Sala e Sauma Kina o Jiova Noda Masu

1-2. Na cava eda na rairai taroga me baleta na noda masu?

O DAU taroga ke sauma tiko nomu masu o Jiova? Ke vaka kina, era dau taroga tale ga qori eso. E vica na tacida vakayalo e dau va qori na nodra rai, vakauasivi nira sotava tiko na ituvaki dredre. Na ituvaki qori e dau dredre kina meda kila ke sauma tiko na noda masu o Jiova.

² Meda railesuva mada na vuna eda nuidei kina ni dau sauma o Jiova nodra masu na nona dauveiqaravi. (1 Joni 5:15) Eda na veivosakitaka tale ga na taro qo: Cava ena rairai sega kina ni sauma o Jiova noda masu ena so na gauna? Na sala cava e sauma tiko kina o Jiova noda masu nikua?

ENA RAIRAI SEGA NI SAUMA NODA MASU O JIOVA ME VAKA EDA NAMAKA

3. Na cava e vinakata kina o Jiova meda masu vua?

³ E vakadeitaka na iVolatabu ni lomani keda vakalevu o Jiova, eda talei tale ga vua. (Akeai 2:7; 1 Joni 4:10) Qori na vuna e vinakata kina meda kerea nona veivuke ena masu. (1 Pita 5:6, 7) E via vukei keda meda toro volekati koya, meda vosota tale ga na veika dredre.

4. Eda kila vakacava ni dau sauma o Jiova na nodra masu na nona dauveiqaravi? (Raica tale ga na iyaloyalo.)

⁴ Eda wilika ena iVolatabu ni dau sauma o Jiova na nodra masu na nona dauveiqaravi. O bau vakasamataka e dua na kena ivakaraitaki? Vakacava o Tui Tevita? E sotava e levu na meca rerevaki ena nona bula, dau kerea na veivuke i Jiova ena masu. Dua na gauna e vakamamasu va qo: “Kemuni Jiova, ni rogoca na noqu masu, rogoca na noqu vakamamasu ni kere veivuke. Ni rogoci au mai, ni oni yalodina qai yalododonu.” (Same 143:1) E sauma o Jiova na masu i Tevita me vakabulai. (1 Sam. 19:10, 18-20; 2 Sam. 5:17-25) E rawa kina ni kaya ena nuidei o Tevita: “E voleka o Jiova vei ira kece na kacivi koya.” Eda rawa tale ga ni nuidei va qori.—Same 145:18.

5. E dau sauma o Jiova nodra masu na nona dauveiqaravi ena gauna e liu me vaka na ka era namaka? Tukuna e dua na ivakaraitaki. (Raica tale ga na iyaloyalo.)

⁵ Ena rairai sega ni sauma o Jiova na noda masu ena sala eda namaka. Qori na ka e yaco vua na yapositolo o Paula. E kerea na Kalou me kauta tani “e dua na votonikau.” E masulaka sara ga vakatolu na leqa e vakararawataki koya tiko qori. Vakacava e sauma o Jiova na nona masu? Io, e sega ga ni vaka na kena e namaka o Paula. E sega ni kauta tani o Jiova na leqa qori, e vakaukauataki Paula ga me qaravi koya tiko ga ena yalodina.—2 Kor. 12:7-10.

6. Na cava eda rairai nanuma kina ni sega ni sauma o Jiova na noda masu?

⁶ Eso na gauna e dau saumi tale ga na noda masu ena sala eda sega ni namaka. Eda nuidei ga ni o Jiova e kila vinaka tu na sala meda vukei kina. Ena “rawa ni cakava vei keda na ka e uasivia sara na ka eda kerea se bau vakasamataka.” (Efeso 3:20) Qori na vuna e dau sauma kina na noda masu ena gauna kei na sala eda sega sara ga ni bau vakasamataka.

7. Na cava ena rairai vinakati kina meda veisautaka na noda masu? Tukuna e dua na kena ivakaraitaki.

⁷ De dua e vinakati meda veisautaka na noda masu nida sa kila vinaka na loma i Jiova. Dikeva mada na ivakaraitaki nei Martin Poetzinger. Ni vakamau oti ga, e vesu sara ena nodra keba ni veivakararawataki na Nazi. A kerea mada me sereki koya o Jiova, me biuta na keba me lai qaravi watina, me tomana tale ga na cakacaka vakavunau. Ia ni oti e rua na macawa, e raica ni sega ni vakarautaka o Jiova e dua na sala me sereki koya kina. E masu tale: “Kerekere Jiova, moni vakaraitaka vei au na ka meu cakava.” E vakasamataka sara na veika era sotava tiko na vo ni tacina era vesu tu ena keba qori. Levu era leqataki ira tale ga na watidra kei na luvedra. E mani masulaka o Brother Poetzinger: “Jiova, vinaka vakalevu na noqu ilesilesi vou. Vukei au meu vakayaloqaqataki ira na taciqu, meu uqeti ira tale ga.” Qori sara ga na ka e cakava ena ciwa na yabaki tarava ni vesu tiko ena keba!

