iVakadinadina ni Qaqaco Noda Vakabauta!

1. Na itukutuku tawanamaki cava a tukuna o Jisu ni na yaco?

¹ Era a vakarogoci Jisu vinaka na yapositolo ena nona tukuna tiko na iotioti ni veisiga qo kei na nona tiko tawarairai. Nira na rogoca na itukutuku tawanamaki ena yacova na kawatamata​​—⁠ivalu, leqa ni kakana, uneune, kei na mate ca. E kaya tarava o Jisu nira na sevaki, vakararawataki ra na qai vakamatei na nona imuri. Ena levu tale ga na parofita vakailasu era na vakacalai ira na lewe levu. Ena batabata mai nodra loloma na lewe vuqa.

2. Na cava e vakasakiti kina na kena vunautaki na itukutuku vinaka e vuravura?

² Era a rairai kidacalataka na yapositolo nona tukuna o Jisu ni na vunautaki mada i vuravura taucoko na itukutuku vinaka ni Matanitu ni Kalou. (Maciu. 24:​3-​14) Eda sa raica nikua na vakayacori ni parofisai vakasakiti qo. Dina nida bula donuya tu na gauna dredre era gumatua tiko ga na iVakadinadina i Jiova ena kena vunautaki na itukutuku vinaka. Ni sa batabata mai na loloma ena vuravura qo, noda loloma sa qai serau tiko ga mai. Eda sevaki mai na “vanua kece ga” ia eda vunau ga yani ena doudou.

3. Na itukutuku cava ena ripote ni yabaki vakacakacaka e vuravura e uqeti iko?

³ E veiuqeti dina nida raica lesu na cakacaka ni iVakadinadina i Jiova ena yabaki vakacakacaka sa oti, me vaka e vakaraitaki tiko ena chart ena tabana e 3 ina 6! Sa oti qo e 16 na yabaki na kena vakayagataki e sivia na dua na bilioni na aua ena cakacaka vakavunau, kei na veivakatisaipelitaki. Sa dua dina na ivakadinadina ni vakabauta dina! E tubu ena 5.8 na pasede na iwiliwili ni painia, 3.1 na pasede na dautukutuku, kei na 4.4 na pasede na vuli iVolatabu. Era papitaiso e 20.1  na pasede ena yabaki vakacakacaka sa oti. E marautaki dina nida raica ni sa volekata yani na vitu na milioni era qaravi Jiova tiko ena yalodina​​—⁠sa qai vakadua ena bula ni kawatamata! Ni o dikeva na chart, na cava e uqeti iko?

4. Na leqa cava soti a saga me biuta laivi e dua na tacida, me rawa ni papitaiso kina?

⁴ Dina ni iwiliwili levu qo, meda kua ni guilecava ni dusi ira tiko era vakadinata nodra vakabauta. Dua na kena ivakaraitaki o Guillermo a sucu ena 1935 mai Bolivia. Ni se qai yabaki ciwa a cakacaka ena vanua era dau tei kina na kau ni veivakamatenitaki. Mai na gauna ya sa dau tekivu kania kina na draunikau me lomavakacegu kina ni oti nona cakacaka vakaukaua. Kuria nona dau gunu vakasivia qai vakatavako tale ga. Na gauna e vulici Jiova kina kei na nona kila na veika e gadrevi me cakava, e biuta laivi vakadua o Guillermo na vakatavako kei na gunu vakasivia. E ka ni bolebole duadua vua nona biuta na draunikau ni veivakamatenitaki, e dau masuta vagumatua me biuta laivi vakadua na itovo oya. A biuta rawa na bula oya qai papitaiso sara. “Ena gauna qo” e kaya, “Au vakila na savasava kei na marau.”

5. Na cava o na vinakata mo cakava?

⁵ O Jiova e dau taleitaki keda. E vinakata meda veivutuni kece. (2 Pita. 3:⁠9) Na ka tale ga eda gadreva. Me uqeti mada ga na lomada ena noda tomana tiko ga noda vukei ira na yalomalumalumu mera mai kilai Jiova qai lomani koya tale ga.