Era Vukei na Tacida ena Cakacaka ni Vakacoko ena 2021

Ena yabaki vakacakacaka ni 2021,a e se vakilai tiko ga e vuravura na revurevu ni matedewa na COVID-19. Me vaka e vakamacalataki ena ulutaga “Veivuke ena Matedewa e Tarai Vuravura,” e vakayagataki e vica vata na milioni na dolab me veivuke ena matedewa. E tauyavutaki tale ga e sivia ni 950 na Komiti ni Vakacoko.

Levu na ituvaki dredre e vakilai ni veitauvi na matedewa. Gauna vata qori era vakila tale ga na tacida e veiyasa i vuravura na vakacaca ni leqa tubukoso. E vakadonuya gona na Komiti ni Kodineita ni iLawalawa Dauvakatulewa, me vakayagataki e $8 na milioni me veivuke ina sivia na 200 na leqa tubukoso. Na ilavo qori e sega ni okati ina ka ni veivuke ni matedewa. Raica mada na sala e yaga kina na nomu cau vei ira na tacida ena rua na leqa tubukoso qo.

Kacabote na Volukano e Mount Nyiragongo

Ena ika22 ni Me 2021, e kacabote na volukano e Mount Nyiragongo ena Democratic Republic of the Congo. Na kena vatu katakata waicala e lai vakacacana na veivale, koronivuli kei na vanua e maroroi kina na wai. Oti e vica na siga, e robota na siti o Goma na kuvu gaga ni volukano, e yaco tale ga e levu na uneune lalai. Era tokitaki kina e sivia ni veimama na lewenivanua ena siti qori. E vica vata na drau na udolu era dro, eso era yaco sara i Rwanda.

O ira na tokitaki qo ra wili tale tiko ga kina e rauta ni 5,000 na iVakadinadina i Jiova. Eso vei ira qori e vakacacani na nodra vale ena volukano. Eso tale na vale e butakoci na kena iyaya ena gauna ra dro kina na tacida. E mani tuvanaka na ka ni veivuke na komiti ni vakacoko e Rwanda kei na Democratic Republic of the Congo. E kaya na valenivolavola ni tabana e Congo (Kinshasa) ena veivuke e caka qo: “E veilecayaki na ituvaki ena siti, qai bera tale ga na soli na ivakaro mera toki na lewenivanua. Ia sa veisoliyaka rawa na komiti ni vakacoko na kakana, wai, iyaya ni moce kei na isulu.” Era lai tiko ena dua na tauni e sivia ni 2,000 na tacida, e vakarautaka sara vei ira na komiti ni vakacoko na valelaca, mask, e vakamacalataka tale ga na sala mera qaqarauni kina mai na COVID-19 kei na cholera.

Ena tolu na vula e yaco tiko kina na leqa tubukoso, era veisoliyaka na tacida e sivia e ono na tani na raisi, ono na tani na valawa, tolu na tani na waiwai ni kana, kei na tolu na tani na wai. Me maroroi na ilavo, e tuvanaka na valenivolavola ni tabana me voli ga vakalevu ekea na kakana, mai na kena otataki na kakana saulevu e vanuatani.

E kaya e dua na tacida yalewa a vakacacani nona vale vou ena volukano: “Keitou rarawa qai yalolailai.” Ia ratou qai vukei vakayago, ratou vakayaloqaqataki tale ga me ratou yalodina tiko ga. E kaya: “O Jiova e vakarautaka na ka kece keitou gadreva. Keitou vakadinadinataka na nona veitokoni, e vukei keitou tale ga me keitou vosota na ituvaki dredre qo.”

Leqa Vakailavo e Venezuela

Vica vata na yabaki na kena vakilai tiko e Venezuela na leqa vakailavo. Dua na ka na nodra vosota tiko na tacida ekea na torosobu ni ivakarau ni bula, leqa ni kakana, kei na levu ni basulawa. Ia e sega vakadua ni guilecavi ira na isoqosoqo i Jiova.

Ena yabaki vakacakacaka sa oti, e vakayagataki e sivia e $1.5 na milioni me voli qai vakau na kakana kei na sovu vei ira na tacida era vinakata na veivuke. E kaya na valenivolavola ni tabana e Venezuela: “Sega ni rawarawa me vakau e veivula e 130 na tani na kakana, me lai soli tale ga vei ira na tacida era vinakata na veivuke ena dui vanua e Venezuela.” Me rawa ni vinaka tu ga na kakana, era vakauta na tacida na kakana ena rawa ni maroroi vakadede. E kaya na valenivolavola ni tabana: “Keitou dau saga me keitou volia vakalevu na kakana, me voli tale ga ena gauna e sau lailai kina. Oti na qai vakau ena sala e sau vinaka kina.”

E marautaka o Leonel, e lewe ni Komiti ni Vakacoko e Venezuela na nona veiqaravi ena tabana qo. E kaya: “E talei na cakacaka ni vakacoko. Sa takali o watiqu ena COVID-19, ia e dau vakayaloqaqataki au na itavi dokai qo. Au ogaoga kina vakalevu, au kila ni tiko na kequ yaga vei ira na tacida era vinakata na veivuke. Au raica sara ga nona dina o Jiova ina nona yalayala ni na sega vakadua ni biuti ira na nona tamata.”

Dua na tacida tagane a veiqaravi tu ena komiti ni vakacoko ena dua na gauna sa oti. A vukei tale ga ena ituvaki a yaco qo e Venezuela. E kaya: “Ni yaco na leqa vakailavo qo, au vinakata sara ga na veivuke. Era vakarautaka na mataveitacini na ka keirau gadreva vakaveiwatini, era kauaitaki keirau, ra veivakacegui ra qai veivakayaloqaqataki.”

Eso na leqa tubukoso e sega ni kilai na gauna e yaco kina, se lailai na ivakaro e soli. Ia na isoqosoqo i Jiova e dau vakarautaka qai veisoliyaka totolo na iyaya ni veivuke. E rawa ga qori ena nomuni cau ena cakacaka e vuravura e raraba. Eso na iwalewale ni cau e vakamacalataki ena donate.jw.org. Vinaka vakalevu na nomuni lomasavu.