8. Na ka bibi cava meda dau vakasamataka nida masu tiko?

⁸ Meda nanuma ni tiko na inaki i Jiova, ena vakayacora tale ga ena nona gauna lokuci. E okati kina na nona vakaotia vakadua na leqa e vakavuna tiko na noda rarawa, me vaka na leqa tubukoso, tauvimate kei na mate. Ena vakayacora o Jiova na lomana ni vakayagataka na nona Matanitu. (Tani. 2:44; Vkta. 21:3, 4) Ia ni bera na gauna qori, e se vakatara tiko o Jiova me lewai vuravura o Setani.b (Joni 12:31; Vkta. 12:9) Ke walia na leqa ni kawatamata o Jiova ena gauna qo, ena rairai nanumi ni sa vinaka tiko na veiliutaki nei Setani. Nida waraka tiko gona me vakayacora o Jiova na ka e yalataka, e sega ni kena ibalebale qori ni sa vakanadakui keda. Meda veivosakitaka mada qo eso na sala e dau vukei keda kina o Jiova.

SALA E SAUMA KINA O JIOVA NODA MASU NIKUA

9. Ena vukei keda vakacava o Jiova ena noda vakatulewa? Tukuna e dua na ivakaraitaki.

⁹ E solia na vuku. E yalataka o Jiova ni na solia na vuku meda vakatulewa kina vakavinaka. E vinakati na vuku vakalou meda vakatulewataka na ka ena veisautaka na noda bula, me vaka noda vakatulewataka meda dawai tu ga se vakawati. (Jeme. 1:5) Dikeva nona ivakaraitaki e dua na tacida yalewa dawai, o Maria.c E veiqaravi voli ena marau ni painia tudei tiko ena gauna e sotava kina e dua na tacida tagane. E kaya: “Ni toso na neirau veikilai, keirau sa veitaleitaki. Au kila ni dodonu meu vakatulewa. Au masu vakalevu. Au vinakata na veidusimaki i Jiova, au kila tale ga ni na sega ni vakatulewa vei au.” E qai raica ni sauma nona masu o Jiova me vakatulewa vakayalomatua. Ena sala cava? E vakekeli ena noda ivola, e raica sara eso na ulutaga e saumi kina na nona lomatarotaro. E muria tale ga na ivakasala nei tinana, e marama yalodina. E vukei Maria qori me dikeva vinaka na lomana. Oti e vakatulewa sara vakayalomatua.

10. E vukei ira vakacava na nona dauveiqaravi o Jiova me vaka e tukuni ena Filipai 4:13? Tukuna e dua na kena ivakaraitaki. (Raica tale ga na iyaloyalo.)

¹⁰ E solia na kaukaua meda vosota. O Jiova e solia na kaukaua vua na yapositolo o Paula me vosota, ena solia tale ga vei keda na kaukaua meda vosota. (Wilika Filipai 4:13.) Vakasamataka mada nona vukea o Jiova e dua na tacida o Benjamin me vosota na ituvaki dredre. Ni se itabagone, eratou a tiko vakavuvale ena nodra keba na isenivalu e Aferika. E kaya o Benjamin: “Au dau masuti Jiova vakalevu, au kerei koya me vakaukauataki au meu cakava na ka e vakamarautaki koya. E sauma o Jiova na noqu masu ni vakaceguya na noqu vakasama, meu yaloqaqa tiko ga ena cakacaka vakavunau, e vakarautaka tale ga na ivola meu volekati koya kina.” E tomana o Benjamin: “Niu wilika na nodra ivakaraitaki na mataveitacini kei na noqu vulica na sala e vukei ira kina o Jiova mera vosota, e vakadeitaki au meu yalodina tiko ga.”

11-12. E vakayagataka vakacava na noda vuvale vakayalo o Jiova me saumi kina na noda masu? (Raica tale ga na iyaloyalo.)

¹¹ E vakayagataka na noda vuvale vakayalo. Na bogi ni bera ni cabora nona bula o Jisu, e masu vagumatua. E vakamasuti Tamana mera kua ni raicalataki koya e levu ni vosabeca na Kalou. Ia e sega ni cakava qori o Jiova, e vukei koya ga ni tala mai e dua vei ira na tacina agilosi me vakaukauataki koya. (Luke 22:42, 43) Ena rairai vukei keda tale ga o Jiova ni vakayagataka e dua na tacida me qiriti keda mai me vakayaloqaqataki keda se sikovi keda. Eda rawa sara ga ni qara na sala meda “vosa vinaka” kina vei ira eda vakabauta vata.—Vkai. 12:25.

¹² Vakasamataka mada nona ivakaraitaki e dua na tacida yalewa o Miriam. Ni oti e vica na macawa na mate i watina, a tiko taudua e vale, e rarawa vakalevu qai lomabibi. E sorova tiko na tagi, e via vosa vua e dua. E kaya: “Sa sega mada ga vei au na kaukaua meu qirita e dua, au mani masuti Jiova. Niu se tagi tiko ga salavata kei na noqu masu, sa taqiri na talevoni. Qori e dua na qase ni ivavakoso, e itokani voleka.” E vakacegui Miriam sara ga na qase ni ivavakoso qori kei watina. E vakadeitaka ni uqeta na tacida qori o Jiova me qiriti koya yani.

