Rekitaki na Cakacaka Vakatabakidua
1 Ke o itabagone, e sega ni vakabekataki ni o na dau vakasamataka na nomu bula ena veisiga nimataka. E kaya kina na Vosa Vakaibalebale 21:5 (NW), ni “nona lalawa na gugumatua ena yaga vakalevu sara.” Ena yaga gona vakalevu vei iko ke o vakasamataka vakabibi ena gauna oqo se cava mo tekia me isausau ni nomu bula. Ni o lalawa me baleta na nomu veisiga nimataka, vakalewa mada de rawa ni o cakacaka vakaitalatala vakatabakidua. Me baleta na cava?
2 Tarogi ira mada e so era se painia nira se gone se cava na nodra nanuma me baleta na veiyabaki oya, o na raica ni na duavata ga na ka era na kaya: “E gauna vinaka duadua ni noqu bula oya!” Rogoca mada na ka e kaya e dua na tacida tagane sa dua toka na itaba, ia a se tekivu vakila na reki ena cakacaka vakaitalatala vakatabakidua mai na gauna se cauravou kina: “Au dau lomavakacegu niu raica lesu noqu gauna ni gone, au rawa ni kaya niu a muria na ivakasala vuku: ‘Mo nanumi koya ka Buli iko ni ko sa cauravou tiko.’” (Dauv. 12:1) Ia, ena rawa ga ke rau veivuke kina na nomu itubutubu, mo dou lalawataka vakavuku e dua na ituvatuva mo kua ni na calata kina na reki oqo ena gauna ni nomu bula vakacauravou se vagoneyalewa.
3 Ra iTubutubu, Veiuqeti ena Cakacaka Vakatabakidua: O Jiova na Tamada dau loloma, e dusia vakamatata na sala meda lakova. (Aisea 30:21) Na veidusimaki vakayalololoma oqo e rawa ni ka ni vuli vei kemuni na itubutubu lotu Vakarisito. Mo ni kua ni vakatautaka ga vei ira na luvemuni na sala era nanuma ena vinaka mera digitaka, ia mo ni vakavulici ira vinaka ena sala mera lakova me na vakalougatataki ira kina o Jiova. Ke ra vakavulici vinaka ena rawa nira “vakaduiduitaka na vinaka mai na ca” nira sa tamatabula. (Iper. 5:14, VV) O ira mada ga na uabula era kila ni sega ni rawa ni na dodonu e veigauna na ka era vakatulewataka; era na vakararavitaka vei Jiova me vakadodonutaka na nodra ilakolako. (Vkai. 3:5, 6) Vei ira li na itabagone, sa na qai gadrevi vakalevu sara kina!
4 Ra itubutubu, nira se gone sara ga na luvemuni, se nira sa rorova tiko na bula vakaitabagone, ni veitalanoataka kei ira na isausau yaga mera tekia. Sa macala ga nira na veivakamuai na qasenivuli kei ira na nodra icaba e koronivuli mera digitaka na kena sauvi na ka ga vakavuravura e vauca na qarai ni iyau vakayago. Dusimaki luvemu gona me digitaka na lesoni ena vakarawarawataka na nona vuli cakacaka me rawa ni na qaravi koya kina, ia me kua ni vakawalena na veika e vauca na Matanitu ni Kalou. (1 Tim. 6:6-11) Vakavuqa, me rawa vua e dua me kunea e dua na cakacaka me qaravi koya rawa kina ni sa tekivu painia tudei, na ivakatagedegede ga ni vuli e gadrevi me yacova, oya me vakacavara vinaka na nona vuli ena sekeneri qai kuria ga ena dua na vulitara. Se, me vuli cakacaka sara ga ena cakacaka e kunea.
5 Uqeti ira tale ga na itabagone mera kua ni kusata na vakawati. Ke ra qai via vakawati e muri, era sa na bau toka ena dua na ivakatagedegede ena rawarawa kina mera colata na icolacola ni vakawati. (Yalovinaka, raica na itoma ni Noda Cakacaka Vakaitalatala ni Matanitu, June 2001, parakaravu 17, ena ulutaga, “O na Soli Iko Beka Vakarawarawa?”) Ia, ni bera mada ga nira qai lai yacova na bula vakaitabagone, ke ra dau rogoca ni o vakabekabea na cakacaka vakapainia, na veiqaravi ena vanua e gadrevi vakalevu kina na dautukutuku, veiqaravi e Peceli, se na cakacaka vakaulotu, o sa na bucina taudonu sara tiko ga e lomadra mera guta mera na vakayagataka na nodra bula ena sala e marautaka o Jiova, me yaga vei ira na tani, ra qai reki sara tale ga kina.
6 Ra iTabagone, Vakaliuca na Cakacaka Vakatabakidua: Vei kemuni na itabagone, mo ni kua ni vakilakila tiko ga se cakacaka mada vakacava na painia. Ni oni se vuli sara tiko mada ga, oni rawa ni tovolea ke oni painia veivuke ena gauna kece e rawa kina ena loma ni yabaki se ena gauna ni sereki. Oni na qai vakila na totoka ni cakacaka vakapainia! O rawa beka ni lalawataka mo painia veivuke ena loma ni yabaki?
7 Ke o dua na tacida tagane gone ena noda isoqosoqo vakalou, vakasamataka tale ga vakabibi ni rawa ni o tadolo i liu, mo yacova na ivakatagedegede ni dauveiqaravi vakaitalatala. (1 Tim. 3:8-10, 12) Kuria oya, e rawa ni o vakalewa se mo vakalewena na ivolakerekere ni veiqaravi e Peceli, se mo lai vuli ena Koronivuli ni Vuli Veiqaravi Vakaitalatala ni o sa na yacova na yabaki e lavaki. E sega ni tukuni rawa na levu ni ka yaga o na vulica ni o cakacaka vakapainia, me vaka na nomu tuvanaka vakamatau na nomu bula, vakamuria e dua na nomu ituvatuva, na bula veiyaloni, kei na nomu vulica mo cola itavi. O na vakarautaki kina mo tamata nuitaki ena veitavi ena qai vakacolati vei iko e muri.
8 Me rawati vinaka na cakacaka vakaitalatala vakatabakidua, e dua na ka bibi ena gadrevi oya meda qacoya se me gu na yaloda ena cakacaka vakalou. Oqo na ivalavala e uqeta na yapositolo o Paula me tiko vei keda, e tukuna tale ga na kalougata ena rawati kina: “Na ka kecega dou sa cakava, kitaka mai na vu ni yalomudou me vaka vua na Turaga, . . . ni dou sa kila dou na rawata mai vua na Turaga nai votavota me kenai sau.” (Kolo. 3:23, 24) Me vakalougatataki kemuni mada ga o Jiova, me levu na ka oni rekitaka ena cakacaka vakatabakidua!