Na Rai ni iVolatabu

E Dau Veisau Rawa Beka na Kalou?

E VAKATOKA o George Dorsey, e dua e daudikeva na ivalavala ni tamata, ni “Kalou vakarerevaki” na Kalou ni “Veiyalayalati Makawa.” E kuria: “E sega ni dauloloma . . . o Yahweh. E nodra Kalou na dau vakacaca, na dau veivakasaurarataki, na dauvala, kei ira na dau ravuravu.” E so nikua e vakatale ga oqo na nodra nanuma me baleta na Kalou ni “Veiyalayalati Makawa”​—o Yahweh, se o Jiova. O koya gona, era nanuma kina ni a Kalou ivakarau ca tu e liu o Jiova ni bera ni veisautaki koya me Kalou dau loloma ena “Veiyalayalati Vou.”

E sega ni vakasama vou oqo me baleta na Kalou ni iVolatabu. Se cavuta makawa sara tu mai na vuku o Marcion, ena ikarua ni senitiuri B.S.K. E cata na Kalou ni “Veiyalayalati Makawa” o Marcion. E kaya ni Kalou oqo e tovo kaukaua qai cudrucudru, e dauveiliutaki voravora, qai solia ga na veika vinaka vei ira era sokaloutaki koya. Ena yasana adua, e vakatoka na Kalou ni “Veiyalayalati Vou”​—me vaka e mai vakatakila o Jisu Karisito​—me Kalou uasivi, yalololoma, yalovinaka, qai dauveivosoti.

E Moici Koya o Jiova ni Veisau na iTuvaki

Na yaca ni Kalou, o Jiova, e kena ibalebale “O Koya e Vakavuna me Yaco.” E vakaraitaka ni o Jiova e dau vakayacora na nona vosa ni yalayala kece. Ena gauna e taroga kina o Mosese me baleta na yaca ni Kalou, a qai vakamacalataka vaka oqo o Jiova na kena ibalebale: “Au lewai au ga vakai au.” (Lako Yani 3:14, NW) Na ivakadewa i Rotherham e tukuna: “Ena yaco ga meu vakataki koya au vinakata.”

E dau vaka oya na itovo i Jiova me rawa ni vakayacora kina na nona inaki kei na nona vosa ni yalayala. Oqori na vuna e levu kina na kena icavuti me vaka na: Jiova ni lewe vuqa, Turaganilewa, Tui, Vuvu, Turaga Sau, Dauveibuli, Tama, iVakavuvuli Levu, iVakatawa, Daurogo masu, iVakabula, Kalou mamarau, kei na vuqa tale. E vakayacora o Jiova na veika oqori kei na vuqa tale me rawa ni yaco kina na nona inaki.​—Lako Yani 34:14; Dauveilewai 11:27; Same 23:1; 65:2; 73:28; 89:26; Aisea 8:13; 30:20; 40:28; 41:14; 1 Timoci 1:11.

Kena ibalebale beka oqo ni sa veisautaka na Kalou na nona itovo kei na nona ivakatagedegede? Sega. E kaya na Jemesa 1:17 me baleta na Kalou: “A sa sega vua na veivukiyaki, se yaloyalo ni veigoleyaki.” E rawa vakacava vua na Kalou me moici koya ena ituvaki cava ga, ia ena gauna vata oya e sega ni veisautaki koya?

Ena matata vei keda na tikina oqo kevaka eda raica na itavi erau vakacolati rau kina na itubutubu me baleti luvedrau. Ena loma ni dua na siga, e dua vei rau ena rawa ni daunivakasaqa, daunisasamaki, daunilivaliva, itokani, daunivakasala, qasenivuli, dauveivunauci, nasi kei na vuqa tale. Ia e sega ni na mai veisautaka kina nona itovo na itubutubu na ituvaki oqori; ena vakayacora ga na ka ena gadrevi me vakayacori. E vakatale ga kina o Jiova, ia ena sala e levu cake sara. E sega ni yalani na ka e rawa ni vakayacora me vakavatukanataki kina na nona inaki, mera vinaka tale ga kina na nona ibulibuli.​—Roma 11:33.

Me kena ivakaraitaki, e dau laurai ena iVolatabu Vakaiperiu kei na Vakirisi ni o Jiova e Kalou yalololoma. E tarogi Jiova na parofita o Maika ena ikawalu ni senitiuri B.S.K.: “O cei na Kalou me tautauvata kei kemuni, ka bokoca na caka cala, ka sa buluta na nodra talaidredre na kena vo ni nonai votavota? ka sa sega ni cudru tiko me sega ni mudu, ni sa vinakata ko koya me yalololoma.” (Maika 7:18) E vola tale ga na vosa kilai levu oqo na yapositolo o Joni: “Sa loloma na Kalou.”​—1 Joni 4:8.

Ena yasana adua, na iVolatabu ruarua oqo, Vakaiperiu kei na Vakirisi, e vakamacalataki Jiova me Turaganilewa yalododonu vei ira era beca vakavicavata na nona lawa, ra bese ni veivutuni ra qai vakavu leqa vei ira na tani. E kaya na daunisame: “Ia [o Jiova] ena vakawabokotaki ira kecega nai valavala ca.” (Same 145:20) E tautauvata oqo kei na ka e kaya na Joni 3:36: “O koya sa vakabauta na Luvena, sa rawata na bula tawa mudu: ko koya sa sega ni vakabauta na Luvena, ena sega ni raica na bula; a sa tiko ga vei koya na cudru ni Kalou.”

E Sega ni Veisau na Nona iTovo

E sega ni veisau na itovo qoroi i Jiova​—me vaka na loloma, na vuku, na lewadodonu, kei na nona kaukaua. E kaya vei ira na Isireli: “Koi au ko Jiova, ka’u sa sega ni veivukiyaki.” (Malakai 3:6) A tukuna na vosa oqo na Kalou ena 3,500 na yabaki ni bulia oti na tamata. Ni dikevi vinaka na iVolatabu taucoko, e kunei kina na ivakadinadina ni sega ni veisau na itovo kei na ivakatagedegede ni Kalou. E sega ni gadrevi me veisautaka o Jiova na nona itovo me vinaka baleta ni duadua tu ga mai o koya, a sega ni veisau me lai ca.

E sega ni veisau na loloma kei na yalododonu ni Kalou e tukuni tu ena iVolatabu me tekivu sara mai ena imatai ni gauna e veitaratara kina kei na tamata mai Iteni. E kena irairai beka vei keda ni duidui na itovo i Jiova ena veitikinivolatabu, ia e laurai ni sega ni kena ibalebale oya ni sa veisau o koya. E duadua tu ga o Jiova. Ni tukuni ni veisau na nona itovo, e kena ibalebale ga na nona veisautaka na ivakarau ni nona vakasama kei na ivakarau ni nona veimaliwai ni sotavi na dui ituvaki kei na nona veitaratara kei na duidui tamata.

O koya gona, e vakaraitaka na iVolatabu ni sega vakadua ni bau veisau na itovo ni Kalou ena senitiuri sa oti, ena sega tale ga ni veisau ena gauna mai muri. E ivakaraitaki vinaka duadua o Jiova ena nona dau dei tu ga qai sega ni veisau rawa. E vakabauti qai nuitaki e veigauna kece. Eda rawa tale ga ni vakararavi vua.

[iYaloyalo ena tabana e 28, 29]

Na Kalou ga a vakarusai Sotoma kei Komora . . .

. . . ena kauta tale ga mai na vuravura vou ni yalododonu