“Sa Sega ni Ka Walega na Nomudou Cakacaka”

¹ Sa dua na vakasama veivakauqeti! E sega ni ka wale na nomu cakacaka vei Jiova. (1 Kor. 15:58) Ena yasana adua, vakasamataka na nodra oca wale na tamata ena levu ni nodra sasaga mera toroi ira cake, se ra vakavinakataka na nodra bula vakailavo. De ra na vuli torocake me vica tale na yabaki, se ra vakaocai ira wale ena sasaga mera rawata e levu na ka. Ia ena vuku ni “gauna kei na ka e tawanamaki,” de ra na sega ni rawata vakadua na itutu era guta voli, se ra sa na lomavakacegu beka ga ena ka era rawata, ia e sega ni vaka sara na ka era diva. E maumau wale na nodra sasaga, baleta ni vaka ga era via “toboka na cagi.” (Dauv. 1:14, NW; 9:11, NW) Sa rui bibi kina meda cakava vakalevu na cakacaka duadua ga ena sega ni ka wale, na cakacaka ena tawamudu na kena yaga!

² Na Cakacaka e Yaga Dina: Na vunautaki ni itukutuku vinaka ni Matanitu ni Kalou e cakacaka bibi duadua e vuravura. Se ra taleitaka se sega na tamata, me na vakayacori ga na cakacaka oqo. Meda na kaya mada ga me vakataki Paula: “[A]u sa sega ni cala e na vukuna e dua sa na cudruvi: ni’u sa sega ni rere ni tukuna vei kemudou na loma ni Kalou taucoko.”​—Caka. 20:26, 27.

³ E ka rekitaki dina ke ra rogoca na itukutuku ni Matanitu ni Kalou na tamata ra qai cakava kina e dua na ka! Sa mai leqa na vugona yalewa e dua na goneyalewa. Vakataroga o koya se sa tu beka e vei o vugona​—i lomalagi se i eli? E masu sara vua na Kalou me vukei koya, e cavuta na yaca i Jiova me vaka sa vakavulici koya kina na tacina. Mani vulica na iVolatabu, a tiko tale ga ena soqoni vakarisito. Veisau sara ga nona rai me baleta na bula, tinia tale ga nona vakailala kei ira na gone ca. Mai muduka vakadua na goneyalewa oqo na vakatavako, na vakayagataki ni wainimate gaga, kei na butako. Oqo na ka e vakadinadinataka: “Au biuta rawa ga na noqu bula torosobu baleta niu lomani Jiova. O Jiova duadua ga ena nona loloma levu e rawa ni solia vei au na inuinui ni bula tawamudu.” Sa oti na nona dau guta tu na veika tawayaga.

⁴ Ke ra mani sega ni via vakarorogo na tamata, se yaga ga na nomu cakacaka. Era kila nira sa sikovi vei ira na iVakadinadina i Jiova. E vakadinadinataki tale ga kina na nomu yalodina kei na nomu loloma. O koya gona, e ka wale beka na nomu vakayacora na cakacaka ni Turaga? Sega sara!