“Mai Muri Au”
1 E sereki vinaka ena va na Kosipeli na itukutuku ni nona bula e vuravura na Luve ni Kalou o Jisu. Meda “muria na weniyavana” na lotu vaKarisito, eda na vakavakarau vinaka da qai vakatudaliga matua nida vulica ena Vuli iVola ni iVavakoso na ivola “Mai Muri Au,” ena macawa ni 1 Maji. (1 Pita 2:21; Mari. 10:21) E yaga dina noda vulica na ivakarau ni bula i Jisu ni na vakayaloqaqataki keda ena cakacaka vakaitalatala.
2 Na iVakaraitaki i Jisu: O bau sotava e dua a sega ni via rogoci iko ni o vunau e veivale? Nida sotava qori, eda nanuma kina na dina ni vosa i Jisu: “Ke ra vakacacani au, era na vakacacani kemudou tale ga.” (Joni 15:20) Eda sega beka ni vakararawataki vakaca sara, ia na veika rarawa kei na veivakatovolei a sotava o Jisu, a vosota ena vuku ni marau e tu e matana. O keda tale ga meda dau vakasamataka na veivakadonui i Jiova kei na veivakalougatataki ena vuku ni noda yalodina. Ena yaga qori meda “kua kina ni oca se datuvu.” (Iper. 12:2, 3; Vkai. 27:11) Nida qacoya tiko ga na cakacaka vakavunau, eda nuidei tale ga ni na tokoni keda o Jisu Karisito.—Maciu 28:20.
3 “Qo na Ka au Talai Mai Kina”: A usutu ni bula i Jisu na vunautaki ni Matanitu ni Kalou. (Luke 4:43) A soli koya sara ga ena cakacaka vakavunau. Ni raica vakabibi, e dau qara kina eso tale na sala me tukuna kina na Matanitu ni Kalou. Nida imuri i Jisu, na cava eda na cakava meda vakatotomuri koya? Ena noda cakacaka e veisiga, e tu beka eso e rawa nida wasea kina na itukutuku vinaka? Me uqeti keda mada ga na loloma i Karisito meda vakatetea na itukutuku vinaka ena kena levu eda rawata!—2 Kor. 5:14.
4 “Se Sega ni Bau Rogoca e Dua e Vosa Vakataki Koya”: Era vakadrukai na rogoci Jisu ena iwalewale ni nona veivakavulici. (Joni 7:46; Maciu 7:28, 29) Na cava e duatani kina o Jisu vei ira na qasenivuli tale eso? E taleitaka na ka dina e vakavulica, e lomani ira e vakavulica, qai kenadau ni vakayagataka na iwalewale ni veivakavulici eso. Eda rawa ni toroya cake na iwalewale ni noda veivakavulici ke da vakatotomuria na Qasenivuli Levu.—Luke 6:40.
5 Qori eso na ka talei e laurai ena bula i Jisu. Na ka talei cava tale o kunea? Nida vulica na ivakarau ni bula i Jisu ena Vuli iVola ni iVavakoso, me noda isausau mada ga meda “kila tale ga na loloma i Karisito” ena noda vakatotomuria nona vosa kei na veika a cakava.—Efeso 3:19.
[Taro]
1. Ena yaga vakacava vei keda na Vuli Vola ni iVavakoso ena vula sa tu qo eliu?
2. E yaga vakacava vei keda na ivakaraitaki ni nona vosota o Jisu?
3. Eda na vakatotomuria vakacava na rai i Jisu me baleta na cakacaka vakavunau?
4. E rawa nida toroya cake na iwalewale ni noda veivakavulici?
5. Na cava me noda isausau nida vulica na ivola “Mai Muri Au”?