Vakatutu ni Kena Soli Na Cava e Loma ni Kalou Vei Keda?

Ni o sa vakabula oti, o rawa ni kaya:

“E levu nikua era vakabauta tu ni noda bula oqo e idewadewa ga ina bula marau i lomalagi, se dua tale na vanua, sega ni bula e vuravura. Na cava oni nanuma, e vinakata na Kalou mera bula na tamata vinaka kece i lomalagi se e vuravura? [Waraka me sauma.] E vakaraitaka na iVolatabu na nona inaki na Kalou me baleta na vuravura kei ira na tamata, ia na inaki oqo ena vakayacori dina. [Vakaraitaka na iyaloyalo ena tabana 11. Veivosakitaka na parakaravu 1-2, vakabibitaka na Aisea 45:18.] Na noqu veisiko tarava, au na vakaraitaka sara ga vei kemuni ena iVolatabu na sala ena vakalesuya mai kina na Kalou na Parataisi e vuravura.” Solia na brochure, lokuca na siga mo sikovi koya kina.

Ni o sa lesuvi koya, o rawa ni kaya:

“Na noqu a gole mai e liu, au tukuna vakalekaleka vei kemuni na inaki ni Kalou me vakalesuya mai vuravura na parataisi. [Vakaraitaka tale na iyaloyalo ena tabana 11.] Au na marautaka meu rogoca na nomuni nanuma ena yalayala ni Kalou me vakalesuya mai na Parataisi e vuravura.” Veivosakitaka na parakaravu 4-5, vakabibitaka na ituvaki kei vuravura e yalataka tu na iVolatabu. Sureti koya sara me vuli iVolatabu.

Se, o rawa ni kaya:

“E duidui tu na veimataqali sala era masuta kina na Kalou na tamata nikua. Na cava oni nanuma, e rogoca beka Kalou na masu kece? [Waraka me sauma.] E tu ena brochure oqo na ivakamacala e yavutaki ena iVolatabu me baleta na ka e gadrevi me rawa ni qai rogoca kina na Kalou na noda masu.” Cega na brochure ena tabana 15 qai wilika na parakaravu 3 me yacova na imatai ni tikinivolatabu e lavetaki. Mo kaya: “E tukuni tu ena Maciu 6:​7, 8 na ivakasala i Jisu me baleta na masu. [Wilika qai vakamacalataka vakalekaleka na tikinivolatabu.] Na cava na yaga ni noda dau masu mai vu ni lomada? [Waraka me sauma.] Na lesoni oqo e vakaraitaka ni rawa nida toro volekata na Kalou ena masu.” Solia na brochure, qai lokuca mo sikovi koya mo drau veivosakitaka na veika e rawa ni okati ena noda masu.

Ni o sa lesuvi koya, o rawa ni kaya:

“Noqu a lako mai e liu, au kaya me daru na mai veivosakitaka na veika e rawa ni okati ena noda masu.” Kerei itaukeinivale me kauta mai na nona brochure, qai veivosakitaka na parakaravu 4-6. Taroga: “E dau rogoca beka o Jiova na masu kece?” Lokuca mo sikovi koya tale mo drau veivosakitaka na parakaravu 7.

E rawa ni kaya e dua na dautukutuku gone:

“Au via vakaraitaka vei kemuni na masu kilai levu a vakavulica o Jisu. Na masu oqo e volai tu ena Maciu 6:​9, 10. [Wilika.] A masulaka o Jisu me caka na loma ni Kalou e vuravura. E marautaka beka na Kalou na ka e caka tiko nikua e vuravura? [Waraka me sauma.] E kaya tiko o Jisu ni na vakayacori na loma ni Kalou ena dua na gauna sa tu oqo e liu, ena mai vakayacora na nona Matanitu. Au via wilika e dua na parakaravu ena brochure oqo e vakamacalataka na Matanitu oqori.” Cega na Lesoni 6, wilika qai veivosakitaka na parakaravu 1. Vakabibitaka vua na iyaloyalo ena tabana 13, qai vakamacalataka ni oqo na ka ena yaco ni sa veiliutaki e vuravura na Matanitu ni Kalou. Solia na brochure, qai tinia ni o kaya: “Au na marautaka meu lesuvi kemuni mai, meu vakaraitaka na sala ena vakayacora kina oqo na Kalou.” Lokuca mo sikovi koya tale.

Ni o sa lesuvi koya, o rawa ni kaya:

“Noqu a lako mai e liu, daru a veitalanoataka na Matanitu ni Kalou, kei na ka ena cakava e vuravura. [Railesuva vakalekaleka se cava na Matanitu ni Kalou.] Au via rogoca na nomuni nanuma ena ka ena cakava na Matanitu ni Kalou.” Kerei koya me kauta mai na nona brochure, drau veivosakitaka na parakaravu 2-4 ena tabana 12. Lokuca mo drau qai veivosakitaka na parakaravu 5-7 ena nomu veisiko tarava.

Ni drau cakacaka vata kei na dua na gone, e rawa ni veikidavaki o itubutubu qai kaya:

“E via vakaraitaka o luvequ ena iVolatabu na ka e yalataka tu na Kalou me baleta na veigauna sa tu oqo e matada.” Wilika sara o gone na Vakatakila 21:​3, 4 qai taroga: “Oni via raica na iyaloyalo ni vuravura ena gauna sa na kauta tani kina na Kalou na rarawa kei na tagi?” Vakaraitaka sara na iyaloyalo ena tabana 13. Qai taroga o itubutubu: “Oni bau vakasamataka tu se na vakayacora vakacava oqo na Kalou? [Waraka me sauma.] Na lesoni oqo e vakaraitaka na ka ena qai cakava na veiliutaki i Jisu Karisito.” Solia na brochure, qai lokuca na siga mo sikovi koya kina.

Ni drau lesuvi koya, e rawa ni kaya o itubutubu:

“Ena nodatou veitalanoa sa oti, au tukuna niu na vakaraitaka vei kemuni na ka e kaya na iVolatabu me baleta na kena takali e vuravura na rarawa kei na tagi.” Kerei koya me kauta mai na nona brochure, drau dikeva na parakaravu 6-​7 ena tabana 13. Sureti koya me vuli iVolatabu ena nomu vakaraitaka na lewenivola qai tukuna vua me digia na ulutaga mo drau na qai veivosakitaka ena veisiko e tarava.