O “Vinakata” Mo Vukei Ira Tale e So?
1 E kauaitaki ira dina na tamata o Jisu. Ni a kere veivuke vua e dua na vukavuka, a dodoka na ligana o Jisu, tarai koya, qai kaya: “Au sa vinakata. Mo savasava mai.” (Mari. 1:40-42, neitou na matanivola kala.) Na sala cava eda rawa ni vakatotomuria kina na ivakaraitaki i Jisu meda vukei ira tale e so?
2 Ira na Tataleitaki: E tiko na nodra itavi na lewe ni ivavakoso yadudua mera vukei ira na tataleitaki mera mai sokaloutaki Jiova. Nira mai tiko ena soqoni, kidavaki ira qai saga mo ni veikilai. Vakasaqara e so na sala mo uqeti ira kina. Vakacaucautaki ira nira vakamacala. Vakavinavinakataka na sasaga era cakava tiko mera bulataka na ivakavuvuli vakaivolatabu. Vukei ira mera raica nira itokani dina era tiko ena ivavakoso.
3 Tacida Vakayalo: E levu tu na sala meda vukei ‘ira kina eda veitokani ena vakabauta.’ (Kala. 6:10) Levu era tautauvimate. Ni veiuqeti nomu veisiko, ena yaga vei ira, o na rairai vukei ira ena so tale na ka. E so era sotava tiko na ka rarawa. Vakaraitaka nomu kauai ni o vakarogoci ira qai vakaukauataki ira. (1 Ces. 5:14) Nira cakava tiko na nodra itavi na qase era na gadreva na noda veitokoni. (Iper. 13:17) Na noda lomasoli kei na yalo ni veivukei, e rawa ni ‘vakacegui’ ira na tacida vakayalo.—Kolo. 4:11.
4 Lewenivuvale: Meda saga ni vakatotomuria na ivakaraitaki i Jisu ena noda kauaitaki ira na noda lewenivuvale. Na veikauaitaki titobu ena uqeti ira na itubutubu mera vakavulici luvedra ‘ena ivunau kei na ivakavuvuli i Jiova.’ (Efeso 6:4) O ira na gone e rawa nira cakava na nodra itavi mera vakavakarau totolo ena gauna ni vuli vakavuvale, soqoni ni ivavakoso, se cakacaka vakavunau. O ira na gone era sa qase cake e rawa nira dau nanuma lesu na yalololoma i Jisu, ra qai yalovinaka ni vukei ira na nodra itubutubu mera tutaka na leqa era sotava tiko nira sa qase. Ena sala oqo kei na so tale, eda rawa kece ni ‘kitaka na ivalavala dodonu ena noda dui vuvale.’—1 Tim. 5:4.
5 Noda vakatotomuri Jisu nida vukei ira na so tale e rawa nida vakalailaitaka kina na noda leqa qai veivolekati kina noda vuvale kei na ivavakoso. O koya e bibi sara, ni na dokai kina o Jiova na “Tama ni loloma.”—2 Kor. 1:3.