‘Meda Vakacaucautaka Vata na Yacana’
1. Na cava eda na marautaka vata ena noda vakacaucautaka na Kalou? Na vakavakarau cava meda sa cakava rawa yani oqo?
1 “Tou mai vakacaucautaka na yaca i Jiova, ia me da doka vata na yacana,” e lagata na daunisame. (Same 34:3) Eda marau nida na mai vakacaucautaki Jiova kei ira na tacida mai na veivavakoso tale e so ena Soqo ni Tikina, “Lako Vata kei na Kalou.” O sa veivosakitaka na vanua o na vakaicili kina, nomu sala ni veitosoyaki vaka kina nomu na vagalalataki mai na nomu cakacaka? E ka vakayalomatua me sa caka rawa yani oqo na veika oqori.—Vkai. 21:5.
2. Na cava na yaga ni noda yaco totolo yani ena vanua ni soqo?
2 Nida Yaco Yani ina Vanua ni Soqo: E levu na ka eda na cakava meda tiko rawa kina ena soqo ni tikina. E vinaka meda biubiu totolo nida sega ni kila na ka e rawa ni vakaberai keda. Ke da vakayacora oya eda na lai dabe vinaka, eda na vakarautaki keda tale ga ni bera na sere kei na masu. (Same 69:30) Ni vo e vica na miniti me tekivu, e sa na rogo mai na ivakatagi, sa na dabe tale tu ga ena buturara na jeameni. Ena gauna oqori e dodonu meda sa dabe kece kina me rawa ni tekivu vinaka kina na porokaramu.—1 Kor. 14:33, 40.
3. Eda na vakaraitaka vakacava na loloma nida vaqara idabedabe?
3 E uqeti keda na Vosa ni Kalou ‘meda cakava na ka kece ga ena loloma.’ (1 Kor. 16:14) Ke da vakayacora oqo eda na sega ni veibili se suguraki keda nida vaqara idabedabe. Me maroroi ga na nodra idabedabe o ira eda vodo vata yani se o ira eda tiko vata.—1 Kor. 13:5; Fpai. 2:4.
4. Na cava me caka ena gauna ni vakacegu? Na cava e vinaka kina?
4 Yalovinaka ni kauta ga mai na kemuni ivaqa, mo ni kua kina ni biuta na vanua ni soqo mo ni lai vaqara kemuni vakasigalevu. Ena rawa kina nida veimaliwai, eda na tiko tale ga ni tekivu na porokaramu ena yakavi. Ke tawa vata mai na kemudou ivakasigalevu ena dua ga na bola, e daumaka me kua soti ni bola levu de vakaosoosotaka na vanua e lakovi. E sega ni vakatarai ena vanua ni soqo na bola ni kakana lelevu e dau vakayagataki ena vakatakakana, na bilo se itawatawa ni kakana lase, na yaqona ni valagi kei na yaqona ni viti.
5. Eda na vakarautaka vakacava na lomada ena ivakaro ena talaucaki mai?
5 Sa Vakarautaki Tu na Magiti Vakayalo: O Tui Jiosafati e ‘vakarautaka na lomana me vakasaqara na Kalou.’ (2 Vei. 19:3) Eda na vakarautaka vakacava na lomada ni bera na soqo ni tikina? E tiko ena itoma oqo na ulutaga, “Eda na Vakalougatataki ena Gauna Oqo me Tawamudu ke Da lako Vata Tiko ga kei na Kalou.” E vakamacalataki kina na magiti vakayalo ena vakarautaki ena soqo, ena qai veivosakitaki ena Soqoni ni Cakacaka ena mua ni vula oqo. Tikica na gauna mo vakasamataka kina na ulutaga oya, mo vakavinavinakataka kina na veika e sa vakarautaka tu vei keda o Jiova. E okati ena noda vakarautaka na lomada na noda kerei Jiova me vukei keda meda taura rawa na veika ena talaucaki mai kei na noda bulataka tale ga.—Same 25:4, 5.
6. Na cava eda vinakata kece? Na cava na vuna?
6 Eda vinakata kece meda vulica e levu na ka mai na Vosa ni Kalou, ni oqo na idewadewa meda rawata kina na bula. (1 Pita 2:2) Meda tiko gona ena Soqo ni Tikina “Lako Vata kei na Kalou,” meda ‘vakacaucautaka vata kina na yaca i Jiova.’—Same 34:3.
[Caption on page 3]
Ka Meda Cakava Meda Vakacaucautaka Kina na Yaca ni Kalou
◼ Vakavakarau rawa
◼ Mo yalololoma
◼ Vakarautaka na lomamu