Cava me Noda iSausau?
1 O keda kece e dau tiko na ka eda vakanamata kina. O ira na nuitaka na bula ena vuravura era vakanamata tu mera na bula tawamudu ena vuravura vou ni yalododonu ni Kalou. Ia e so na ka e rawa ni tagutuva na noda inuinui. E vinakati kina na sasaga vagumatua meda na yavutaka tiko ga na noda bula ena cakacaka ni Matanitu ni Kalou, meda kua kina ni vagolei tani ena gagadre ca ni yago.—1 Joni 2:15-17.
2 Era sega ni kila na tamata ni vuravura na noda isausau na dau kauaitaka na noda veika vakayalo. (1 Kor. 2:14) Nira sasaga rogo, kaukaua, kei na iyau na kawatamata, eda saga o keda na iyau vakayalo. (Maciu 6:19-21) Ke da veisautaka na noda rai me vaka na nodra rai na tamata ni vuravura me baleta na gauna se bera mai, eda na sauva beka na noda isausau vakayalo? Ena totolo sara na kena mai vakaruguta na lomada na ka e tawayaga. Eda na tarova vakacava oqo?
3 “Tokara na Turaga ko Jisu Karisito”. Dua na sala eda na kila kina nida yavutaka na noda veigauna se bera mai ena veika ni Matanitu ni Kalou, na noda dau veitalanoa. E dau wewenigusuda na veika vakayago kei na veika tawayaga? Ke vaka kina, meda dikeva vinaka mada se malele tiko ga na lomada ina veika vakayalo, se sa sega. De rairai gadrevi meda vakabibitaka na noda ‘tokara na Turaga o Jisu Karisito, ka kakua ni vakasamataka tiko na sala meda vakayacora kina na veigagadre ca ni yago.’—Roma 13:14, VV.
4 Era rawa ni ‘tokari Karisito’ na itabagone ke nodra isausau mera na cakacaka vakaitalatala vakatabakidua ena dua na gauna mai muri. A via painia tudei e dua na cauravou, ia na itovo vakavanua ena vanua e susu kina e uqeti ira na cauravou mera rawati ira vakayago. E mani lai tini ogaoga vakasivia tu ena caka bisinisi me yacova sara ni sa ivakarau tu ga ni ka na nona dau tiko ena soqoni, qai caka ga me rawa na nona cakacaka vakaitalatala. Ia ni nuitaka na vosa i Jisu ena Maciu 6:33, qai vakavinakataka na nona bula vakayalo, e rawa kina vua me cakacaka vakatabakidua. Sa qai vinaka na nona lewaeloma, e kaya ni sa qaravi Jiova tiko ‘ena kena levu e rawata.’
5 E kaya na iVolatabu ni ka vakavuku meda dau lalawataka na noda isausau. (Vkai. 21:5, NW) Meda cakava kece mada ga nida vakaliuca tiko na loma ni Kalou.—Efeso 5:15-17.