iDusidusi ni Soqoni ni Bula vaKarisito kei na Cakacaka Vakaitalatala

NOVEBA 4-10

Vakekeli ena Vosa ni Kalou

it-1 862 ¶5

Veivosoti

E sega ni cala meda kerea na Kalou me vosoti ira eso tale, o ira mada ga na lewe ni ivavakoso taucoko. Qori na ka e cakava o Mosese ena vukudra na lewe ni matanitu o Isireli, e vakatusa na nodra ivalavala ca qai kerea mera vosoti, mani rogoca o Jiova na nona masu (Tvl 14:19, 20) O Solomoni tale ga e vakayacora qori ena gauna e vakatabui kina na valenisoro. E masuti Jiova me bau vosoti ira na nona tamata nira cala ra qai veivutuni. (1Tu 8:30, 33-40, 46-52) O Esera e matataki ira na Jiu era lesu ina nodra vanua ni vakatusa e matanalevu na nodra ivalavala ca. Nona masu mai vu ni lomana kei na nona veiuqeti, era muria kina na Jiu na ka e vinakati me vosoti ira kina o Jiova. (Ese 9:13–10:4, 10-19, 44) O Jemesa e uqeti ira na tauvimate vakayalo mera kacivi ira na qase ni ivavakoso mera masulaki koya, ke “valavala ca ena vosoti.” (Jem 5:14-16) Ia e “tiko na ivalavala ca e tini ena mate” oya na ivalavala ca ena yalo tabu nida nakita meda valavala ca, ena sega ni vosoti. Na lotu vaKarisito ena sega ni masulaki ira era cala va qori.—1Jn 5:16; Mac 12:31; Ipe 10:26, 27; raica SIN, I; SPIRIT

NOVEBA 11-17

Vakekeli ena Vosa ni Kalou

it-2 279

Kana ni Veilomani

E sega ni vakamacalataka na iVolatabu na ibalebale ni kana ni veilomani, se tukuna na levu ni gauna me vakayacori kina. (Juta 12) A sega ni vakarota na Turaga o Jisu Karisito se o ratou na nona yapositolo me caka, e kena irairai gona ni sega ni lavaki se me ivakarau tudei. Era kaya eso ni qori na gauna era dau caka magiti kina na lotu vaKarisito vutuniyau mera sureti na tacidra dravudravua. Era mai kana vata kina ena veilomani vakaveitacini na gone sega ni vakatamani, na yada, na vutuniyau, kei ira na dravudravua ena dua na teveli e sinai vutuvutu.

it-2 816

Vatu

E dua tale na vosa vaKirisi, spi·lasʹ, e dusia na vatu se cakau vuni e dromu e lomaniwai. E vakayagataka o Juta me dusia eso na tagane era curu yani ena ivavakoso vaKarisito e ca na nodra inaki. Me vaka ni leqataki na waqa ena cakau dromu, era veivakaleqai tale ga na tagane qori ena ivavakoso. E tukuni me baleti ira: “O ira qo na vatu e dromu e lomaniwai nira kana vata kei kemuni ena nomuni kana ni veilomani.”—Juta 12.

NOVEBA 25–TISEBA 1

Vakekeli ena Vosa ni Kalou

re 76-77 ¶8

Na Totoka ni Qiqi Vakaturaga i Jiova

⁸ E kila vinaka o Joni nira lesi na bete mera veiqaravi ena valeniveitavaki. De dua ena kidroataka na ka e raica tarava: “E wavokita na idabedabe vakaturaga qo e 24 tale na idabedabe vakaturaga, au qai raica nira dabe tiko kina e 24 na qase era tokara na isulu vulavula, e toka e uludra na isalanitui koula.” (Vakatakila 4:4) Era sa sega ni veiqaravi na bete, ia o ira ga na 24 na qase, era dabe ena idabedabe vakaturaga, era dara tale ga na isala ni tui. O cei o ira na 24 na qase qo? Qo o ira na lumuti ena ivavakoso vaKarisito, era vakaturi ra qai dabe ena idabedabe vakaturaga e yalataka vei ira o Jiova. Eda kila vakacava?

re 80 ¶19

Na Totoka ni Qiqi Vakaturaga i Jiova

¹⁹ Na cava e dusia na kabula qori? Eda na sauma ena raivotu e vola e dua tale na parofita, o Isikeli. E raica o Isikeli ni dabe o Jiova ena nona qiqi vakaturaga, eratou tomani koya na kabula, na kedratou irairai e via tautauvata kei na ka e vakamacalataka o Joni. (Isikeli 1:5-11, 22-28) Oti, e raica tale o Isikeli na qiqi vakaturaga ni salavata mai kei ratou na kabula. Na gauna qo, e kaya ni ratou jerupi na kabula qori. (Isikeli 10:9-15) Na va na kabula e raica o Joni e dusia na iwiliwili levu ni jerupi era tu volekata na Kalou—era kabula cecere ena isoqosoqo vakalomalagi. E sega ni ka vou vei Joni me raica nodra tu volekati Jiova na jerupi. Ena ituvatuva ni valeniveitavaki ena gauna makawa, e rua na jerupi koula e tiko ena isogo ni kato ni veiyalayalati, e vakatayaloyalotaka na idabedabe vakaturaga i Jiova. Ena maliwa ni rua na jerupi qo, e dau rogo mai kina na domo i Jiova ni vakaroti ira na lewe ni matanitu o Isireli.—Lako 25:22; Same 80:1.