Ena Yaga Vakacava Vei Ira Tale Eso na Noda iVakaraitaki?

1. Na cava ratou vulica na tisaipeli i Jisu ena nona ivakaraitaki?

¹ A tukuna o Jisu: “Ni mai cola na noqu ivua moni vuli vei au.” (Maciu 11:29) E macala ni a yaga vakalevu na ivakaraitaki i Jisu vei ira tale eso, sega ni vosa ga e tukuna. Vakasamataka mada na ka ratou vulica na nona tisaipeli ena nona ivakaraitaki. A turaga yalomalua, yalovinaka qai yalololoma. (Maciu 8:​1-3; Mari. 6:​30-​34) E laurai tale ga vua na yalomalumalumu dina. (Joni 13:​2-5) Nira tomani Jisu na nona tisaipeli ena cakacaka vakavunau era raica ni daucakacaka, qai vuavuaivinaka na ka dina a vakatavulica. (Luke 8:1; 21:37, 38) Ena yaga vakacava vei ira tale eso na noda ivakaraitaki ena cakacaka vakavunau?

2. E yaga vakacava na noda ivakaraitaki vinaka ena cakacaka vakavunau?

² Ira na Taukeinivale: Era dau kauai vakalevu na itaukeinivale ena isulu rakorako eda tokara, na noda itovo vinaka, kei na noda dauveikauaitaki. (2 Kor. 6:3; Fpai. 1:​27) Era kauai tale ga nida vakayagataka wasoma na iVolatabu. So tale era taleitaka na noda dauvakarorogo ena gauna era vosa kina. O koya gona na noda ivakaraitaki vinaka ena vica na sala qo era na galeleta kina eso tale na itukutuku vinaka ni Matanitu eda kacivaka.

3. E yaga vakacava noda ivakaraitaki vei ira na tacida?

³ Ira na Tacida: Meda vakasamataka tale ga na yaga ni noda ivakaraitaki vei ira na tacida. Noda gugumatua ena cakacaka vakavunau, era na via muria kina eso tale na noda ivakaraitaki. Eda kila ni rawa ni vagata ga na kaukamea na kaukamea. Koya gona, noda vakarautaka vinaka na ka meda tukuna ena cakacaka vakavunau ena vakauqeti ira tale eso mera vakavinakataka na iwalewale ni nodra vunau. (Vkai. 27:17) Nida dauvola vakamatata na kedra itukutuku na tataleitaki qai lesuvi ira totolo era na muria kina eso tale na noda ivakaraitaki. Ena yaga vakalevu vei ira na tacida na noda ivakaraitaki nida saga meda vakacavara vinaka na noda cakacaka vakavunau.​—2 Tim. 4:5.

4. Na cava e ka vakayalomatua kina meda dikeva wasoma na noda ivakaraitaki?

⁴ Ena rairai ka vakayalomatua meda dikeva wasoma na veika eda cakava se tukuna, kei na veivakamuai ni noda ivakaraitaki vei ira tale eso. Na noda ivakaraitaki vinaka ena vakamarautaki Jiova, eda na duavata tale ga kei na veika a cavuta na yapositolo Paula: “Moni vakatotomuri au, me vaka ga na noqu vakatotomuri Karisito.”​—1 Kor. 11:1.