13. Tukuna e dua na ivakaraitaki ni nona vakayagataki ira na sega ni sokaloutaki koya o Jiova me saumi kina na noda masu?

¹³ E rawa ni vakayagataki ira na sega ni sokaloutaki koya. (Vkai. 21:1) Ena so na gauna e dau saumi nodra masu na dauveiqaravi i Jiova ni uqeti ira na sega ni sokaloutaki koya mera vukei ira. Me kena ivakaraitaki, e uqeti Tui Atakisekise me vakadonuya na nona kerekere o Niemaia me lesu me lai veivuke ena kena tara tale na koro. (Niem. 2:3-6) Nikua tale ga o Jiova e rawa ni uqeti ira na sega ni sokaloutaki koya mera vukei keda ena gauna e vinakati kina.

14. Na cava o taleitaka ena ivakaraitaki i Soo Hing? (Raica tale ga na iyaloyalo.)

¹⁴ E raica e dua na tacida yalewa o Soo Hing na nona veivuke o Jiova ni vakayagataka nona vuniwai. E tauvi luvena tagane e vica na mate ni vakasama. Oti e mavoa bibi tale ga ena dua na vakacalaka levu, rau mani cegu mai na cakacaka vakaveiwatini me rau qaravi koya. Ratou leqa kina vakailavo. E kaya o Soo Hing ni nona bula e vaka na wadrega sa voleka ni cavuka, ni sa sega sara ga ni vosota rawa na ituvaki dredre ratou sotava tiko. E talaucaka kina na lomana vei Jiova me kerea na nona veivuke. E kauaitaka na kedratou ituvaki na nona vuniwai. Eratou rawata sara kina na veivuke ni matanitu, ratou toki tale ga ina dua na vale veiganiti. Oti qori e kaya o Soo Hing: “Keitou raica sara ga na liga i Jiova ena tikina qo. E ‘Daurogo masu’ dina o koya.”—Same 65:2.

VINAKATI NA VAKABAUTA MEDA KILA NA SALA E SAUMA KINA O JIOVA NODA MASU

15. Na cava e cakava e dua na tacida yalewa me kila ni dau saumi na nona masu?

¹⁵ Ena sega ni saumi tu ga na noda masu ena sala vakasakiti. Ia ena vukei keda na Tamada vakalomalagi meda yalodina tiko ga vua. Meda kila gona na sala e sauma kina o Jiova na noda masu. E nanuma e dua na tacida yalewa o Yoko ni sega ni sauma tiko o Jiova na nona masu, mani vakavola na veika e dau kerea vei Jiova. Oti toka e dua na gauna ni dikeva na veika sa vola tu, e raica ni sauma o Jiova e levu na ka e masulaka, eso mada ga sa guilecava. E bibi gona me tiko na gauna meda vakasamataka na sala e dau sauma kina o Jiova na noda masu.—Same 66:19, 20.

16. Eda vakaraitaka vakacava na vakabauta nida masu? (Iperiu 11:6)

¹⁶ Eda vakaraitaka na vakabauta nida masu vei Jiova, eda ciqoma tale ga na sala e saumi kina na noda masu. (Wilika Iperiu 11:6.) Vakasamataka mada na ivakaraitaki nei Mike kei watina, o Chrissy. Na nodrau isausau me rau veiqaravi e Peceli. E kaya o Mike: “Vica vata na yabaki neirau dau vakalewena tiko na fomu ni veiqaravi e Peceli, keirau masulaka wasoma tale ga vei Jiova. Ia keirau sega ni sureti.” Rau vakadeitaka o Mike kei Chrissy ni o Jiova e kila vinaka na sala me vakayagataki rau kina. Rau gumatua tiko ga ena veiqaravi, rau lai painia tudei ena vanua e vinakati kina na veivuke, rau veitokoni tale ga ena tarataravaki. Nikua rau sa veisiko tiko ena ivavakoso. E kaya o Mike: “E sega ni sauma o Jiova na noda masu ena sala eda namaka, ia e dau sauma ena sala e vinaka cake mai na ka eda vakasamataka.”

17-18. Na cava eda vakadeitaka ena Same 86:6, 7?

¹⁷ Wilika Same 86:6, 7. E vakadeitaka na daunisame o Tevita ni rogoca o Jiova nona masu, e sauma tale ga. O rawa ni nuidei va qori. Eda vakadeitaka ena ivakaraitaki ena ulutaga qo ni o Jiova e solia na vuku kei na kaukaua meda vosota kina. E rawa ni vakayagataka tale ga noda vuvale vakayalo, se o ira mada ga na sega ni sokaloutaki koya ena gauna qo mera vukei keda ena so na sala.

¹⁸ Ena rairai sega ni sauma o Jiova noda masu ena sala eda namaka, ia eda kila tiko ni na sauma. Ena vakarautaka na ka eda gadreva kei na kena gauna donu. Meda masu tiko ga ena vakabauta ni na “vakaceguya na veika era gadreva na kabula kece” ena vuravura vou sa voleka qo.—Same 145:16.