Lima na Sala me Dua Kina Nomu Vuli iVolatabu

1. Ke dredre me dua na nomu vuli iVolatabu ena yalava, na cava mo cakava? Na cava na vuna?

¹ Vakacava e dredre me dua na nomu vuli iVolatabu? Mo sasaga tiko ga. O Jiova ena vakalougatataki ira era sega ni vakacauoca ni cakava na lomana. (Kala. 6:9) E lima na vakatutu qo ena rawa ni vukei iko.

2. Sala cava eda rawa ni veisureti kina vakadodonu me dua kina na noda vuli iVolatabu?

² Veisureti Vakadodonu: E levu era kila nida dauveisoliyaka Na Vale ni Vakatawa kei na Yadra!, ia era na rairai sega ni kila nida dau veisureti tale ga ena vulici ni iVolatabu. Vakacava mo veisureti mada vakadodonu ni o vunau e veivale? O rawa ni tarogi ira tale ga na tataleitaki o sikova ke ra vinakata mera vulica na iVolatabu. Ke ra bese, o rawa ni solia tiko ga vei ira na ivola qai vakabulabulataka tiko ga na nodra tataleitaki. E dua na tacida tagane a dau sikova voli e dua na veiwatini me vica vata na yabaki me solia na nodrau mekesini. Dua na siga ni solia oti na nodrau mekesini vou qai vakarau biubiu, a nanuma sara me tarogi rau: “Drau vinakata mo drau vulica na iVolatabu?” A kidacala tale ni rau vakaio. Ena gauna qo erau sa papitaiso.

3. Meda nanuma beka nira sa vulica tiko na iVolatabu o ira na dau lako mai ena soqoni? Vakamacalataka.

³ Ira na Tiko ena Soqoni: Kua ni nanuma ni o ira na tataleitaki era dau lako yani ena soqoni era sa vulica tiko na iVolatabu. A tukuna e dua na tacida tagane: “E levu na noqu vuli iVolatabu au tauyavutaka ga ena noqu dau tarogi ira na tiko ena soqoni.” A nanuma e dua na tacida yalewa me vosa vua e dua na marama mamadua erau sa papitaiso na luvena yalewa rau qai lewena tiko na ivavakoso. Sa rauta ni 15 na yabaki na nona dau lako yani ena soqoni na marama ya, e dau yaco yani ena Vale ni Soqoni ena gauna sara ga e tekivu kina na soqoni, qai dau biubiu ena gauna ga e oti kina. A vakadonuya sara na marama ya me vuli, sa tu qo ena dina. E vola na tacida yalewa a vakavulici koya ena iVolatabu: “Au rarawataka ga niu waraka sara me oti e 15 na yabaki meu qai tarogi koya ke via vulica na iVolatabu!”

4. Eda rawa ni tekivuna vakacava na vuli iVolatabu nida taro se da tukuna vei ira eso tale nida rawa ni veivakavulici?

⁴ Taro, Tukuna Vei Ira Eso Tale: E saga e dua na tacida yalewa me dauveitomani kei ira tale eso ena caka vuli iVolatabu. Ni oti na vuli, e dau kerea vei qasenivuli me tarogi gonevuli ke kila tale tu eso era na vinakata mera vulica na iVolatabu. Ni o solia vua e dua o dau sikova na ivola Kaya na iVolatabu, o rawa ni taroga: “O kila tale e dua ena vinakata tale ga me dua na nona ivola va qori?” Ena so na gauna ni vakatau ena ituvaki, ena rairai sega ni rawa vua e dua na dautukutuku se painia me vakavulica e dua na tataleitaki e sotava ena yalava. Mo tukuna gona vei ira qori ni o tu vakarau mo vakavulica e dua ena iVolatabu.

5. Na cava meda tarogi ira kina na sega ni vakabauta e tiko ena dina na watidra ke ra via vuli iVolatabu?

⁵ Sega ni Tiko ena Dina na Watidra: Eso beka na dautukutuku ena nomu ivavakoso e sega ni tiko ena dina na watidra? Eso vei ira qori era na rairai sega ni taleitaka mera veitalanoataka na iVolatabu kei na watidra e lotu vaKarisito, ia era na marau mera vuli iVolatabu kei na dua e sega ni lewe ni nodra vuvale. Ke o via sureta e dua vei ira qori me vuli iVolatabu, ena vinaka mo veivosaki rawa kei na watina e tiko ena dina mo rawa ni kila na iwalewale vinaka duadua mo muria.

6. Na cava e yaga kina na masu nida saga tiko me dua na noda vuli iVolatabu?

⁶ Masu: Kua ni raica vakamamada na yaga ni masu. (Jeme. 5:16) E yalataka o Jiova me rogoca na noda kerekere ke salavata kei na lomana. (1 Joni 5:14) A masuta e dua na tacida tagane e dau osooso me dua na nona vuli iVolatabu, ia a veinanuyaka o watina ke na tiko na gauna me na vukei gonevuli kina, vakabibi ke leqataka o gonevuli e levu na ka. Sa qai vakaraitaka vei Jiova na ka e kauai kina ni masulaka tiko me dua na vuli iVolatabu nei watina. Ni oti e rauta ni rua na macawa, a saumi na nodrau masu ni a sotava e dua na painia ena ivavakoso e dua na turaga a vinakata me vulica na iVolatabu qai tukuna vua na tacida tagane me rau sa vuli. A qai vola o yalewa: “Vei ira era nanuma ni sa na sega tu ga ni rawa ni dua na nodra vuli iVolatabu, au kaya: Mo vakamacalataka sara ga na ka o vinakata ni o masu, mo masulaka tiko ga. Au sega ni tukuna rawa na levu ni neirau marau.” Ke o dau vosovoso, ena rawa ni dua na nomu vuli iVolatabu, o na vakila tale ga na marau ni o vukea e dua me muria na “sala e basika ina bula.”​—Maciu 7:13, 14.