Vakatotomuri Ira na Agilosi Yalodina

1-2. (a) Eda duidui vakacava vei ira na agilosi? (b) Na cava eda tautauvata kina?

NIDA mai kila na dina, e sureti keda o Jiova meda lewena e dua na vuvale levu era dau veilomani, wili kina e vica vata na milioni na agilosi yalodina. (Tani. 7:​9, 10) Nida veivosakitaki ira na agilosi, de dua eda dau vakasamataka nira duidui vei keda. Kena ivakaraitaki, era bula makawa sara vei keda. (Jope 38:​4, 7) E levu sara nodra kaukaua. Kena ikuri, na nodra savasava kei na yalododonu, eda sega mada ga ni yacova rawa na tamata ivalavala ca.​—Luke 9:26.

² Ia e levu sara na ka eda tautauvata kina kei ira na agilosi. Kena ivakaraitaki, eda rawa ni vakatotomuria na itovo talei i Jiova. E tu vei keda na galala ni vakatulewa. E tiko tale ga na yacadra na agilosi, na itovo era kilai tani kina, kei na nodra dui itavi. Eda va tale ga qori. Me vakataki ira na agilosi, e vinakati meda sokalou vua na Dauveibuli.​—1 Pita 1:12.

3. Na cava eda vulica vei ira na agilosi yalodina?

³ Ni levu na ka eda tautauvata kina kei ira na agilosi, ena uqeti keda nodra ivakaraitaki vinaka, eda na vulica tale ga vei ira e levu na ka bibi. Eda na veivosakitaka ena ulutaga qo na sala meda vakatotomuria kina nodra yalomalumalumu, nodra lomani ira na tamata, nodra vosota, kei na nodra sasaga me savasava tiko ga na ivavakoso.

ERA YALOMALUMALUMU NA AGILOSI

4. (a) Era vakaraitaka vakacava na agilosi na yalomalumalumu? (b) Cava era yalomalumalumu kina? (Same 89:7)

⁴ Era yalomalumalumu na agilosi yalodina. E levu na ka era kila na agilosi, era kaukaua, era vuku, ia era talairawarawa ena veidusimaki i Jiova. (Same 103:20) Nira qarava tiko nodra itavi, era sega ni vakalevulevui ira ena ka era cakava se ra vakayagataka nodra kaukaua mera rogo kina. Era marautaka mera cakava na loma ni Kalou, ke sega mada ga ni kilai na yacadra.a (Vkte. 32:​24, 29; 2 Tui 19:35) Era vinakata me vakacaucautaki ga o Jiova, sega ni o ira. Na cava era sa rui yalomalumalumu kina na agilosi? Nira lomani Jiova, era dokai koya tale ga vakalevu.​—Wilika Same 89:7.

5. E vakaraitaka vakacava na yalomalumalumu e dua na agilosi ni vakadodonutaki Joni? (Raica tale ga na iyaloyalo.)

⁵ Dikeva mada ena ivakaraitaki qo nodra yalomalumalumu na agilosi. Ena rauta na 96 G.V., e vakaraitaka e dua na agilosi vua na yapositolo o Joni e dua na raivotu vakatubuqoroqoro. E sega ni tukuni na yacana. (Vkta. 1:1) Na cava e cakava o Joni ni raica na raivotu? E tekicuva me sokalou vua na agilosi. Ia e totolo ga nona tarovi koya na agilosi, e kaya: “Qarauna! Kua ni cakava qori! O yau na nomu itokani dauveiqaravi ga, au nodra itokani dauveiqaravi tale ga na tacimu . . . Qarava na Kalou!” (Vkta. 19:10) E yalomalumalumu sara ga na agilosi qori! A sega ni vinakata me vakacerecerei se dokai. E tukuna ga vei Joni me qarava na Kalou o Jiova. Ia e sega ni beci Joni. Dua na gauna balavu nona qaravi Jiova tu kina na agilosi qori, e kaukaua tale ga vei Joni. Ia e yalomalumalumu me tukuna vua ni nona itokani dauveiqaravi ga. Ni vakadodonutaka na yapositolo sa kenaturaga qori, a sega ni vosataki koya vakaukaua, ia e vosa ga vakayalovinaka. E rairai kila ni qoroya o Joni na ka e raica.

6. Eda na vakatotomuria vakacava na nodra yalomalumalumu na agilosi?

⁶ Eda na vakatotomuria vakacava nodra yalomalumalumu na agilosi? Nida qarava noda itavi, eda na sega ni tukutukuni keda, se saga meda dokai. (1 Kor. 4:7) Kena ikuri, eda na sega ni nanuma nida sa dua na ka, ke sa dede mada ga noda qaravi Jiova se lesi vei keda eso na itavi dokai. Ia ke levu mada ga na itavi eda qarava vei Jiova, e bibi meda vakamalumalumutaki keda tiko ga. (Luke 9:48) Eda vinakata meda veiqaravi me vakataki ira na agilosi. Eda sega ni vinakata meda vakacerecerei.

