Gauna Vinaka ni Veivakaukauataki
1 Sega ni dua na siga me sega ni vakatovolei kina na nodra vakabauta na tamata i Jiova. Sa qai gu vakalevu ga oqo na Tevoro me vakaseva na noda yalodina vei Jiova ni kila ni sa lekaleka na nona gauna. (Vkta. 12:12) Rui bibi kina meda ‘vakaukauataki keda ena noda tu vata kei na Turaga kei na nona kaukaua levu’ meda rawa kina ni ‘veivorati ena siga ca, ia ni sa oti kece oya, meda qai tudei.’—Efeso 6:10, 13, VV.
2 Na veisoqoni eda dau lakova kei ira na tacida vakayalo era isolisoli i Jiova meda vakaukauataki kina. A vakamareqeta na isolisoli oqo na yapositolo o Paula. Dua na ka nona gadreva me veimaliwai kei ira na tacina vakarisito me rawa ni yaco kina na ‘veivakaukauataki kei na veivukei.’ (Roma 1:11, 12, VV) E vakarautaka kina vakayalololoma na iLawalawa Dauvakatulewa na gauna veiganiti ni veivakaukauataki vakayalo meda rawa ni cakava tiko ga kina na loma ni Kalou. Na gauna oqori na Soqo ni Tikina sa roro tiko mai na kena usutu, “Dauvunau Gugumatua ni Matanitu ni Kalou.”
3 Tauca na Kena Vinaka ena Nomu Tiko Kina: Vakadeitaka oqo mo tiko ena siga tolutolu. Eda na tauca na ‘vinaka’ ni soqo nida yaco yani ni se bera na imatai ni sere, da qai tiko me yacova sara na iotioti ni masu meda “vakaemeni” kina. (Aisea 48:17, 18) Ni se yawa tu na siga, ena vinakati mera lalawataka nodra gauna ni cakacaka e levu me kua kina nira calata na siga tolutolu ni soqo. Macala tu ga ni sega ni rawarawa na kere gade vua na nomu itaukei ni cakacaka, ia meda kila tiko ni o Jiova e sa yalataka tu ni na vukei keda meda cakava na lomana. (1 Joni 5:14, 15) Ke da se bera ni vakayacora, sa kena gauna sara ga oqo me lalawataki rawa na noda ilakolako ina vanua ni soqo kei na noda icili, me kua kina na cumuaqara e muri. Meda kila tiko ni na vakalougatataka o Jiova na noda sasaga meda tiko ena siga tolutolu ni soqo.—Vkai. 10:22.
4 Namaka na Gauna ni Veivakaukauataki: O sa bau biubiu oti mai na dua na soqo ni tikina o qai kaya: “Oya na soqo totoka duadua!” Na cava beka o kaya kina oya? E baleta ga nida tamata ivalavala ca, qai sega ni tarovi rawa na kena dau luluqa mai na noda igu vakayalo. Oya na vuna e gadrevi kina na veivakaukauataki vakayalo. (Aisea 40:30) E kaya e dua na tacida yalewa: “Dau vakadadagataki au sara ga na vuravura qo, ia na soqo ni tikina e vaqaqacotaka noqu rai vakayalo, e vakaukauataki au tale vakayalo. Kena irairai ni yaco donu mai na veivakaukauataki ena gauna au gadreva sara tu ga kina.” De dua, o vakila tale ga oqo.
5 Sega wale ga nida vakaukauataki ena ivunau kei na veitarotarogi eda dau rogoca, ia e tiko e so tale na itavi momona ena soqo eda vakila kina oqori. E kaya e dua na tacida: “Au dau taleitaka dina na ivakavuvuli vakaivolatabu e sereki qai vakamatatataki na kedra ivakavakayagataki. E yaga na drama, niu sarava kina na veika me vulici, se vinaka se ca, mai na nodra ivakaraitaki era bula e liu. Dua tale ga na ka au dau vakanamata kina na soli ni ivola vovou, au qai dau wilika se baci wilika ni sa oti makawa na soqo.”
6 Era isolisoli yaga dina i Jiova na soqo ni tikina ena ‘veigauna dredre’ oqo. (2 Tim. 3:1, VV) Eda vukei kina meda muria na veivakadreti vakalou e kaya: “Dou vakatawa, dou tu dei e na vakabauta, dou tamata qaqa, dou gumatua.” (1 Kor. 16:13) Me noda inakinaki mada ga meda na tiko ena gauna kece ni soqo da qai tauca na yaga ni veivakaukauataki levu vakayalo ena vakarautaki tiko ena soqo ni tikina na “Dauvunau Gugumatua ni Matanitu ni Kalou”!
[Kato ena tabana e 3]
Lalawataka Mo Tiko ena Siga Tolutolu
■ Kerea rawa nomu gade.
■ Kere icili rawa ena vanua ni soqo.
■ Lalawataka rawa nomu ilakolako mo yaco kina ina vanua ni soqo.