Marautaka Noda Duavata kei Rau o Jiova kei na Luvena
Na Soqo Bibi Duadua ni Yabaki ena Vakayacori ena 28 Maji
1 Nida vakananuma na iVakayakavi ni Turaga ni sa dromu oti na siga ena 28 Maji, 2002, eda vakaraitaka kina nida marautaka noda duavata kei na Kalou o Jiova kei Jisu Karisito. Ena soqo namaki oqo, era na marautaka kina na vo ni lumuti lotu Vakarisito nodra “veitokani” vinaka kei ira na so tale na lewe ni Matanitu ni Kalou, vata kei rau o Jiova kei na Luvena. (1 Joni 1:3, VV; Efeso 1:11, 12) E vica na milioni na ‘so tani tale na sipi’ era na vakananuma nodra itutu vakasakiti nira mai duavata kei Jiova vaka kina na Luvena, nodra duavata kei rau ena lomadra kei na nodra vakasama ena kena vakayacori na cakacaka ni Kalou!—Joni 10:16.
2 Cakacaka Vata Nida Veiwekani Voleka: Ena veigauna kece erau dau marautaka nodrau duavata o Jiova kei Jisu. Erau veivolekati sara ena vica vata na bilioni na yabaki ni se bera ni buli na tamata. (Maika 5:2) E titobu na nodrau veilomani. E kaya kina na vatuka ni vuku, na Luvena ulumatua, ni se bera ni mai bula vakatamata: “Ka’u a nona ka e daurekitaki e na veisiga, ka’u a marau tiko e matana.” (Vkai. 8:30) E vakayacoka vua na Luve ni Kalou na balavu ni gauna e veimaliwai vakavoleka kina kei koya na iVurevure ni loloma!—1 Joni 4:8.
3 Nida gadreva na kawatamata meda sereki mai na noda ivalavala ca, e digitaka o Jiova na Luvena duabau e dau marautaki ira na tamata me isoro ni veivoli, o koya e noda inuinui duadua ga. (Vkai. 8:31) Me vaka ga ni rau duavata o Jiova kei na Luvena ena nodrau cakava vata e dua na inaki, eda duavata tale ga kina kei rau ena ivau kaukaua ni loloma ena kena vakayacori na inaki i Jiova.
4 Vakavinavinaka Mai Vu ni Yaloda: Noda tiko ena iVakananumi da qai vakarorogo vakavinaka, e vakaraitaka noda vakavinavinakataka na nona loloma o Jiova kei na Luvena e mai cabori koya. Ena vakabibitaki na ivakaraitaki vakayalololoma i Jisu, nona yalodina me yacova nona mate, nona veiliutaki me vaka ni Tui ni Matanitu ni Kalou sa tauyavu oti, kei na veivakalougatataki ena kauta mai na Matanitu oya vua na kawatamata. Eda na vakadreti tale ga ena bibi ni noda vakaraitaka tiko ga na noda vakabauta, da gumatua ni vakayacora tiko ga na inaki i Jiova nida sa “veitokani . . . e na cakacaka dina.”—3 Joni 8, VV; Jeme. 2:17.
5 Vukea e So Tale Mera Tomani Keda: Mera saga vakaukaua na ilawalawa qase mera uqeti ira na dautukutuku mate ena nodra dui yalava mera tiko ena iVakananumi ni mate i Jisu. (Maciu 18:12, 13) Me volai vakamatata na yacadra mera na sikovi me kakua kina ni guileca e dua.
6 O kila tale tiko beka e so e rawa mera lako mai ena iVakananumi? Mo vakaraitaka sara ga vei ira na bibi ni soqo oqo. Sureti ira vakayalololoma qai kauaitaki ira. Meda saga meda sureti ira kece na noda vuli iVolatabu, o ira na tataleitaki vaka tale ga kina o ira na lewe ni noda vuvale kei ira na noda veikilai mera mai tiko ena soqo bibi duadua ni yabaki oqo. Na yaga ni ivoli e tu vakarawarawa vei ira kece era vulica ni “uasivi cake . . . na veikilai kei Karisito Jisu.” (Fpai. 3:8) O ira na cakacakataka na nodra vakabauta na isoro i Karisito era rawa ni nuitaka na bula tawamudu.—Joni 3:16.
7 Kakua ni vakalailaina na vakayacoka ni iVakananumi vei ira na yalodina. Yabaki rua sa oti ena yanuyanu o Papua Niu Kini, e 11 na tataleitaki era vodo waqa ena loma ni 17 na aua ena wasawasa voravora mera tiko ena iVakananumi. Na cava na vuna? Era kaya: “Keimami via marautaka na iVakananumi i Karisito vata kei ira na tacida era duavata ni qaravi Jiova, oya na vuna e yaga dina kina na neimami lako mai.” Vakasamataka na yalogu era vakaraitaka na tataleitaki kei na nodra marau ni duavata kei Jiova, na Luvena kei ira na mataveitacini vakarisito!
8 Sureti ira na tataleitaki mera vulica na iVolatabu. Uqeti ira mera lakova wasoma na soqoni, ra qai wasea tale ga vei ira na tani na ka dina era sa vulica tiko. Vukei ira mera ‘lako ena rarama’ ra qai ‘cakava na ka dina’ ena nodra bulataka na ivakavuvuli vakaivolatabu. (1 Joni 1:6, 7) Vukei ira tale ga mera bucina na veiwekani voleka kei Jiova mera qai tomana tiko ga nodra vakavinavinakataka na itavi dokai ni duavata ni cakava na loma ni Kalou.
9 Sa dua na ka dokai meda marautaka ena duavata noda ‘yalovata, gumatua ena lomavata me tubu kina na vakabauta na itukutuku vinaka’! (Fpai. 1:27, 28) Meda vakanamata yani ina veimaliwai totoka ena iVakananumi ena 28 Maji, ena noda vakavinavinakataki Jiova kei na Luvena!—Luke 22:19.