7. Eda na vakaraitaka vakacava na yalomalumalumu nida veivakadodonutaki se veivakasalataki?

⁷ Meda vakaraitaka tale ga na yalomalumalumu ke da vakadodonutaka se vakasalataka e dua na tacida vakayalo se luveda. Eso na gauna ena rairai vinakati meda veivunauci. Me vaka na agilosi e vakadodonutaki Joni ena yalovinaka, eda rawa ni veivunauci ia me kua ni yalolailai o koya e rogoca.Ke da sega ni vakalevulevui keda, eda na yavutaka noda ivakasala ena iVolatabu qai tau ena veidokai kei na yalololoma.​—Kolo. 4:6.

ERA LOMANI KEDA NA AGILOSI

8. (a) Me vaka e tukuni ena Luke 15:​10, era vakaraitaka vakacava na agilosi nira lomani keda? (b) Na cava na nodra itavi na agilosi ena cakacaka vakavunau? (Raica tale ga na iyaloyalo .)

⁸ Era sega ni nanuma na agilosi nida lolovira. Era lomani keda. Era marau vakalevu ni veivutuni e dua na tamata ivalavala ca, ya ni lesu vei Jiova e dua na sipi e yali, se veisautaka nona ivalavala me qaravi Jiova. (Wilika Luke 15:10.) Era dau tokoni keda tale ga na agilosi ena cakacaka vakavunau. (Vkta. 14:6) Era sega ni vunau vakadodonu vei ira na lewenivanua, ia e rawa nira dusimaka na dautukutuku vua e dua e via vulica na veika me baleti Jiova. Eda sega ni vakadeitaka sara ke ra dusimaki keda na agilosi vua e dua ena yalava. O Jiova e rawa ni vakayagataka eso tale na sala me vaka nona yalo tabu me vukei ira na via kilai koya, se dusimaki keda vei ira. (Caka. 16:​6, 7) Ia se vakayagataki ira tiko ga vakalevu na agilosi. Nida wasea gona na itukutuku vinaka, eda nuidei nira tu e kea na agilosi mera tokoni keda.​—Raica na kato “E Saumi Nodra Masu.”b

9. Eda na vakatotomuria vakacava na nodra loloma na agilosi?

⁹ Eda na vakatotomuria vakacava nodra loloma na agilosi? Nida rogoca ni kacivaki ni sa vakalesui mai e dua, eda na marau vakalevu me vakataki ira na agilosi. Meda tukuna vua na tacida qori nida marautaka ni mai qaravi Jiova tale, eda vakadeitaka tale ga vua nida lomani koya. (Luke 15:​4-7; 2 Kor. 2:​6-8) Kena ikuri, eda na vakatotomuri ira na agilosi nida gumatua ena cakacaka vakavunau. (Dauv. 11:6) Me vaka ga nodra veitokoni na agilosi nida wasea na itukutuku vinaka, eda na qara tale ga na sala meda tokoni ira na tacida ena cakacaka vakavunau. Kena ivakaraitaki, vakacava eda rawa ni tuvanaka meda cakacaka vata kei na dua na dautukutuku vou? Eda rawa ni vukei ira na itabaqase se o ira na tautauvimate meda veitomani ena vunau?

10. Na cava eda vulica ena ivakaraitaki nei Sara?

¹⁰ Na cava meda cakava ke vakaiyalayala na ka eda rawata? Eda rawa ni qara eso tale na sala meda cakacaka vata kina kei ira na agilosi ena cakacaka vakaitalatala. Rogoca mada nona ivakaraitaki e dua na tacida mai Idia o Sara.c E painia tiko me rauta ni 20 na yabaki, oti e qai tauvimate bibi, mani sega sara ga ni taubale rawa. Dua na ka nona rarawa. Ia ena nodra veitokoni na mataveitacini kei na nona dau wili iVolatabu wasoma, e donu tale kina nona rai. E mani raica eso tale na iwalewale vou me wasea kina na itukutuku vinaka. Ni sega ni dabe rawa me vola ivola, sa rawa ga ni qiri. E dau qiriti ira nona veisikovi lesu, era mani tukuna vua ni so tale era via vuli. Na cava e yaco? Ena loma ga ni vica na vula, sa 70 na vuli iVolatabu nei Sara, ia e sega ni rawa ni vuli kei ira kece! E mani tuvanaka mera vuli kei na vica na tacida ena ivavakoso. Levu na gonevuli qori era sa dau tiko ena soqoni. Era na marau mada ga na agilosi mera cakacaka kei ira na tacida vakataki Sara, nira gumatua ena cakacaka vakavunau!

