“Muria Tikoga na Ka e Vinaka”

¹ Na bula Vakarisito e okati kina na nona ‘muria tiko ga na ka e vinaka vei ira na tamata kece ga.’ (1 Ces. 5:15) Dau votu mai na soqo ni tikina na ituvaki eda rawa ni caka vinaka kina vei ira tale e so. Ena gauna vaka oqo, era dau raici keda mai na tamata kece ga, ra dau vakalewa tale ga na noda ivalavala. Nida iVakadinadina i Jiova, meda taqomaka na keda irogorogo vinaka ena noda dau “doka na tamata kecega.” (1 Pita 2:17) E okati e ke na ‘noda kua ni nanuma ga na ka e baleti keda, ia meda dau nanuma tale ga na ka e baleti ira na tani.’ (Fpai. 2:4) Meda raica mada se yaga vakacava oqo ena noda dau kere icili ena gauna ni soqo ni tikina.

² O sa vakadeitaka oti na nomu icili ena otela o via vakaicili kina? (1) Kerea me maroroi ga na iwiliwili dina ni rumu o na vakayagataka. (2) Nanuma tiko ni na sega ni vakadeitaka na nomu icili na otela vakavo ga ke o sauma rawa vakailiu na kena ivakadei. (3) Ena siga o tadu kina ena nomu otela, vakaraitaka na yalo ni vakavinavinaka kei na veidokai vei ira na veiqaravi ena vukumu. (4) Ke vakarautaki na ikatalau e sega ni saumi, vakayagataka vakayalomatua na ituvatuva oqori ni caka me baleti ira ga na vulagi ena otela. (5) Muria na idusidusi kece ni otela me baleta na vakayagataki ni veika e tu kina.

³ Tuberi na Gone Mera Caka Vinaka: So na gauna era dau vakavuleqa ena otela o ira na gone era biu tu ga vakaveitalia. (Vkai. 29:15) Oqo e baleta nira ogaoga na itubutubu ena so tale na ka, ra sega kina ni tiko mera vakaraici ira voli na luvedra ena nodra rumu ni otela, ena tobu ni sili (swimming pool), se so tale na vanua ena otela. Ni sa sivia tale nodra vakosakosa e so na gone, sa dau lewa kina na otela me sa vakatabui vei ira na vakayagataki ni so na ka ni veivakamarautaki e kea, wili kina na tobu ni sili se so tale na vanua vaka oya. Ia na vakatatabu oqo e lai vakaleqai ira tale e so na vulagi ena otela, o ira era iVakadinadina i Jiova kei ira era sega.

⁴ Ra itubutubu, de vinaka ni se bera na soqo ni tikina, mo ni dabe kei ira na luvemuni mo ni veivosakitaka ni bibi me kune vei ira na itovo vakarisito ena gauna kece ga kei na vanua kece ga era tiko kina. (Efeso 6:4) Me kena ivakaraitaki, vakamacalataka vei ira ni o koya e kune vua na loloma dina vakarisito ena “sega ni qara na ka me nona ga, sa sega ni cudrucudru.” (1 Kor. 13:5) Ena qai vakadinati ga vakalevu na veivosa oqo ke ra ivakaraitaki sara mada ga kina o ira na itubutubu. Kemuni ragone, mo ni caka vinaka ena nomuni talairawarawa vei ira na nomuni itubutubu, nomuni veidokai ni oni tiko ena otela, kei na nomuni dau veinanumi. (Kol. 3:20) Nida saga vata meda caka vinaka vei ira na tamata kece ga, eda sa “vakarogovinakataka nai vakavuvuli ni Kalou, na nodai Vakabula e na ka kecega.”​—Taito 2:10.

⁵ Na noda itovo vinaka e sega wale ga ni tarai ira na vakaraici keda tu mai, e bau lauti ira tale ga na dau vakalewai keda ena so na ka. Ena ka kece ga eda cakava ena soqo ni tikina se na loma ni koro e caka kina na soqo​—se da taubale tiko e gaunisala, kana ena valenikana, vakacegu toka mai na noda otela, se vunau tawalokuci ena gauna eda lalaga kina​—me kune mada ga ena noda vosa kei na ivalavala vakarisito nida dua eda dau muria na ka vinaka.

[Kato ena tabana e 4]

Nanuma Tiko:

■ Veidokai, veinanumi vei ira na veiqaravi ena otela.

■ Muria na idusidusi e virikotori ena otela, ni na yaga oqori vei ira kece na vulagi.

■ Vakayagataka vakayalomatua na ituvatuva me baleta na ikatalau e sega ni saumi.

■ Qarauni ira vinaka na luvemu kei na veika era vakacakava.