me tau na ivakaro. Meda qai “lomakatakata [gona] e na cakacaka vinaka.”​—Taito 2:11-14.

² Sa vicasagavulu mai oqo na yabaki na noda dau uqeti na tamata i Jiova meda vakayagataka vinaka na vula ni iVakananumi me gauna lavotaki ni noda cakacaka vakaitalatala. Ena vulaitubutubu sara ni 1939, e veivakayaloqaqataki kina vaka oqo na Informant, sa kena isosomi na Noda Cakacaka Vakaitalatala ni Matanitu: “Ni sa vakarau oqo na vulaitubutubu, qai salavata mai kei na draki vinaka, e namaki ni rawa ni vakaruataki na levu ni aua era na rawata na dautukutuku [ni ivavakoso] ena cakacaka vakavunau, ena levu sara na ka era rawata na painia. E lima na Sigatabu ena vula o Epereli. E lima tale ga na kena siga Vakarauwai. Me gauna lavotaki mada ga ni nomu vunau . . . na siga Vakarauwai kece kei na Sigatabu ni vula o Epereli.” E dua na sasaga vinaka a taura na isausau a navuci ena 60 na yabaki sa oti vei ira na mataveitacini! Ia, e se lima tiko ga na muanimacawa ni vula o Epereli ni yabaki oqo, me vaka ga ena 1939. Na cava o navuca mo cakava ena vula oqo? Na cava o sa vola tu ena nomu ivolanivula me baleta na Epereli 2000? Navuca mo vakaitavi vakavinaka ena cakacaka vinaka kei ira na tamata kece i Jiova ena vula lavotaki oqo, ni na levu na cakacaka vakayalo me vakayacori.

³ Veika e Nanumi me na Caka: E lutu toka ena vula oqo na tikinisiga bibi duadua ni yabaki 2000. Oya na 19 Epereli, na siga ena vakananumi kina na mate i Jisu. Meda saga sara meda sureti ira na lewenivanua ena kena levu eda rawata mera na tiko ena iVakananumi. Me vaka a vakaturi ena vula sa oti, vola na yacadra kece o vinakata mo na sureta ina iVakananumi, qai raica me kua ni dua e lutu. Mo sureti ira na dautukutuku era sa mate tu vakayalo, o ira na vuli iVolatabu, o ira na nomu veisikovi lesu, o ira era a vuli iVolatabu tu e liu, itokani vakacakacaka, icaba e koronivuli, o ira eda tiko veivolekati, o ira na wekada, kei ira na noda veikilai tale e so. Sa macala na sala era na lako yani kina? Ke sega, ena rawa beka mo vukei ira? Ena bogi ni iVakananumi, meda vakaraitaka sara ga na noda marautaki ira kece era tiko kina. Ni oti na iVakananumi, de rawa nida na tomana na noda vukei ira vakayalo na tataleitaki.

⁴ Nida “lomakatakata e na cakacaka vinaka” ni bera na iVakananumi, vaka kina ni sa oti, e sala vinaka meda vakaraitaka kina vei Jiova na noda vakavinavinaka ena veika kece e cakava me baleti keda. Me vaka ni sa via malumu mai oqo na draki, ena rawarawa sara kina meda vakalevutaka na noda sasaga ena cakacaka vakavunau. Ke o painia veivuke, saga sara mo rawata vinaka na 50 na aua, se sivia ena cakacaka vakaitalatala. (Maciu 5:37) Muria vinaka na nomu ituvatuva o tuvanaka ena itekitekivu ni vula. (Dauv. 3:1; 1 Kor. 14:40) Vei keda na kena vo, meda tokoni ira kece mada ga na painia ena noda vosa ni veiuqeti, kei na noda tokani ira ena cakacaka vakavunau. (Vakatauvatana 2 Tui 10:15, 16.) Ke da kabukaburaki vagumatua ena vula oqo o Epereli, sega ni vakabekataki nida na marau vakalevu, ena vakalougatataki keda tale ga o Jiova. (Mala. 3:10) Oqo beka na ikalawa me kua ni mudu kina na nomu painia veivuke, se mo lai painia tudei sara. Me cakayaco mada ga vei keda na noda ogaoga vakayalo ena vula oqo o Epereli me yavalati keda ena veivula e tu mai oqo e liu meda dautukutuku vakawasoma tiko ga kina ni Matanitu ni Kalou.

⁵ E sega ni vakabekataki ni vica vata na udolu vei keda na tamata i Jiova ena tauyavutaka e levu tale na vuli iVolatabu ena vula oqo. O na bau via tauyavutaka tale ga e dua? Masuta me dua na nomu vuli iVolatabu, qai cakacakataka. Ena vakadonuya dina o Jiova na nomu masu ni kerekere ena yalomalumalumu mo vukei ena nomu qara e dua e lomadina mo vakavulica.​—1 Joni 3:22.