ERA VAKARAITAKA NA AGILOSI NA VOSOTA

11. Era vakaraitaka vakacava na agilosi yalodina na vosota?

¹¹ Era ivakaraitaki vinaka na agilosi yalodina ena nodra vosota. Sa vica vata na udolu na yabaki nodra vosota tiko na veika tawadodonu, kei na veika ca. Kena ivakaraitaki, era raica nona talaidredre vei Jiova o Setani kei na levu tale na kabula vakayalo era dau veiqaravi vata tu. (Vkte. 3:1; 6:​1, 2; Juta 6) E tukuni ena iVolatabu e dua na agilosi yalodina a veivala kei na dua na timoni kaukaua. (Tani. 10:13) Kena ikuri, me tekivu mai na gauna i Atama kei Ivi, era raica tu mai na agilosi nodra digia e dua ga na iwiliwili lailai mera qaravi Jiova. Ia era marautaka tiko ga nodra qaravi Jiova na agilosi yalodina qori, era gumatua. Era kila tiko ni na kauta tani na Kalou na veika ca kece ena gauna lokuci.

12. Na cava meda cakava meda vosota?

¹² Eda na vakatotomuria vakacava na nodra vosota na agilosi? De dua eda raica na kena vakayacori na veika tawadodonu se da tusaqati. Ia me vakataki ira na agilosi, eda kila ni na kauta tani na Kalou na veika ca. Meda “kua . . . ni soro ena caka vinaka” me vakataki ira na agilosi yalodina. (Kala. 6:9) E yalataka na Kalou me vukei keda meda vosota. (1 Kor. 10:13) Meda kerea na yalo tabu i Jiova me vukei keda meda vakaraitaka na vosovoso kei na marau. (Kala. 5:22; Kolo. 1:11) Ia vakacava ke o tusaqati? Mo nuitaki Jiova tiko ga, kua ni rere. Ena vukei iko tiko ga, ena vakaukauataki iko tale ga.​—Iper. 13:6.

ERA VEIVUKE NA AGILOSI ME SAVASAVA NA IVAVAKOSO

13. Na itavi bibi cava era lesi kina na agilosi ena iotioti ni veisiga? (Maciu 13:​47-49)

¹³ Ena iotioti ni veisiga, e lesia o Jiova e dua na itavi bibi vei ira na agilosi. (Wilika Maciu 13:​47-49.) Nida cakacaka vakavunau, era taleitaka kina e vica vata na milioni e veiyasa i vuravura na itukutuku vinaka. Eso vei ira qori era cakava na veiveisau mera lotu vaKarisito dina, eso tale era sega ni veisau. Ia era lesi na agilosi mera “wasei ira tani na daucaka ca mai vei ira na yalododonu.” Kena ibalebale, era veivuke ena kena taqomaki na savasava ni ivavakoso. Vakacava kena ibalebale ya ni sa na sega ni vakatarai mera lesu mai o ira na biuta na dina, se sa na oti na leqa ena ivavakoso? Sega. Eda nuidei nira cakacaka tiko vakaukaua na agilosi mera veivuke ena kena taqomaki na savasava ni ivavakoso.

14-15. Eda na vakatotomuria vakacava nodra kauai na agilosi ena savasava ni ivavakoso? (Raica tale ga na iyaloyalo.)

¹⁴ Eda na vakatotomuria vakacava nodra kauai na agilosi ena savasava ni ivavakoso? Eda na saga me savasava noda itovo ena ivavakoso, meda savasava tale ga vakayalo. Me rawati qori, eda na saga meda taqomaka na lomada nida digia vinaka na noda itokani, eda na qarauna tale ga na ka ena vakaleqa na noda veiwekani kei Jiova. (Same 101:3) Meda vukei ira tale ga na tacida vakayalo mera yalodina tiko ga vei Jiova. Kena ivakaraitaki, na cava meda cakava ke da kila ni valavala ca bibi e dua na tacida? Nida lomana na tacida qori, eda na uqeti koya me lai tukuna vei ira na qase ni ivavakoso. Ke sega ni cakava qori, eda na lai tukuna vei ira na qase. Eda vinakata mera vukei totolo na tacida era malumu vakayalo!​—Jeme. 5:​14, 15.

¹⁵ Ka ni rarawa nira biu tani mai na ivavakoso eso era valavala ca bibi. Ni yaco qori, meda “kua ni vakailala kei ira.”d (1 Kor. 5:​9-13) E yaga na ituvatuva qo me savasava kina na ivavakoso. Nida vakatulewataka tale ga meda kua ni veimaliwai kei ira na biu tani, eda vakaraitaka nida lomani ira. Ena uqeti ira mera kilaiyalodra tale ra qai lesu vei Jiova. Ke ra cakava qori, eda na marau vata kei Jiova kei ira na nona agilosi.​—Luke 15:7.

16. Sala cava o na vakatotomuri ira kina na agilosi?

¹⁶ Eda kalougata ni vakavulici keda o Jiova meda kila na kedra itukutuku na agilosi, meda cakacaka vata tale ga kei ira! Meda vakatotomuria mada ga na nodra itovo vinaka: ya na nodra yalomalumalumu, nodra lomani keda, nodra vosota, kei na nodra kauai ena savasava ni ivavakoso. Ke da vakatotomuri ira na agilosi yalodina, eda rawa tale ga ni lewenivuvale i Jiova era sokaloutaki koya me tawamudu.