Soqo ni Tikina ni iVakadinadina i Jiova ni 2000—“Muria na Vosa ni Kalou”
1 “Au na vakamolimoli vei kemuni e nai soqosoqo levu; ka’u na vakavinavinaka vei kemuni e na kedra maliwa na lewe vuqa.” (Same 35:18) Ena wacava na marau i Tevita ke raici ira na lewe vica vata na udolu ena gauna oqo era soqoni ena vakacegu mera rogoca na ivakavuvuli vakalou ena noda veisoqo ni tikina! O dua beka o iko o wili vata kei ira na lewe 5,489 era a tiko ena Soqo ni Tikina, “Na Vosa ni Yalayala ni Kalou” ena yabaki sa oti? Ena dua tale na gauna vinaka vei keda na noda soqo ni tikina ni 2000 meda soqoni vata kina kei ira na noda itokani meda lagiti Jiova, o ira oqo “era kauaitaka na nodra gagadre vakayalo,” era marau, ra gadreva tale ga mera “rogoca . . . na ka sa tukuna na Yalo Tabu kivei ira na veisoqosoqo.”—Maciu 5:3, NW; Vkta. 2:29.
2 Vanua Kei na Tikinisiga ni Soqo: Ena vakayacori tiko na soqo ena yabaki oqo e Suva, Labasa, kei Lautoka. Na soqo e Suva ena vakayacori tiko ena National Stadium, ena 22-24 Sepiteba. Ena rogoci na porokaramu taucoko ena vosa vakavalagi kei na vosa vakaviti. Ena sega ni rogoci ena dua tale na vanua ni soqo na porokaramu kece ena vosa vakavalagi, oni kerei gona na via rogoca na porokaramu ena vosa vakavalagi mo ni na tiko ena kena oqo. Ena vakayacori na soqo e Labasa ena Subrail Park, ena 6-8 Okotova, ena rogoci ga vakalevu na porokaramu ena vosa vakaviti. Ena vakayacori na soqo e Lautoka ena Churchill Park, ena 13-15 Okotova. Ena rogoci ena soqo oqo na porokaramu taucoko ena vosa vakaviti kei na vosa vakaidia.
3 Na ivavakoso yadua e kerei me na tiko ga ena soqo e voleka kina. Na ivavakoso kece mai Navua me yaco i Korovou era kerei mera na tiko ena soqo e Suva. Na kena vo ni ivavakoso kece e Viti Levu mera na tiko ena soqo e Lautoka. Na ivavakoso kece, wili kina o ira na iwasewase lalai kece mai Vanua Levu, kei ira ena veiyanuyanu lalai era volekata mera na tiko ena soqo e Labasa. O ira na tacida mai Rotuma kei ira ena veiyanuyanu lalai tale e so mera na tiko ena soqo ga e rawarawa vei ira.
4 Vakarautaki ni iCili: Ke oni vakaicili vei ira na nomuni itokani se vei ira na wekamuni, e kerei mo ni qai veivosakitaka ga. E vaka tale ga kina vei ira na vakaicili ena otela. Me kua ni guilecavi, ke gadreva na otela e dua na ilavo me ivakadei ni nomu rumu, mo vakauta ga vakadodonu oqo ina otela. Ia, ke mani yaco e muri mo via veisautaka na nomu icili ena otela, yalovinaka tukuna tale vei iratou me kua kina ni maumau na vakalalai tu ni rumu. Eda sega ni via vakarogorogocataki ira na tamata i Jiova se meda cakava na ka me vosavakacacataki kina na yaca tabu ni Kalou.
5 Kerei ni iCili Vei Ira na Mataveitacini: Ke so e sega ni rawa nira veivosakitaka na nodra icili, oni kerei mo ni vakauta na nomuni ivola ni kere icili ina tabana e qarava na soqo. Ena veivosakitaki na nomuni icili ena nodra vale na mataveitacini. Oni vakauqeti kina na tiko ena vanua ni soqo, se oni tiko voleka, ke rawa ni oni vakaicilitaki ira na tacida era na lako vakayawa mai ena kena levu e rawa. De da na veiosoosoti beka, ia ena vica wale ga na bogi.
