iVola Mai na iLawalawa Dauvakatulewa
Vei Kemuni na Taci Keitou Lomani:
NIDA sa bula tu oqo ena ilago ni ituvaki vou, sa qai bibi ga na noda waraki Jiova. (Sefa. 3:8) E kaya na parofita o Taniela: “Na Kalou . . . sa vakaraitaka na ka vuni, ka sa vakatakila . . . na ka ena yaco e na gauna maimuri.” (Tani. 2:28) E ka dokai dina na noda bula tu ena icavacava ni gauna oqo, kei na noda kila na veika vuni vakalou e vakatakila tiko mai o Jiova!
O Jiova e vakayagataki koya na “dauveiqaravi yalo dina ka vuku,” me vakatakila tiko mai vakamalua na nona inaki ena nodra kumuni vata “nai soqosoqo levu” era sokalou tiko ena “iotioti ni veisiga” dredre oqo. (Maciu 24:45, VV; Vkta. 7:9; 2 Tim. 3:1, NW) E vakamacalataki ena Aisea 2:2, 3, (NW), ni cakacaka e cuqeni tiko oqo e vuravura raraba ena vakayacori ena “iotioti ni veisiga.” E vakayacori tiko gona e veiyabaki na kumukumuni oqo, dina ni sa takalevu tu e vuravura na tiko yavavala kei na itovo voravora.
Ena yabaki vakacakacaka ni 2004, eda vakadreti matua meda muria na ivakasala i Jisu: “Mo dou yadra tiko . . . dou tu vakarau tale ga.” (Maciu 24:42, 44, VV) Na veika gona e yaco tiko oqo e vuravura e vakaibalebale dina vei ira na lotu Vakarisito era kila na ‘ivakatakilakila ni gauna,’ ra qai cakava kina e dua na ka. (Maciu 16:1-3) Me vakayacori kina na nona Vosa, ena tokoni ira tiko ga na nona tamata o Jiova, dina nira na tusaqati.
Dina nira saga tiko e so mera tarova na kena kacivaki na Matanitu ni Kalou, ia era vunau ra qai vakasosoqoni vata tiko ga na tacida. (Caka. 5:19, 20; Iper. 10:24, 25) Ena June 2004, a tokona na mataveilewai levu mai Moscow, e Rusia, na veibeitaki ni mataveilewai lailai ena kena vakatabui na nodra cakacaka na iVakadinadina i Jiova, me sogo tale ga na vanua e cicivaki tiko kina na nodra isoqosoqo ena korolevu oya. Ia era sega ni yalolailai na tacida; era kila na ka e vinakata na Kalou mera cakava, era vakarorogo kina vua, ra sega ni vakarorogo vei ira na tamata. (Caka. 5:29, VV) Eda nuidei ni na tokoni ira nona dauveiqaravi o Jiova dina ga ni sa vakatabui tu vakalawa na nodra cakacaka.
Ena vica na yabaki sa oti ena Republic of Georgia, e kau tani vakatawadodonu na nodra iyau na mataveitacini, ra vakacacani vakaca, era raica tale ga na kena vakamai na nodra ivola. Ia e sega ni mana na iyaragi kece e caka me tarova na nodra cakacaka. (Aisea 54:17) Ena yabaki vakacakacaka ni 2004, sa qai vakadonui tale vakalawa na nodra cakacaka na iVakadinadina i Jiova e Georgia. Sega tale ni dua e tarova na kena caka na soqo ni tikina, vaka kina na vakau ni ivola ena vanua oya. E veitarataravi na tubu ni kedra iwiliwili na dautukutuku, kei ira na tiko ena iVakananumi.
Era vesu na tacida ena vuku ni nodra vakabauta ena vanua o Armenia, Eritrea, Republic of Korea, Rwanda, kei Turkmenistan. Dina nira vakacacani, era kila na yavu vakaivolatabu era vakacacani kina, oqo e uqeti ira mera yalodina tiko ga ra qai nuitaki Jiova me na vakabulai ira.—1 Pita 1:6, VV; 2 Pita 2:9.
Ni o dikeva na Ripote ni Yabaki Vakacakacaka ni 2004, ena Vale ni Vakatawa, 1 Feperueri, 2005, o na marautaka na yalololoma i Jiova. (Same 31:19; 65:11) Keitou nuitaka ni na vakayaloqaqataki kemuni na ripote oqo mo ni na vakamarautaka tiko ga kina na Kalou.—1 Ces. 4:1.
E sagai tiko ga vagumatua mera rogoca na tamata kece na ka dina. Kena ivakaraitaki, e vakarautaki na vidio, DVD, kei na so tale na ka me baleti ira na vosa vagalu, kei na ivola me baleti ira na mataboko, me vukei ira vakayalo. E levu tale ga na dautukutuku ni Matanitu ni Kalou era sa vulica na nodra vosa o ira na curuvanua yani era tiko ena nodra yalava ni ivavakoso.
Kuria oya, era tauyavu e drau vakacaca na iwasewase lalai ribayawa ena yalava e dau dredre ni lakovi. E dua na valenitabana e tiko kina e sivia e 300 na iwasewase lalai ribayawa, qai sivia na 7,000 na dautukutuku. Sega ni dede sa na tauyavu e levu sara na ivavakoso! Mai na le 16,760,607 era tiko ena iVakananumi ena yabaki vakacakacaka sa oti, e sivia e 10 na milioni era sega ni iVakadinadina. E vakaraitaka oqo na kena sa matua na were me na tamusuki.
Eda vakavinavinakataka na veivakalougatataki levu i Jiova, kei na nona dau veikaroni ena veisiga. (Vkai. 10:22; Mala. 3:10; 1 Pita 5:7) Nida toso ena duavata ena “gauna maimuri” eda sa bula tu kina oqo, meda vakararavi da qai nuitaki Jiova tiko ga. Se mani leqa cava eda sotava, meda vakasamataka mada ga vakatitobu na tikinivolatabu ni yabaki 2005: “E dau vukei au o Jiova.” (Same 121:2, NW) Mo ni kila ni keitou lomani kemuni, qai nanumi kemuni tale ga ena neitou masu.
Tacimuni,
iLawalawa Dauvakatulewa ni iVakadinadina i Jiova