Meda Dau Vakananuma na iSoro ni Veivoli
1, 2. Cava na vuna meda dau vakananuma kina na isoro ni veivoli?
1 Ena nodra muria na ivakaro i Jisu na lotu Vakarisito, era na vakananuma tiko kina e vuravura raraba na nona mate ena siga Vakarauwai 22 Maji, 2008, ni sa dromu oti na matanisiga. (Luke 22:19; 1 Kor. 11:23-26) Eda na cakava qo baleta nida vakavinavinakataka na ka a mai vakayacora rauta na 1,975 na yabaki sa oti. Qo na nona yalodina tiko me yacova sara nona mate ena kau ni rarawa, e sauma vinaka kina o Jisu na nona veivakatotogani o Setani qai vakaraitaka nona vakarokorokotaka na yaca i Tamana.—Jope 1:11; Vkai. 27:11.
2 Na kena mai dave na dra i Jisu e mai vakadeitaka kina na veiyalayalati vou, rawa kina vei ira na tamata i valavala ca mera okati mera luve ni Kalou ra na qai lai veiliutaki vata kei Karisito ena Matanitu vakalomalagi. (Jere. 31:31-34; Mari. 14:24) Na nona lomani keda na Kalou e solia mai kina na Luvena e dau lomana vakalevu me mai mate ena vukuda, me vaka ga nona ivakamacala o Jisu vei Nikotimo.—Joni 3:16.
3. Ena yaga vakacava noda na tiko ena iVakananumi?
3 Veisureti: A vakaturi ena Noda Cakacaka Vakaitalatala ni vula o Janueri meda vola na yacadra eda na via sureta. Vakacava o sa tekivu sureti ira tiko? O sa cakava beka e dua na ituvatuva mo vakaitavi ena cakacaka lavotaki ena tekivu tiko ena 1 Maji, mo veisureti kina ena iVakananumi? O ira na tiko ena soqo bibi qo era na rogoca na ivunau yavutaki vakaivolatabu me vaqaqacotaka nodra vakabauta na isoro ni veivoli, nira na rawata kina na bula tawamudu.—Roma. 10:17.
4. Na cava meda totolo yani kina ena gauna ni iVakananumi?
4 Meda yaco totolo yani meda lai kidavaki ira na vulagi era sureti mai. Nira dau lewe levu era tiko ena iVakananumi gadrevi kina noda kauaitaki ira na ka vovou vaka kina o ira na dau mai soqoni ena so na gauna.
5. Rawa nida vakarautaka vakacava na lomada ena soqo qo?
5 Meda Vakarautaka na Lomada: E tiko ena Dikeva na iVolatabu e Veisiga—2008 kei na Calendar ni 2008 na ituvatuva ni wili iVolatabu ena iVakananumi tekivu ena 17 Maji. Meda Vakananuma na veika bibi a yaco ena iotioti ni siga ni nona bula e vuravura o Jisu me rawa ni vakarautaka na lomada ena iVakananumi. (Esera 7:10) Noda vakananuma vakatitobu na tikinivolatabu kei na noda dau masu ena vakatitobutaka noda lomani Jiova kei na luvena ena nona vakarautaka mai na isoro ni veivoli.—Same. 143:5.
6. Ena yaga vakacava vei keda noda vakavinavinakataka na isoro ni veivoli?
6 Ni sa roro mai na siga ni iVakananumi, meda vakarautaki keda vakavinaka kei na so tale ena soqo bibi qo. Noda vakananuma na isoro ni veivoli ena vaqaqacotaka noda veiwekani kei Jiova kei na luvena. (2 Kor. 5:14, 15) Ena uqeti keda tale ga meda vakatotomuri rau ena noda lomani ira na so tale.—1 Joni 4:11.