Soqo ni Tikina ni iVakadinadina i Jiova ena 2007—Kena Usutu “Muria na Karisito!”
1, 2. (a) Na cava a tukuna o Mosese mera cakava na Isireli me yaga kina vei ira na nodra dau soqoni vata? (b) Na cava meda sa tekivu cakava yani oqo?
1 A vakaroti ira kece na lewe i Isireli o Mosese kei ira na tiko vulagi mera dau soqoni vata ena ikavitu ni yabaki me wiliki vei ira na Lawa. Cava na kena inaki? “Me ra rogoca, ka me ra vuli kina.” (Vkru. 31:10-12) E raica o Jiova ni bibi mera dau soqo vata na nona tamata. Sa roro voleka tale ga mai na gauna meda na soqoni vata kina ena soqo ni tikina siga tolu e kena usutu “Muria na Karisito!”
2 Eda sa vakavakarau tiko? Sa da kerea oti noda gade? Rawa beka nida vukei ira noda vuli iVolatabu se o ira na wekada era sega ni tiko ena dina mera tiko tale ga? E tiko beka e so ena ivavakoso era na gadreva na veivuke mera tiko ena soqo ni tikina? Eda sa nakita beka meda lai tiko ena dua tale na soqo ni tikina e sega ni lesi kina na ivavakoso eda lewena? Sa da veivosakitaka beka na vanua meda na vakaicili kina? Meda raica mada e so na tikina ena yaga sara ena noda vakavakarau.
3. (a) Sa vakilai tiko vakacava nikua na ka e tukuni ena Aisea 25:6? (b) Na cava e dau laurai ena siga Vakaraubuka? Ia na cava me noda isausau?
3 Tiko ena Siga Tolutolu: E sega ni tukuni rawa na levu ni kakana vakayalo e vakarautaka vei keda o Jiova. (Aisea 25:6) Oqo e okati kina na magiti uro vakayalo e vakarautaki ena soqo ni tikina. Ia, e laurai ni lewe lailai era dau tiko ena siga Vakaraubuka ni vakatauvatani kei na rua tale na siga ni soqo. Me noda isausau meda tiko ena siga tolutolu, meda marautaka kina na veika e sa vakarautaka mai na isoqosoqo i Jiova! Ke da vinakata meda vagalalataki ena noda cakacaka saumi ena siga ni soqo oqo, meda masulaka. Eda na “doudou” ni kerekere ni sa kacivaki na tikinisiga ena vakayacori tiko kina. (1 Ces. 2:2; Niem. 2:4, 5) Ena rairai yaga ke da vakamacalataka vei noda boso ni soqo oqo e dau caka e veiyabaki e tiki ni noda sokalou. Nida tukuna rawa vei ira ni se vo tu e vica na vula me qai vakayacori na soqo ni tikina, ena vakarawarawataka nodra veisautaka nodra ituvatuva mera vagalalataki keda ena siga ni soqo.
4. Eda na vakarautaki ira vakacava noda vuli iVolatabu kei ira na lewe ni noda vuvale era sega ni tiko ena dina mera tiko ena soqo ni tikina?
4 Mera Vakarautaki Noda Vuli iVolatabu kei na Noda Vuvale: Ena marautaki dina ke ra tiko noda vuli iVolatabu ena soqo ni tikina, mera vakadinadinataka kina na duavata kei na veikauaitaki dina e laurai ena “[i]soqosoqo” i Jiova! (Same 22:25) Ni se yawa toka na siga ni soqo, meda sa sureti ira rawa mera na tiko tale ga kina. Meda tukuna vei ira na vuna eda taleitaka kina na tiko ena soqo oqo. Rawa nida vakaraitaka vei ira na vidio e laurai kina na soqo ni tikina e sa caka oti me vaka na vidio United by Divine Teaching, mera kila toka kina na ka e dau caka. Meda tukuna tale ga vei ira noda lewe ni vuvale era sega ni tiko ena dina na vakavakarau eda sa cakava tiko. Rairai era na via tiko tale ga mera raica na drama, se ra tiko ena dua taucoko na siga.
5, 6. (a) Eda na muria vakacava na ivakasala ena 1 Timoci 6:18 nida veivuke? (b) Na cava e vakarautaki mera vukei kina na vaqara icili?
5 Vukei Ira na Tacida: A vakasalataki ira na lotu Vakarisito vutuniyau o Paula mera “caka vinaka, me ra vutu ni cakacaka e yaga, me ra lomasoli, me ra via veivuke.” (1 Tim. 6:17, 18) Eda na vakaraitaka na yalo vata ga a tukuna oqori o Paula ke da nanumi ira na sa qase, o ira na vakaleqai na ituvaki ni yagodra, vaka kina o ira na veiqaravi vakatabakidua, o ira na itubutubu ledua, se na lewe ni ivavakoso era gadreva na veivuke mera tiko ena soqo ni tikina. Mera veivuke sara ga e liu o ira na wekadra era tiko ena dina, ia o ira na qase kei na so tale na mataveitacini era na yalomatuataka na ka mera na cakava, ra qai veivuke ke gadrevi.—Kala. 6:10; 1 Tim. 5:4.
6 Ke vinakata na icili e dua na lewe ni ivavakoso, ena vakatulewataka na Komiti ni Cakacaka ke ganiti koya me vakalewena na fomu Special Needs Room Request. Ni bera ni soli na fomu oqo ena tabana ni veivakaicilitaki ni soqo ni tikina, me muri na idusidusi e tiko kina kei na idusidusi tale ga e tiko ena ivola ni 1 Maji, 2007 a vakau yani vei ira na qase.
