iTavi Dokai e Rawa Nira Vakaitavi Kina na Gone
1 Era nanuma lesu ena marau e levu era sa itubutubu tu nikua e dua na itavi dokai era a dau vakaitavi kina ena gauna ni nodra gone, nira tubu cake tiko ena dina—na soli ivoladraudrau. A tekivu ena ivavakoso na cakacaka oqo ena 1949. Vakadua ena dua na macawa, mera vakaitavi na dautukutuku yadua ena soli Vale ni Vakatawa kei na Yadra! ena salatu, ena veivale, veisitoa, kei na kena soli ena sala tale e so. Era dau marautaka vakalevu na dautukutuku gone na vakaitavi ena cakacaka oqo, ni rawa nira cakacaka vata kina kei ira era uabula ena ivavakoso. O dau vakaitavi tale ga kina ni o se gone?
2 Me Ratou Vakaitavi Kina na Luvemu: E rawa nira soli ivoladraudrau na luveda era se lalai sara, e se sega ni rawa vei ira mera tekivutaka na veivosaki vakaivolatabu ena matanikatuba. Ena gadrevi ga mera vulica e dua na ivakamacala lekaleka. De rawa ni vakamacala vakalekaleka mai na iyaloyalo e koto ena imatai ni taqa ni ivoladraudrau. E levu na itaukeinivale era dau marau na taura na ivoladraudrau era solia na noda lalai, era dau qoroya tale ga na nodra dina na gone oqo, kei na nodra itovo vinaka. Nira vukei kina, oqo e dua na basoga ni cakacaka ni vunau e rawa nira cakava vinaka na noda lalai, e rawa ni yaga vinaka na nodra veivuke ena vakatetei ni itukutuku ni Matanitu ni Kalou. Ia, nira sa qase cake mai na noda lalai, sa macala ga nira na vukei ira na nodra itubutubu mera tosoya cake sara na ivakatagedegede ni nodra vunau.
3 A tekivu vunau e veivale o Manuel ni se qai yabaki tolu. Rau vakavulici koya na nona itubutubu me cavuqaqataka e dua na ivakamacala lekaleka. Dau gumatua na tomani rau na nona itubutubu, dau solia rawa tale ga e levu na ivoladraudrau, brochure, kei na ivolacebaceba. E dau vunau tawalokuci tale ga. Ena dua na gauna eratou lako vakaveiluveni i gade ina dua na lomaniba ni gade, e lai soli ivolacebaceba sara vei ira e so era tu tale ga e kea. E dina ni se gone sara o Manuel, ia e veiuqeti dina vei rau na nona itubutubu, kei na ivavakoso kece na nona gugumatua ena cakacaka vakaitalatala.—Vkai. 22:6.
4 Ena noda ivolanivula na 2000 Calendar of Jehovah’s Witnesses, e wasei tani na Vakarauwai kece me “Magazine Day” (Siga ni Soli iVoladraudrau). Ra itubutubu, oni kerei mo ni vakabulabulataka tale na cakacaka oqo, mo ni vukei ira na luvemuni mera vakaitavi wasoma ena itavi bibi oqo.