⁶ Oqo e dua na iwalewale ni vunau e sa vakayagataki oti vakalevu me tekivu rawa kina na veivosaki. O rawa ni taroga: “E vei beka vei rau oqo e uto ni itovo voravora e yaco tiko ena veikoronivuli, na nodra veiuqeti na timoni se nodra sega ni tuberi vinaka na gone mai vale?” Waraka me sauma. Ke tukuna o itaukeinivale ni “nodra veiuqeti na timoni,” wilika na Vakatakila 12:9, 12, qai vakamacalataka se vakavuna vakacava tiko na Tevoro na veilecayaki ena vuravura. Cega sara na brochure na Loma ni Kalou ina lesoni 4, qai tarogi koya se bau dau vaqaqa e vu mai vakacava na Tevoro. Wilika, drau veivosakitaka sara na imatai ni rua na parakaravu. Ia ke tukuna o itaukeinivale ni “nodra sega ni tuberi vinaka na gone mai vale” e vu ni itovo voravora ena veikoronivuli, wilika na 2 Timoci 3:1-3, dusia na ivalavala e so e vakavuna na leqa oqo. Cega sara na brochure na Loma ni Kalou ina lesoni 8, wilika na parakaravu 5, qai tomana nomudrau veivosaki. Ke rawa mo veivosakitaka mo lesuvi koya, de sa na rawa e kea mo drau vuli iVolatabu vakawasoma kei koya na itaukeinivale. Ni o sikovi koya tale, taroga de kila e dua ena taleitaka me rogoca na ka sa vulica tiko oya.

⁷ E dua tale na sala eda vakaraitaka kina noda “lomakatakata e na cakacaka vinaka” ena vula oqo o Epereli, oya meda vakaitavi ena basoga kece ni vunau. O sa bau nanuma mada mo lai vunau ena dua na lomaniba ni gade, se vei ira na dabe tu ena loma ni nodra motoka, se ena ikelekele ni basi? Se mo tovolea mada na vunau ena talevoni, se ena salatu, se ena vanua ni bisinisi? Vakacava mo tovolea mada ena vula oqo? Ena vukei iko o Jiova mo yalodoudou. (Caka. 4:31; 1 Ces. 2:2b) De rawa ni drau veivosaki me drau cakacaka vata kei na dua na painia, se dua na dautukutuku sa qaseta na basoga ni cakacaka vakaitalatala vaka oqo.

⁸ Nida via vakalevutaka na noda cakacaka vakavunau, ena sega ni sega, eda na vunau tawalokuci tale ga. E sega ni dredre oqo, ni vinakati ga meda tekivu vosa vakayalovinaka vua e dua. Kauta cake mai e dua ga na ulutaga e kauaitaki raraba, de rawa ni o vakayagataka na iwalewale e koto ena parakaravu 6. Saga mo vakayagataka vinaka na gauna leleka cava ga e rawa, me kua kina ni maumau. Eda sega ni kolotaka laivi na lima na sede, se tini na sede, se 50 na sede baleta wale ga ni sega ni yacova na dua na dola. Ke mani lima na miniti, tini na miniti, se 45 sara na miniti na nomu vunau tawalokuci, sa vakayagataki vinaka tiko kina na gauna oya, se sega beka?

⁹ Me Vakasamataki Vakabibi: Nanuma lesu mada na tikina bibi e so ena drama a vakayacori ena soqo ni tikina ni yabaki sa oti, “Na Vosa ni Yalayala ni Kalou.” Na drama e vakatokai Meda Vakamareqeta na Noda iVotavota Vakayalo, a vukei keda meda raica na duidui e tiko vei Jekope kei Iso. A kaya o Iso ni taleitaka tale ga na veika vakayalo me vakataki Jekope, ia e sega ni laurai oya ena veika e cakava. (Vkte. 25:29-34) Meda vuli kina o keda! Meda vakataki Jekope mada ga, da tu vakarau meda sasaga sara vakaukaua meda rawata kina na veivakalougatataki i Jiova. (Vkte. 32:24-29) Vakacava meda vakavouya tale mada na noda gugumatua ena vula oqo o Epereli, kei na veivula e muri mai, me kua vakadua nida vakawalena na noda ivotavota vakayalo talei.

¹⁰ “Sa voleka mai na siga i Jiova na siga ka uasivi, sa voleka mai, io sa kusa sara mai.” (Sefa. 1:14) E dodonu me vakarogoi yani na itukutuku vinaka ni Matanitu ni Kalou. E leqataki na nodra bula na lewenivanua! Me vula kalougata mada ga oqo vei keda kece na tamata i Jiova ena noda veitauriliga meda vakaraitaka nida “lomakatakata e na cakacaka vinaka.”

[Kato ena tabana e 4]

Ka me Nanumi Ena iVakananumi

Ena vakayacori na iVakananumi ni yabaki oqo ena Vukelulu, 19 Epereli. Oqo e vica na ka mera nanuma na qase:

◼ Ni sa lokuci na gauna ni soqoni, raica me kua ni veisoliyaki na madrai kei na waini vakavo ke sa dromu na siga.

◼ Me kacivaki vakamatata, me kila tale ga o koya ena vunau, na gauna kei na vanua ena vakayacori kina.

◼ Me vakarautaki na madrai kei na waini veiganiti e dau vakayagataki.​—Raica na Watchtower, 15 Feperueri, 1985, taqana 19.

◼ Ni bera na soqoni, mera kau mai ra qai vakarautaki rawa ena vanua e ganita na veleti, bilo, teveli e veiganiti kei na kena iubi.

◼ Me samaki vinaka vakailiu na Kingdom Hall se na vanua ena vakayacori kina na soqoni.

◼ Mera lesi na dauveivuke ra qai dusimaki rawa ena sala matau mera na cakava kina na nodra itavi.

◼ Me vakarautaki na sala ena kau kina na madrai kei na waini vua e dua na lumuti sa malumalumu ena sega ni tiko rawa.

◼ Ke vica na ivavakoso era na vakayagataka vata e dua ga na Kingdom Hall, mera veivosaki vinaka me kua kina na veisugusugu ena matanikatuba levu, pasese, gaunisala, kei na vanua ni vakele motoka.