7. Dokai vakacava o Jiova ena noda vakavakarau meda yaco totolo yani ena vanua ni soqo?
7 Me Dokai Noda Sokalou: Eda na vakaraitaka noda dokai Jiova ke da tuvanaka meda kua ni calata na kakana vakayalo e vakarautaki ena soqo ni tikina. Vakacava, eda sa lalawataka meda yaco totolo yani, meda raica rawa na noda idabedabe, meda tiko tale ga ena itekivu ni sere kei na masu? Sa da veivosakitaka tale ga na ivakasigalevu meda na kauta ena soqo ni tikina? Ni sa tekivuna na soqo na jeameni, qai sureti keda meda dabe ni bera ni tekivu na ivakatagi, me sa rauta na veitalanoa, da lai dabe sara.
8. E dokai vakacava na soqo ni tikina ena noda vakarorogo vinaka?
8 Na noda vakarorogo vinaka e vakaraitaka nida doka na Tamada vakalomalagi. A vola e dua na dauvolaitukutuku me baleta na ka e raica ena soqo ni tikina ni o ira na vakararai tu, ena “tarai ira sara ga na nodra itovo na tiko ena soqo, nira dabe vakamalua ra qai vakarorogo vinaka, e vakaraitaka na nodra kauaitaka na veika vakayalo.” E tukuni ira tale ga “na kena gone . . . , nira vakaitovo, ra qai vakaogai ira ena cega iVolatabu.” Ni caka tiko na soqo, e sega ni gauna ni veitalanoa, vakau itukutuku ena mobile, kana, se yavoki ena pasese. O ira na gone mera dabe vata kei na nodra itubutubu mera vukei me yaga vei ira na porokaramu. (Vkru. 31:12; Vkai. 29:15) Na vakayacori ni veika oqo e vakaraitaka noda dokai ira na tiko ena soqo, kei na noda vakavinavinakataka na kakana vakayalo e vakarautaki.
9. Na cava me rakorako kina na keda irairai ena soqo ni tikina?
9 Levu era marautaka na vunau ena soqo ni tikina ni yabaki sa oti e kena ulutaga “Maroroya Vinaka na Kemu iRogorogo.” E vakabibitaka mera saga na lotu Vakarisito me vinaka na kedra irogorogo ena nodra isulusulu kei na sasauni. Meda vakasamataka tale vakabibi na tikina oqori ena yabaki oqo. Na keda irairai e vakaraitaka na noda lomani Jiova kei na itavi dokai meda nona iVakadinadina. Me rakorako noda isulusulu me vakataki ira ‘era kaya nira sa lotu.’—1 Tim. 2:9, 10.
10, 11. (a) Na cava soti e dau vakarautaki ni bera na soqo ni tikina? (b) Eda na vakaraitaka vakacava noda vakavinavinakataka na veika kece e caka me vakayacori vinaka kina na soqo ni tikina? (Wilika na Iperiu 13:17.)
10 Tokona na iTuvatuva e Vakarautaki: Nida yaco yani ena vanua ni soqo, eda vakadinadinataka na levu ni ka a caka me vakarautaki kina. Era kidavaki keda na dauveiqaravi, era solia noda porokaramu, ra qai dusimaki keda ena noda idabedabe. Sa qai tiko o ira na tacida era samaka na vanua ni soqo ra qai vakarautaka vinaka na kena buturara. Vaka kina na cakacaka levu ni kena vakarautaki na porokaramu ni soqo, kei na veika lalai tale e so.
11 Ena soqo ni tikina kece era tiko e so na tacida era veivuke ena kena vakarautaki na veika me baleta na soqo ni se vo tu e vica na vula me vakayacori, era veitokoni tale ga ena tikina oqo na nodra vuvale ena nodra sega ni vakaosoosotaki ira nira qarava tiko na itavi bibi oqo. Sega li nida vakavinavinakataka na yalo ni vakuai ira era vakaraitaka me yaga kina vei keda na soqo ni tikina? Noda muria na veika e vakaturi ena ulutaga oqo se na veika tale ena tukuni mai ni bera na soqo ni tikina, e vakaraitaka noda sa vakavinavinakataka tiko na isolisoli oqo. (Iper. 13:17) Noda yalorawarawa ni veitokoni ena ‘caka vakavinaka qai tuvalaki kina vakamatau’ na soqo ni tikina.—1 Kor. 14:40, VV.
12. (a) Na cava e sa qai bibi ga kina nikua na noda sosoqoni vata na tamata i Jiova? (b) Na cava meda sa cakava sara ga oqo?
12 Sa qai bibi ga vei keda nikua meda sosoqoni vata ni “sa toro voleka mai na siga.” (Iper. 10:25) E vakarautaka gona na dauveiqaravi yalodina ka vuku na veika meda “cakava” meda muria kina “na vosa kecega” e vakaroti keda kina o Jiova. (Vkru. 31:12) Meda sa tuvanaka sara ga oqo meda tiko ena siga tolutolu ni soqo ni tikina e kena usutu “Muria na Karisito!,” eda na vakila na yaga ni veivakavulici vakayalo e vakarautaki kei na veimaliwai vakamataveitacini!
[Kato ena tabana e 3]
Gauna ena Caka Kina na Soqo
Vakaraubuka kei na Vakarauwai
9:20 a.m. - 5:05 p.m.
Sigatabu
9:20 a.m. - 4:10 p.m.