“Mo Vala e na iValu Vinaka ni Vakabauta”
1 “Mo vala e na i valu vinaka ni vakabauta.” Oqo na ka a uqeti Timoci kina na yapositolo o Paula. (1 Tim. 6:12, VV) A vala tale ga ena ivalu oqo o Paula. Ni vakarau cava na nona bula, a tukuna ena nuidei ni sa vala oti ena ivalu vinaka. (2 Tim. 4:6-8) E vakayacora ena doudou, ena yaloqaqa, kei na yalovosota na taba ni nona cakacaka vakaitalatala kece. Nida vakamurimuria na nona ivakaraitaki, sa rawa tale ga nida nuidei nida sa vala tiko ena kena vinaka duadua eda rawata meda tutaka na vakabauta vakarisito.
2 Me Vakalevutaki na Sasaga: A ogataka o Paula na cakacaka vakaitalatala. (1 Kor. 15:10) Meda ogaoga tale mada ga ena noda qarai ira na tamata lomadina ena noda yalava. (Maciu 10:11, VV) Ena vinakati beka meda yadra vakamataka me rawa nida vunau vei ira e so ena salatu. Se meda vunau beka ena yakavi siga, se ni lutu na karobo, me rawa nida sotavi ira na tamata nira sa dui lesu i nodra vale.
3 Ena vinakati vei keda na lewa vinaka, me dua tale ga na noda ituvatuva matau me kua kina nida dau berata na gauna ni sota ni cakacaka vakavunau vakaiwasewase lalai. Me kena ivakaraitaki, e dau taura e rua taucoko na aua na dede ni nodra ilakolako yani kei na nodra suka tale e so na lewenivuvale e Peceli mai Mereke mera lai vakaitavi ena cakacaka vakaitalatala ena muanimacawa kei na ivavakoso era dui lesi kina. Eda dokai ira tale ga e so na dautukutuku kei ira e so na vuvale ena noda ivavakoso ena yawa ni vanua era dau lakova mai, ia era sega ni dau bera. E dodonu meda vakamurimuria na ivakaraitaki ni gugumatua vaka oqo kei na nodra tuvanaka vinaka na nodra bula.
4 E dodonu meda lesuvi ira kece na tataleitaki eda sotava. Ke da soli ivola vua e dua ena salatu se ena vunau tawalokuci mada ga, da saga meda kila na vanua e tiko kina se meda taura na nona naba ni talevoni. E rawa nida qai sikovi koya meda lai vakasuasuataka na tataleitaki sa tiko rawa, da tovolea tale ga me tekivu vuli iVolatabu.
5 Cakacaka Vakavunau Vakawasoma: E sega wale ga ni dau wasoma o Paula ena vunau, a vakayacora tale ga vakavinaka. (Roma 15:19) Vakaevei o iko? O dau vakaitavi wasoma ena cakacaka vakaitalatala? O sa bau vakaitavi ena cakacaka vakavunau ena vula oqo? Era kauai na qasenivuli ni Vulivola ni iVavakoso mera raica nira sa vakaitavi kece na lewe ni nodra iwasewase ena cakacaka vakaitalatala ena vula oqo o Okosita. Era na vukei iko tale ga mo vakayacora vaka kina.
6 Nida vakamurimuri Paula ena noda tokona ena yalodina na itukutuku vinaka, eda na tomana tiko ga na ‘noda vala ena ivalu vinaka ni vakabauta.’