Vakatutu ni Kena Soli—Na Matanitu ena Kauta Mai na Parataisi
Ni o tukuna oti e dua na itukutuku buta katakata, o rawa ni kaya:
“E levu nikua era gadreva tu me veisaututaki o vuravura, ia sa qai levu ga na veivala, qai torocake tiko ga na leqa tale e so. Oni dau vakataroga beka se cava e vaka tu kina oqo? [Waraka me sauma.] E sauma sara ga na taro oqori na brochure oqo.” Cega na brochure ena tabana 21. Wilika na Vakatakila 12:7-9, qai veivosakitaka na parakaravu 5-7. Mo kaya: “Cava nomuni nanuma, sa voleka beka na gauna eda na raica kina na veisaututaki kei na tiko vinaka e vuravura? [Waraka me sauma.] E vakamacalataki ena tabana e tarava e so na parofisai ena iVolatabu ena sauma sara ga na taro oqori, e vakamacalataka tale ga ni na vinaka na veisau ena gauna e se bera mai. Au na marautaka me daru na veivosakitaka na tikina oqo ena siga au na sikovi kemuni tale kina.” Lokuca na siga mo na sikova koya kina.
Ni o sa lesuvi koya, o rawa ni kaya:
“Ena nodaru veivosaki sa oti, au yalataka ni daru na mai veitalanoataka na kena yaco dina na veisaututaki kei na tiko vinaka e vuravura ena dua na gauna sa tu oqo e liu. Rawa beka mo ni kauta mai na brochure au a solia vei kemuni?” Ni sa lesu mai o itaukeinivale, wilika qai veivosakitaka na tikina e koto ena tabana 22. Sureti koya me vuli iVolatabu, se lokuca na siga mo drau qai veivosakitaka kina na sala ena walia kina na leqa ni kawatamata na Matanitu ni Kalou me vaka e vakamacalataki ena tabana 29.
E rawa ni kaya e dua na dautukutuku itabagone:
“E levu na noqu icaba era kauaitaka na ka ena yacovi vuravura ena 10 se 15 na yabaki mai oqo. Oni nanuma ni na kune beka na iwali ni leqa eda sotava tu nikua? [Waraka me sauma.] Au vakabauta ni iwali duadua ga ni leqa na Matanitu ni Kalou a tukuna o Jisu ena Maciu 4:23. [Wilika] Dikeva e ke ni sega wale ga ni veivakabulai o Jisu, a tukuna tale ga ni tiko e dua na Matanitu. Na imatai ni parakaravu oqo e vakamacalataka na vuna a vunautaka kina o Jisu na Matanitu ni Kalou, au na wilika vei kemuni. [Wilika na parakaravu 1 ena tabana 3.] Ke oni via kila tale e levu na ka, e rawa ni nomuni na brochure oqo. Au marau meu na lesuvi kemuni mai me daru veitalanoataka na vuna e gadrevi kina na Matanitu ni Kalou.” Lokuca na siga mo na sikovi koya kina.
Ni o sa lesuvi koya o rawa ni kaya:
“Na noqu a lako mai liu, au yalataka ni daru na mai veivosakitaka na vuna e gadrevi kina na Matanitu ni Kalou.” Kerei koya me kauta mai na nona brochure, drau qai veivosakitaka na parakaravu 1-4 ena tabana 4. Vakabibitaka vua ni nona valavala ca na kawatamata e gadrevi kina e dua na matanitu e liutaka na Kalou. Sureti koya sara me vuli iVolatabu, se lokuca mo sikovi koya tale mo drau veivosakitaka na ibalebale ni leqa e sa yaco tiko nikua e vuravura, me vaka e vakamacalataki ena tabana 21-22 ni brochure oqo.
Ni o cakacaka vata kei na dua na gone, rawa ni kaya o qase:
“Ke rawa, me wilika mada o ________ e dua na tikinivolatabu.” Me wilika o gone na Vakatakila 21:4 qai vakaraitaka sara na iyaloyalo ena tabana 31. Me vakamacalataka o gone ni oqo na ka ena yacovi ira na tamata mamarau, ni sa sega tale na rarawa kei na tauvimate. Tomana o qase: “E levu beka vei keda nikua era marau tu me vakataki ira na tabaki tiko ena iyaloyalo oqo? [Waraka me sauma.] E vakamacalataki ena brochure oqo ni Matanitu ni Kalou ena kauta mai na veisaututaki dina e vuravura.” Solia sara na brochure, ke ciqoma o itaukeinivale, mo kaya: “Au taleitaka meu na lesuvi kemuni mai me daru na veitalanoataka na bibi ni matanitu oqo.” Lokuca na siga mo na sikovi koya kina.
Ni drau sa lesuvi koya, rawa ni kaya o qase:
“Noqu lako mai liu, au kaya ni daru na mai veitalanoataka na bibi ni Matanitu ni Kalou.” Kerei koya me kauta mai na nona brochure, drau qai veivosakitaka na parakaravu 1 ena tabana 3. Vakabibitaka vua na sala ena walia kina na Matanitu ni Kalou na tauvimate kei na leqa kece ga. Veivosakitaka na parakaravu 2-3, sureti koya sara me vuli iVolatabu.