Kato Ni Taro

◼ Meda qarava vakacava na itavi ena ivavakoso?

Na toso vinaka ni nodra ivavakoso na tamata i Jiova e vakatau sara ga ena nodra duavata na lewena. (1 Kor. 14:​33, 40) Vakasamataka mada na itavi e qaravi ena dua ga na soqoni ni ivavakoso. Me ikuri ni porokaramu, e levu tale na itavi era dau qarava na tacida yalewa kei ira na tacida tagane ni bera na soqoni vaka tale ga kina ni sa oti. E bibi tale ga na itavi eda cakava e sega ni dau raici. E rawa vakacava nida veitokoni ena kena qaravi na veitavi oqori?

Soli iko. E levu na ka era rawa ni cakava o ira na dau tu vakarau mera soli ira. (Same 110:⁠3) Dau kauaitaki ira na tauvimate kei ira na sa qase. Veivuke ena kena samaki na Kingdom Hall. E levu gona na ka yaga e rawa nida cakava, kevaka mada ga eda sega ni sureti meda veivuke. E bibi ga me tu vei keda na gagadre ni via veivuke.

Veiqaravi ena yalomalumalumu. Era dau marau na veiqaravi na yalomalumalumu. (Luke 9:​48) Ke da yalomalumalumu eda na sega ni ciqoma na itavi eda na sega ni qarava rawa. Eda na sega tale ga ni ulabaleta na veika e dodonu meda vakatulewa kina.​​—⁠Vkai. 11:⁠2.

Mo nuitaki. A vakasalataki o Mosese me digitaki ira na “tagane nuitaki” mera veivuke ena colati ni itavi e Isireli makawa. (Lako 18:​21, NW) Na itovo oqo e gadrevi tale ga nikua. Tovolea mo qarava vinaka na itavi kece o vakacolati kina. (Luke 16:10) Kevaka o sega ni tiko mo cakava na itavi o lesi kina, qara e dua e rawa ni vakayacora na itavi oqori ena vukumu.

Solia na nomu vinaka taucoko. Era dau vakaroti na lotu Vakarisito mera cakava mai vu ni lomadra na nodra cakacaka ke cakacaka saumi mada ga. (Kolo. 3:​22-​24) E bibi sara ga oqo ena cakacaka ni kena vakatetei na sokalou dina. Ke mani lailai mada ga se sega ni bibi sara na itavi oqori, ena yaga dina ena ivavakoso ke caka vakavinaka.

Eda vakaraitaka na noda lomani Jiova kei ira na tacida ena itavi kece eda cakava. (Maciu 22:​37-​39) Meda vakayacora mada ga ena yalodina na itavi kece eda dau lesi kina.