6 Sa dodonu mera sa volavola oti na tabana e qarava na dui soqo yadua ina veivavakoso e wili ena yasayasa era qarava me tarogi kina o ira na via kerea na icili ena vakarautaka na tabana ni soqo. Ni kerei me qaravi totolo na tikina oqo. Ena kerei na vuvale yadua e kere icili vei ira na mataveitacini mera na vakalewena e dua na fomu ni kere icili e vakatokai na Room Request Form. Era na kere icili ga na dautukutuku era ivakaraitaki vinaka, ra vakaitovo na luvedra, qai veitokoni kina na Komiti ni Cakacaka ni iVavakoso.
7 Nodra Qaravi o Ira na Gadreva na Veivuke: Yalovinaka, mera nanumi o ira na sa qase, o ira na tauvimate se malumalumu, o ira na cakacaka vakatabakidua, se so ena ivavakoso era na gadreva na veivuke mera na tiko rawa kina ena soqo. Mera veivuke vakayalololoma o ira na wekadra, o ira na qase ni ivavakoso, se dua ga ena ivavakoso e kila na leqa era sotava tiko o ira oqo.—Vakatauvatana 1 Timoci 5:4.
8 Navuca Mo na Tiko Kina: E saga tiko beka o Setani me vakamuai iko tani mo kua ni kauaitaka na veika vakayalo? E ka ni rarawa ni levu vei ira na tacida tagane kei ira na tacida yalewa, kei na nodra vuvale era sa calata tiko na kakana vakayalo e dodonu mera kania. Ena sala cava? Ena nodra sega ni dau tiko ena porokaramu ni soqo ena Vakaraubuka. E laurai ena so na gauna ni dua na iwase levu ni mataveitacini era calata na veivakasalataki vakayalo, kei na veimaliwai ena soqo ena Vakaraubuka.
9 E kena irairai ni so na tacida e sega ni lomadra mera kerea vua na itaukei ni cakacaka ke rawa nira vagalalataki mai ena cakacaka mera tiko ena soqo. E vaka tale beka ga kina o iko? Vakacava mo masulaka vei Jiova, qai saga mo yalodoudou mo vakamacala rawa kina vua na itaukei ni nomu cakacaka me baleta na nomu na via tiko ena soqo? Nanuma ni ituvaki vata ga oqo a sotava o Niemaia, a qai tini vinaka vua. (Niem. 2:1-6) Mo vakabauta ni tu vakarau na Tamada vakalomalagi me vukei iko, ke o vakaliuca na veika e baleta na nona Matanitu, ena vakarautaka na veika mo bula kina.—Maciu 6:32b, 33.
10 Ena icavacava ni ivakataotioti ni veisiga oqo, sa qai gadrevi ga vakalevu na noda soqo ni tikina vakayabaki. E isolisoli i Jiova meda vakabulabulataki kina vakayalo, meda dei tiko ga. O koya gona, vakadeitaka e lomamu mo na tiko ena siga tolutolu ni soqo ni tikina ni yabaki oqo, na “Muria na Vosa ni Kalou.” O na vakavatukanataka vakacava na ka o sa vakadeitaka e lomamu oqo? Kerea rawa vua na itaukei ni nomu cakacaka mo vagalalataki mai ena cakacaka mo tiko rawa kina ena siga kece ni soqo. Ke sega soti ni o dau rawailavo, mamaroroi rawa oqo mo rawa ni tiko kina ena soqo. Kerei Jiova me vukei iko mo vorata rawa na cava ga e vakalatilati e matamu. Ni o vakayacora oqo, o na vakanamata ina nomu na lai veimaliwai vinaka kei ira na mataveitacini, da qai rogoca vata na vosa ni bula tawamudu mai vua na Tamada vakalomalagi dau loloma, o Jiova.—Vakatauvatana Joni 6:68.
[Kato ena tabana e 3]
Gauna ni Porokaramu
Vakaraubuka kei na Vakarauwai
9:30 a.m. – 5:00 p.m.
Sigatabu
9:30 a.m. – 4:00 p.m.