Wase 7—Na Ka me Caka Mera Toso Kina Noda Vuli iVolatabu
Na Masu ena Gauna ni Vuli
1. (a) Na cava e veiganiti kina me dolavi qai tini na vuli iVolatabu ena masu? (b) Eda na vakaraitaka vakacava vei gonevuli na vuna me caka kina na masu?
1 E bibi na veivakalougatataki i Jiova mera toso vinaka kina vakayalo na vuli iVolatabu. (1 Kor. 3:6) Oya na vuna e veiganiti kina me dolavi qai tini tale ga na vuli ena masu. Eda rawa ni cakava oqo ena imatai sara ga ni gauna eda caka vuli kina vei ira era dau kauaitaka nodra bula vakayalo. Ia, vei ira e so tale na gonevuli, de dua eda raica ni veiganiti me qai vakayacori na masu ena dua tale na gauna e muri. E rawa nida vakayagataka na Same 25:4, 5 kei na 1 Joni 5:14 mera raica kina na gonevuli na vuna me caka kina na masu, da rawa tale ga ni vakayagataka na Joni 15:16 meda vakamacalataka kina na bibi ni masu e caka vei Jiova ena vuku i Jisu Karisito.
2. Ke dua na tacida yalewa e salavata kei na dua na tacida tagane papitaiso se dautukutuku bera ni papitaiso, o cei e dodonu me masu?
2 O cei e dodonu me masu ena vuli iVolatabu? Ke dua na tacida tagane papitaiso erau salavata kei na dua na tacida yalewa ena vuli iVolatabu, ena masu na tacida tagane, dina ga ni na taura na vuli na tacida yalewa qai ubia na uluna. (1 Kor. 11:5, 10) Ia, kevaka e dua na tacida tagane e dautukutuku bera ni papitaiso e salavata kei na dua na tacida yalewa ena vuli iVolatabu, ena masu ga na tacida yalewa. Ena ituvaki oqori, e dodonu me ubia na uluna na tacida yalewa ni masu vaka kina ni caka vuli iVolatabu.
3. Na cava meda okata ena masu e caka ena vuli iVolatabu?
3 Na Ka me Okati ena Masu: Na masu e caka ena vuli iVolatabu me lekaleka ga qai matata. Dina ga nida na kerea na veivakalougatataki ni Kalou ena vuli da qai vakavinavinakataka na ka dina eda vulica, e veiganiti tale ga meda vakacaucautaki Jiova na iVurevure ni ka e vulici. (Aisea 54:13) Rawa tale ga nida okata ena noda qaqanimasu na veika e vakaraitaka na noda kauaitaki ira dina na gonevuli, kei na noda vakavinavinakataka na isoqosoqo e vakayagataka tiko o Jiova. (1 Ces. 1:2, 3; 2:7, 8) Noda kerea vei Jiova me vakalougatataka na sasaga i gonevuli me bulataka na ka e vulica tiko, e rawa ni raica kina o koya na bibi ni kena ‘muri na vosa.’—Jeme. 1:22.
4. E yaga vakacava na kena dolavi kei na tini na vuli ena masu?
4 E yaga vakalevu na masu. E vakalougatataki keda kina na Kalou. (Luke 11:13) E raici kina vakabibi na vulici ni Vosa ni Kalou. Ena vulica tale ga na masu o gonevuli ni rogoca na qaqa ni noda masu. (Luke 6:40) Kena ilutua, na masu e vu mai ena noda lomana na Kalou kei na noda vakavinavinakataka na nona itovo qoroi, e rawa ni uqeti ira na gonevuli mera bucina na veiwekani voleka kei Jiova.