Kakana Vakayalo ena Kena Gauna Dodonu
1. E vakayacori tiko vakacava nikua na Isikeli 36:29?
1 E kaya na Kalou Cecere o Jiova: “Ka’u na kaciva na sila, ka vakalevutaka, ka sega ni vakayacora tale vei kemudou na dausiga.” (Isik. 36:29) E sa vakayacori tiko vei ira na tamata ni Kalou nikua na parofisai oqo. E vakaibalebaletaki ena nona vakarautaka vakalevu o Jiova na sila vakayalo me baleti ira na nona tamata. E dua na ivakaraitaki vinaka ni tikina oqo na kakana totoka vakayalo e dau vakarautaki mai ena soqo ni tikina.
2. E vakayagataka vakacava o Jiova na soqo ni tikina me vakarautaka mai kina na kakana vakayalo ena kena gauna dodonu?
2 Ena soqo a caka mai Columbus, Ohio, ena 1931, a dusimaki ira na nona dauveiqaravi o Jiova mera ciqoma na yaca vou—iVakadinadina i Jiova. (Aisea 43:10-12) Ena 1935 era sa vakatakilai kina na isoqosoqo levu e tukuni ena Vakatakila 7:9-17. Ena 1942, a vosa kina o Brother Knorr ena ulutaga, “Sautu—Ena Rawa Beka ni Tudei?” Na vunau oya e uqeta sara ga na cakacaka vakavunau e vuravura raraba, a tauyavu tale ga kina na Watchtower Bible School of Gilead. Dina ga ni so na soqo vaka oqo e dau guiguilecavi dredre, ia e macala mai na soqo kece e sa caka oti nira vakarautaki kece kina na magiti vakayalo ena kena gauna dodonu.—Same 23:5; Maciu 24:45, VV.
3. Na cava meda cakava me yaga kina vei keda na magiti vakayalo ena vakarautaki mai ena soqo ni tikina?
3 O Sa Kana Vinaka Tiko Vakayalo? Ke levu tu na kakana e se rawa tiko ga nida waloloi, oqori keda vucesa na kania na kakana e vakarautaki. (Vkai. 26:15) E vaka tale ga oqori na kana vakayalo. E dau laurai ena so na soqo ni tikina ni levu era dau veilakoyaki tu ga vakaveitalia, e so era dabe ena vanua ena sega kina ni rogoci na porokaramu, se ra veitalanoa wale ni vakacagau tiko na porokaramu. E dina ni tiki bibi ni soqo na noda dau veimaliwai kei na noda veivakatakatai vakaveitacini, ia me caka ga ni bera na soqo se ni sa suka. (Dauv. 3:1, 7) Ke da sega ni dabe tiko vakadua ena noda idabedabe meda vakarorogo vinaka, eda na sega ni rogoca e so na ka bibi. O ira na tacida era vakaitavi tiko ena cicivaki ni soqo era na veivosakitaka beka e so na ka me baleta na soqo ena gauna e vakacagau tiko kina. Ia ke sega, e dodonu mera ivakaraitaki ena nodra vakarorogo vinaka tale ga ena porokaramu. Me kua sara ga ni dua vei keda e calata na kakana vakayalo e vakarautaki mai.—1 Kor. 10:12; Fpai. 2:12.
4. Eda na vakaraitaka vakacava na noda vakavinavinaka ena kakana vakayalo e vakarautaka mai vakayauyau o Jiova?
4 Eda marau dina ena vutuniyau ni kakana vakayalo e vakarautaka mai o Jiova, ni vakatauvatani kei na lauqa ni ivakavuvuli lasu nei lotu ni Veivanua Vakarisito! (Aisea 65:13, 14) Dua na sala eda na vakaraitaka kina noda “vakavinavinaka” na noda raica na soqo oqo me vanua e vakavulici keda tiko mai kina o Jiova. (Kolo. 3:15) Kua ni raici koya tiko ga e vunau mai, okata na ka e tukuna tiko ni lako sara tiko ga mai vua na “Dauniveivakavulici Levu.” (Aisea 30:20, 21, NW; 54:13) Vakarorogo vinaka. Vakavola na veitikina bibi. Railesuva ena veiyakavi ni suka na soqo. Bulataka sara na ka o vulica.
5. Na cava e gauna marautaki kina vei keda na soqo ni tikina?
5 Na soqo kece e vakayacori tiko ena gauna oqo ni bera na Amaketoni, se mani caka ena keba ni isenivalu, se vanua ni veiraravui, se vanua ni bula galala, era dusia kece na druka nei Setani! Nida mataveitacini, eda dau vakanamata ena gauna eda sota vata kina ena soqo ni tikina. (Isik. 36:38) Eda nuidei ni na baci vakarautaka tale mai vei keda o Jiova na “kakana e na kena gauna dodonu.”—Luke 12:42, VV.
[Caption on page 4]
Vakavinavinakataka na Kakana e Vakarautaka o Jiova
◼ Vakarorogo vinaka
◼ Vola na veitikina bibi
◼ Railesuva na porokaramu ena veiyakavi ni suka na soqo
◼ Bulataka sara na ka o vulica