“Ena Vunautaki Mada na iTukutuku Vinaka”!
1. Eda kila vakacava ni sega ni dua na ka ena tarova na cakacaka vakavunau?
1 E sega ni dua na ka ena tarova na kena vakayacori na inaki i Jiova. (Aisea 14:24) A nanumi nira na sega ni vakadrukai ira na 135,000 na mataivalu ni Mitiani o Kitioni na Dauveilewai kei na 300 na nona sotia, ia e tukuna vua o Jiova: ‘O na vakabulai ira na Isireli mai na ligadra na kai Mitiani: Au sega li ni talai iko?’ (Dvei. 6:14) Na cakacaka cava nikua e tokona tiko o Jiova? A tukuna o Jisu: “Ena vunautaki mada na itukutuku vinaka ni matanitu ni Kalou ena veiyasa i vuravura.” (Maciu 24:14) Sega ni dua ena tarova na kena vakayacori na cakacaka qo!
2. Na cava eda nuidei kina ni na tokoni keda o Jiova?
2 Ena Vukei Keda Yadudua o Jiova: Eda kila ni dau tokoni ira vakailawalawa nona iVakadinadina o Jiova. Ena vukei keda yadudua? A tokoni Paula o Jiova ni vakayagataki Luvena o Jisu me vakaukauataki Paula ena gauna a gadreva kina nona veivuke. (2 Tim. 4:17) Eda nuidei tale ga ni na tokoni keda yadudua o Jiova meda vakacavara na nona inaki.—1 Joni 5:14.
3. Ena ituvaki cava e vukei keda kina o Jiova?
3 E vakaocai iko na lomaocaocataki ni bula e veisiga, e sega kina nomu igu mo lako ena cakacaka vakavunau? “Sa dausolia na kaukauwa vei ira era sa malumalumu.” (Aisea 40:29-31) O sotava tiko na veivakararawataki se na veitusaqati? “Mo biuta vei Jiova na nomui colacola bibi, ena tokoni iko ko koya.” (Same 55:22) O dau datuvu ena so na gauna? “Mo lako, ka’u na tiko kei na gusumu.” (Lako 4:11, 12) E sega ni rawa ni o lako wasoma ena cakacaka vakavunau ena vuku ni tauvimate? E vakamareqeta o Jiova na nomu veiqaravi mai vu ni lomamu, ena vakayagataka tale ga, se mani vakacava na kena lailai.—1 Kor. 3:6, 9.
4. Ena yaga vakacava vei keda noda nuitaki Jiova?
4 Ni ‘dodo yani na ligana [o Jiova], o cei me na vakasuka?’ (Aisea 14:27) Nida nuitaka na veivakalougatataki i Jiova ena cakacaka vakavunau, meda gumatua mada ga ni vunau ‘ena doudou ena veitokoni i Jiova.’—Caka. 14:3.