E Vakatakila na Lagilagi ni Kalou na Veika Buli
E levu era qoroya na veika buli. Ia e vica ga era kila ni veika buli e vakatakila na vakasama kei na ivakarau ni lomana na Dauveibuli. (Roma 1:20) Ena dua na gauna balavu sa oti a kila rawa o Tevita na veika baleti Jiova ena nona Vosa uqeti. E veivolekati tale ga kei na Kalou ni “vakananuma” se raica na nona ibulibuli. (Same 8:3, 4) Ena yaga dina vei keda, ira na luveda kei na noda vuli iVolatabu na vidio The Wonders of Creation Reveal God’s Glory, eda na dikeva kina eso na ibulibuli i Jiova, nona itovo kei na nona ivakarau ena vakavolekati keda vua. Ni o sarava oti na iyaloyalo saga mo sauma na taro qo.
(1) Nida raica na levu ni maliwalala kei na vuravura kei na kena tuvanaki vakamatau ni veika e tu kina, e uqeti keda vakacava qori meda vakavinavinakataki Jiova vakalevu? (Aisea 40:26) (2) Nida raica na wai, na cava eda rawa ni vulica me baleti koya e bulia? (Vkta. 14:7) (3) E kilai vakacava na vuku i Jiova ena levu ni vuravura kei na kena yawa mai na matanisiga? (4) Na cava na yaga ni vula? (Same 89:37) (5) A buli keda vakacava o Jiova meda marautaka na bula? (6) Na cava na DNA? (Same 139:16) (7) E duidui vakacava na tamata mai vei ira kece na ibulibuli i Jiova? (Vkte. 1:26) (8) Na cava o diva tu ena vuravura vou?
iKuri ni iYaloyalo: (9) E vu vakacava na roka? (10) E vorata vakacava na idre ni vuravura na wai me yaco sara ena vuso ni kau? (11) E yaga vakacava e yagoda na wai? (12) Tukuna e vica na ivakaraitaki ni ka era tautauvata kina na veika buli. (13) Era kila vakacava na manumanu na gauna mera cakacaka vata kina? (14) Na cava na “golden angle,” e laurai vakacava ena veika buli?
“Raici Ira Mada” na iBulibuli i Jiova: A uqeti keda o Jisu meda “raici ira mada na manumanuvuka” meda “vuli [tale ga] mai na lili ni veikau.” (Maciu 6:26, 28) Na noda cakava qori ena vakaukauataka na noda vakabauta, eda na nuitaki na Dauveibuli, da qai vakavinavinakataka na vuku i Jiova, nona kaukaua me taqomaki keda kina kei na nona loloma. Me kua mada ga ni vakaosoosotaki keda na veika ni vuravura qo, meda saga me tiko na gauna meda dikeva kina na vakasakiti ni bulibuli i Jiova, da qai vakasamataka na ka e tukuna me baleta na noda Kalou.—Same 19:1.