iDusidusi ni iVola ni Soqoni ni Bula vaKarisito kei na Cakacaka Vakaitalatala
JANUERI 7-13
Vakekeli ena Vosa ni Kalou
nwtsty ivakamacala ni vosa ena Cak 22:16
mo vuya laivi na nomu ivalavala ca ena nomu masuta na yacana: Se “vuya laivi na nomu ivalavala ca qai masuta na yacana.” Ena vui laivi na nona ivalavala ca e dua ni masuta na yaca i Jisu, sega ni nona papitaiso ga ena wai. Qo e okati kina nona vakabauti Jisu, ena laurai na nona vakabauta ni vakaitavi ena cakacaka vaKarisito.—Cak 10:43; Jem 2:14, 18.
JANUERI 14-20
Vakekeli ena Vosa ni Kalou
nwtsty ivakamacala ni vosa ena Cak 23:6
o yau qo na Farisi: Era kilai Paula e vica era vakarorogo tiko. (Cak 22:5) Ni cavuta luve ni Farisi, era na kila ni tukuna tiko nira kaivata. E matata vei ira ni sega ni lasutaka na kena itukutuku, nira kila na Farisi lewe ni Sanadrini ni sa veisau me lotu vaKarisito gugumatua. Ia nona cavuta o Paula ni Farisi ena tikinivolatabu qo e rawa ni tiko kina na vakasama qo, e duavata kei ira na Farisi ni vakabauta na veivakaturi, e sega ni tokoni ira na Setoki. Ni cavuta qori, e yavutaka nona vosa ena dua na ka e duavata kina kei ira na Farisi. E rairai nuitaka ni nona vosa ena ulutaga e vakavu veiba qo ena uqeta eso na lewe ni Sanadrini mera tokoni koya, e mana dina na nona sasaga. (Cak 23:7-9) E veisemati na ka e cavuta o Paula ena tikinivolatabu qo Cak 23:6 kei na nona vakamacalataki koya vei Tui Akaripa. (Cak 26:5) Ni volavola tiko mai Roma vei ira na lotu vaKarisito e Filipai, e cavuta tale o Paula ni Farisi. (Flp 3:5) E yaga tale ga noda wilika ena Cak 15:5 na kedra itukutuku eso era Farisi tu ena dua na gauna.—Raica na ivakamacala ni vosa ena Cak 15:5.
nwtsty ivakamacala ni vosa ena Cak 24:24
Tarusila: E gone duadua vei ratou na luvena yalewa o Eroti e cavuti ena Cak 12:1, ya o Eroti Akaripa na iMatai. A sucu ena rauta na 38 G.V., e taci Akaripa na iKarua, kei Perinaise. (Raica na ivakamacala ni vosa ena Cak 25:13 kei na iVakamacala ni Vosa ena iVolatabu, “Eroti.”) Na ikarua ni watina o kovana Filikesa. Na imatai ni watina o Tui Azizus e Emesa mai Siria, e sereki koya qai vakawatitaki Filikesa ena rauta na yabaki 54 G.V., se ni sa rauta ni yabaki 16. A rairai tiko ena gauna e cavuta kina o Paula e matai Filikesa “na yalododonu, na lewamatau, kei na veilewai se bera mai.” (Cak 24:25) E lewa o Filikesa me vesu tiko ga o Paula ni sosomitaki koya o Fesito, me “vakayalovinakataki ira na Jiu.” Era nanuma kina eso ni cakava qori me vakamarautaki watina o Tarusila, e Jiu.—Cak 24:27.
JANUERI 21-27
Vakekeli ena Vosa ni Kalou
nwtsty ivakamacala ni vosa ena Cak 26:14
caqeta tiko na matanimoto: Qo na kau momoto era tonoki kina na manumanu. (Dvl 3:31) Na matavosa “caqeta na matanimoto,” e dua na ivosavosa e laurai ena ivola vaKirisi. Qo e yavutaki ena nona dau caqeta na bulumakau be na matanimoto qai mavoa kina. Qori tale ga na ka e cakava o Saula ni bera ni mai lotu vaKarisito. Ni saqati ira na imuri i Jisu e tokoni ira tiko na Kalou o Jiova, e vakaleqai koya ga kina o Paula. (Vakatauvatana Cak 5:38, 39; 1Tm 1:13, 14.) Ena Dvu 12:11, e vakatauvatani na “matanimoto” kei na vosa ni vuku e uqeti koya e vakarorogo me muria na ivakasala.
nwt ivakamacala ni vosa ena iVolatabu
Matanimoto. Tolonikau balavu e kaukamea na muana momoto, era vakayagataka na dauteitei mera tonoki kina na manumanu. Vakatauvatani kei na vosa ni tamata vuku me uqeti koya e rogoca me muria na ivakasala vuku. Na ivosavosa, “caqeta tiko na matanimoto” e vu mai na nona dau caqeta na bulumakau be na matanimoto qai mavoa kina, ni sega ni taleitaka me tonoki.—Cak 26:14; Dvl 3:31.
JANUERI 28–FEPERUERI 3
Vakekeli ena Vosa ni Kalou
nwtsty ivakamacala ni vosa ena Cak 27:9
[na lolo ena] Siga ni Veibuluti: Se “na lolo ena vulaibotabota.” vaKirisi, “na lolo.” Na vosa vaKirisi ni “lolo” e dusia na lolo e vakaroti ena Lawa e vola o Mosese, e dau vakayacori e veiyabaki ena Siga ni Veibuluti, e kilai tale ga me Yom Kippur (vakaIperiu, yohm hak·kip·pu·rimʹ, “siga ni veibuluti”). (Vns 16:29-31; 23:26-32; Tvl 29:7; raica na iVakamacala ni Vosa ena iVolatabu, “Siga ni Veibuluti.”) Ni dua e “vakararawataki” ena Siga ni Veibuluti, e kena ibalebale ga me vakatabui se vakuai koya ena so na ka, okati kina nona sega ni kana. (Vns 16:29, vmr.) Na kena volai ena Cak 27:9 “na lolo” e tokona na vakasama bibi ni nona vakuai koya e dua ena Siga ni Veibuluti, okati kina nona sega ni kana. Na lolo ena Siga ni Veibuluti e donuya na icavacava ni Seviteba se itekitekivu ni Okotova.
nwtsty ivakamacala ni vosa ena Cak 28:11
Luvei Seusi: E cavuti ena itukuni mai Kirisi kei Roma, ni “Luvei Seusi” (vaKirisi, Di·oʹskou·roi) o Castor kei Pollux, na druaivalu ni kalou o Seusi (Jupita) kei Ranadi Leda ni Sparta. E kilai ni rau dau taqomaki ira na dausoko mera kua ni leqa e wasawasa. Na itukutuku qo me baleta na muailiu ni waqa, e dusia ni a volavola e dua e raica se vakadinadinataka.