O se Yalovosovoso Tiko Beka Ga?

¹ “E sega tale ni dua na ka me’u rekitaka vakalevu cake mai na ka oqo: . . . ni ra sa muria tiko ga na dina ko ira na luvequ.” (3 Joni 4, VV) A marautaka vakalevu o Joni na nodra yalovosovoso na luvena vakayalo. E sega ni vakabekataki ni marautaka sara tale ga na Tamada vakalomalagi na nodra “muria tiko ga na dina” na lewe vica na milioni era na yaco mera luvena!​—Vkai. 23:15, 16; 27:11.

² E dina nira yalogu tiko e dua na iwase levu ni tamata ni Kalou ena cakacaka vakarisito, ia e so era sa malumu sobu mai. E rairai era a gugumatua sara ena gauna era se qai tekivu vulica kina na ka dina, ia ni toso tiko na gauna, sa lailai, se sa vakavudua na nodra vakaitavi ena cakacaka ni veivakatisaipelitaki.

³ Sa macala ni so era sa malumu sobu ga ena vuku ni kedra ituvaki vakayago se ni sa kala mai na nodra matanisiga. Ia mera vakacaucautaki ena nodra yalovosovoso. Era sa cakava tiko na levu ni ka era rawata. Ia e dodonu vei keda kece eda sa yalataki keda vua na Kalou meda dui taroga: ‘Sa lailai beka na noqu gauna au vakayagataka ina veika e vauca na Matanitu ni Kalou baleta niu sa rui vakaogai au ena veika ga au taleitaka? Au se ‘gugumatua’ tiko ga, se sa laurai vei au niu “sega ni batabata se katakata”?’ (Vkta. 3:15, 16; Luke 13:24) Meda vakasamataka mada vakabibi se cava eda sa vakayacora tiko, meda qai vakavinakataka ke gadrevi, meda kakua ni guilecava ni sa yalataka tu o Jiova ni na qai solia “na veivakalagilagi, na dokai kei na nona vakacegu vei ira kece era sa cakava na ka dodonu.”​—Roma 2:10, VV.

⁴ Na Sala me Rawati Kina na Yalovosovoso: A yalovosovoso rawa vakacava o Jisu? E vakamacalataka o Paula: “E na vuku ni marau sa viritu e matana, sa vosota na kauveilatai, ka sa sega ni madua ni sa vakalialiai kina, a sa qai tiko sobu ko koya e na liga i matau ni tikotiko-vakaturaga ni Kalou.” (Iper. 12:1-3) E ka somidi wale sara vei Jisu na veivakacacani lekaleka a mai sotava ni vakatauvatani kei na marau sa viritu e matana. Nida vakananuma tale ga na marau e sa viritu e matada ena rawa ni vukei keda meda yalovosovoso tiko ga. (Vkta. 21:4, 7; 22:12) Ke da vakararavi vei Jiova me vakaukauataki keda ena noda vuli vakataki keda, noda tiko wasoma ena soqoni, noda qai kua ni cegu ena masu ena rawa nida vakayacora tiko ga kina na cakacaka e sa lesia vei keda meda cakava.

⁵ E marautaka o Jiova na nodra yalovosovoso na nona tamata yalodina. Meda vakamarautaki koya tiko mada ga vakalevu ena noda “muria tiko ga na dina.”