E Vakadredretaka Beka Nomu Cakacaka Vakavunau?

¹ Levu sara era tamata osooso, wili kina o keda na iVakadinadina i Jiova​—nida oga vakalevu ena kena vulici na Vosa ni Kalou, lakovi na soqoni vakaivavakoso, kei na cakacaka vakavunau. Ni sa tiko mada oqori, sa qai tiko tale na cakacaka saumi, cakacaka e vale, se ka ni vuli, kei na levu tale na icolacola e dau kania na gauna. Sa bau ka ni bolebole dina na veika oqori, vakabibi vei ira na ulunivale.

² Ni dredre na bula vakailavo ena so na vanua, e taura e levu na gauna kei na nodra cakacaka vakaukaua na ulunivale mera qarava rawa kina nodra vuvale. Dua na gauna levu kei na igulevu era vakayagataka ena nodra cakacaka saumi, sa rauta me tosotoso dredre kina na nodra cakacaka vakavunau. De ra na nanuma e so ni lailai sara na ka era na rawata ena cakacaka vakavunau baleta ni sa tiko na nodra icolacola mera vakarautaka na veika vakayago mera bula kina nodra vuvale. (1 Tim. 5:8) Sa macala tu ni levu na dredre ena sotavi ena kena qarai na ka meda bula kina e veisiga. Ia e sega ni tukuni me mai vakadredretaka wale na noda vunautaka na itukutuku vinaka na noda cakacaka saumi. (Mari. 13:10) De vinaka meda dui dikeva mada na keda ituvaki.

³ Ni sega ni macala tu na itosotoso ni vuravura, de dua ena vakayagataka e dua na iwase levu ni nona gauna o ulunivale ena cakacaka saumi, baleta me rawa ni vakavakarau tu ga kina ke mani tadre mai muri na bula vakailavo. (1 Kor. 7:31) De dua eda na volia e levu na ka, levu tale ga na ka ni lasa eda lakova kei na vanua eda na gade kina baleta na ilavo eda rawata tiko mai ena noda vakalevutaka noda gauna ni cakacaka. Ia kevaka e lai vakalatilati oqori ena noda bula vakayalo kei na noda lakova e veigauna na soqoni, oqori beka na ka eratou na marau se vakacegu dina kina na noda vuvale? E bibi kina meda qarauna na veika ena vakaleqai keda vakayalo. E ka vakayalomatua meda muria na ivakasala i Jisu meda ‘kumuna na noda iyau mai lomalagi,’ meda ‘vutuniyau kina ena veika ni Kalou.’​—Maciu 6:19-21; Luke 12:15-21.

⁴ Vakasaqara Taumada na Matanitu ni Kalou: A vakavulici ira na nona imuri o Jisu me vakaliuci duadua ga na veika vakayalo. A kaya vei ira: “Mo dou qai kakua ni lomaocaoca, ka kaya, A cava eda na kania? se, A cava eda na gunuva? se, A cava eda na vakaisulu kina?” Na cava e kaya kina oya? A vakamacalataka: “Ni sa kila na Tamamudou vakalomalagi sa yaga vei kemudou na ka kecega oqo.” Kevaka eda vakabauta dina na vosa oqo, ena sega na ka me na vakadredretaka na noda cakava na ka e qai kaya tale o Jisu: “Dou vakasaqara taumada na matanitu ni Kalou, kei na nona yalododonu: ia ena soli me kenai kuri vei kemudou na ka kecega oqo [se ka e yaga vei kemudou].” Ena raica sara ga na Kalou me yaco oqori! (Maciu 6:31-33) E sega ni kena gauna oqo meda vagolei tani tu ena levu ni kena lomaocaocataki na noda ka ni bula ni veisiga se na noda vinakata na bula e vinaka cake ena ivakarau ni veika e sa na vakarau takali tiko yani.​—1 Pita 5:7; 1 Joni 2:15-17.

⁵ Na inaki levu ga ni noda cakacaka saumi oya meda rawata tiko kina na noda ka ni bula ni veisiga. Ia me vakaevei na levu ni ka meda rawata? A vola na yapositolo o Paula: “Kevaka sa tu vei keda na kakana kei nai sulu, me da lomavinaka kina.” De dua e sa sivia tale na ka eda via rawata. Ke vaka kina, eda sa na rairai tamusuka tiko na vua ni veika a veivakasalataki kina o Paula: “Ko ira era sa gadreva me ra vutuniyau, era sa bale ki na dauvere kei nai cori, kei na gagadre ca e vuqa, ka lialia, ka dauveivakacacani, oqori sa luluvuraki ira na tamata e na mate kei na rusa.” (1 Tim. 6:8, 9; Maciu 6:24; Luke 14:33) Eda kila vakacava ni sa vakadredretaka tiko na noda itosotoso na noda gadreva vakasivia na ka?

⁶ Kevaka e veivakaosoosotaki na veika vakayago eda guta me lailai wale sara kina na noda vakaitavi ena cakacaka vakavunau se da sega ni raica rawa na kena bibi me vakaliuca tiko ga na vunautaki ni itukutuku vinaka veitalia na cava, de dua e sa rairai kena gauna meda tei dikeva tale mada se cava sa ka bibi duadua tiko vei keda. (Iper. 13:15, 16) Ena yaga vakalevu kevaka meda vakarawarawataka ga na noda bula, ni na wali kina na ka e vakadredretaka tiko oqo na noda cakacaka vakavunau. Ena vuku ni noda vakayagataki gauna kei na noda igu, e dodonu me dau vakaliuci tiko ga kina na veika e vauca na Matanitu ni Kalou.

⁷ Na Cakacaka e Sega ni Ka Wale Ga: Eda uqeti e veigauna ena vosa i Paula meda dau ‘vakaogai keda tiko ga ena cakacaka ni Turaga, nida kila ni sa sega ni ka wale ga na noda cakacaka ena vuku ni Turaga.’ (1 Kor. 15:58, VV) Na “cakacaka ni Turaga” bibi duadua na vunautaki ni Matanitu ni Kalou kei na nodra vukei na tamata mera tisaipeli. (Maciu 24:14; 28:19, 20) Ena rawa wale ga nida cakacaka vakavunau e veimacawa ena kena levu eda rawata kevaka eda tikica laivi na kena gauna da qai kua ni vakayagataka na gauna oqori ena so tani tale na ka. (Efeso 5:15-17) Ke da vakayacora oqori, ena qai sega ni vakadredretaka na noda lakova na cakacaka vakavunau na noda cakacaka saumi se cava tale.

⁸ Nida soli keda meda lai kacivaka yani vei ira na wekada na vosa ni Kalou, eda na vakila kina na marau levu. (Caka. 20:35) Kevaka eda dei tiko ga ni vakayacora noda cakacaka vakavunau, eda na sega ni yalolailaitaka na noda veisiga mai muri baleta nida kila ‘ni sa sega ni tawadodonu na Kalou me guilecava na noda cakacaka, kei na loloma eda vakatakila ina yacana.’​—Iper. 6:10.