Muria na iVakaraitaki i Jisu
1. Na ivakaraitaki cava a biuta tu o Jisu?
1 Noda vukea e so mera tisaipeli, meda nanuma tiko ni bibi na noda ivakaraitaki. O Jisu e sega ni dau veivakavulici wale ga, e ivakaraitaki vinaka tale ga. O ira na vakararai tu ena gauna oya era raica nona gugumatua, nona lomani ira dina na tamata, kei na nona yalogu ni vakayacora na loma i Tamana.—1 Pita 2:21.
2. Ena uqeti ira vakacava e so na noda gumatua ena cakacaka vakavunau?
2 Nida Cakacaka Vakavunau: Me vakataki Jisu, na noda ivakaraitaki ena uqeti ira tale ga eda veitomani ena cakacaka vakavunau. O ira na dautukutuku vou kei ira na dautukutuku era se sega ni matau ena basoga kece ni cakacaka vakavunau, ena uqeti ira na noda gugumatua mera vakasamataka kina na ivalavala ni nodra cakava tiko na cakacaka oqo. Noda mamarau kei na noda kauaitaki ira dina na tamata, era na raica kina na bibi ni kena bulataki na itovo vaka oqo ena cakacaka vakavunau. Nira raica noda gumatua ni vakayagataka na iVolatabu, da veisikovi lesu, kei na caka vuli iVolatabu, ena uqeti ira tale ga mera cakava vaka kina.
3. Era na vuli vakacava mai na noda ivakaraitaki o ira na vuli iVolatabu?
3 Nida Caka Vuli iVolatabu: O ira na vuli iVolatabu era dau vuli ena noda ivakaraitaki. Kena ivakaraitaki, eda na vakamacalataka beka vei ira na bibi ni vakavakarau ena vuli, nodra vakaraica na tikinivolatabu, na toqai ni tikina bibi, ia era na raica tale tiko ga se da cakava tiko na veika oqori se sega. (Roma 2:21) Kevaka eda dau yaco yani ena gauna lokuci me caka kina na vuli, era na taura vakabibi na vuli. Era na vakaraica tale ga na noda vakuai keda meda cakacaka vakavunau, vaka kina na dei ni noda vakabauta. Sega ni kurabuitaki noda raica e so na vuli iVolatabu era yaco mera dautukutuku gugumatua ra qai vuavuaivinaka, baleta nira muria vinaka na nodra qasenivuli na nona ivakaraitaki o Jisu.
4. Na cava era na vulica e so mai na noda ivakaraitaki ena soqoni?
4 Nida Tiko ena Soqoni: Na noda ivakaraitaki na lewe ni ivavakoso ena soqoni e tiki ni veivakavulici. Ena uqeti ira na tataleitaki era sa tekivu tiko ena soqoni na noda ivakaraitaki vinaka. Era na raica na noda veikauaitaki vakamataveitacini, na rakorako ni noda isulusulu kei na sasauni. (Same 133:1) Era na raica tale ga noda sega ni dau calata na soqoni kei na noda dau tusanaka noda vakabauta nida saumitaro. A dikeva e dua na vulagi ena soqoni na totolo ni nona cega e dua na goneyalewa lailai e dua na tikinivolatabu, kei na nona muria toka na kena wiliki. Nona ivakaraitaki na goneyalewa oqo e uqeti koya sara ga na vulagi me vuli iVolatabu.
5. Na cava meda kua kina ni taura vakamamada na bibi ni noda ivakaraitaki?
5 E uqeti keda na iVolatabu meda vakatotomuria na nodra ivakaraitaki vinaka na tacida. (Fpai. 3:17, VV; Iper. 13:7) Meda nanuma tiko ni kevaka eda vakatotomuria vakavoleka na ivakaraitaki i Jisu, ena uqeti ira tale ga na vakararai tu. Noda kila oqo, meda nanuma na ka e tukuni ena 1 Timoci 4:16: ‘Vakaraici iko vinaka, kei na ka o vakavuvulitaka.’